«رەسپۋبليكالىق جەدەل-قۇتقارۋ جاساعى قۇتقارۋشىلارىنىڭ 10 ادامنان قۇرالعان جەكە جاساعى تۇركىستان وبلىسىنىڭ تاۋلارىندا ىزدەستىرۋ-قۇتقارۋ جۇمىستارىن جالعاستىرىپ جاتىر. 10 ماۋسىمدا وگەم وزەنى ارناسىنىڭ بويىنداعى جەتىگور شاتقالى جانە وگەم مەن ايعىرجىققان وزەندەرىنىڭ قوسىلعان جەرى تەكسەرىلدى, ىزدەستىرۋ جۇمىستارى ناتيجە بەرمەدى», دەدى ۆەدومستۆو وكىلى.
11 ماۋسىمدا تۋريستەردىڭ زاتتارى تابىلعان جەرگە قۇتقارۋشىلار تىكۇشاقپەن جەتكىزىلدى. رجقج قىزمەتكەرلەرى ەكى توپقا ءبولىنىپ, ايعىرجىققان شاتقالىندا ىزدەستىرۋ-قۇتقارۋ جۇمىستارىنا كىرىستى.
قۇتقارۋشىلاردىڭ ايتۋىنشا, ىزدەستىرۋ-قۇتقارۋ جۇمىستارىنا وزەننىڭ اعىسى مەن تاۋ شاتقالدارى كەدەرگى كەلتىرەدى.
«رەسپۋبليكالىق جەدەل-قۇتقارۋ جاساعى ىزدەستىرۋ ايماعىن كەڭەيتۋ ءۇشىن قوسىمشا كۇش رەتىندە ەكى كينولوگيالىق ەسەپتى قوسا العاندا, جەكە قۇرامنىڭ تاعى سەگىز ادامى جىبەرىلدى», دەدى ءباسپاسوز قىزمەتى وكىلى.
ەسكە سالايىق, كەشە, 27 مامىردا نازارباەۆ ۋنيۆەرسيتەتىنىڭ ءباسپاسوز قىزمەتى تۇركىستان وبلىسى تاۋلارىندا جوعالىپ كەتكەن جەتى ساياحاتشىنىڭ التاۋى جوو ستۋدەنتتەرى ەكەنىن حابارلاعان بولاتىن. 21 مامىردا ۋنيۆەرسيتەتتىڭ التى ستۋدەنتى جانە كەنتاۋ قالاسى ليتسەي-ينتەرناتىنىڭ تۇلەگى تۇركىستان وبلىسىنداعى تاۋلارعا 4-5 كۇنگە جاياۋ ساياحاتقا شىعىپ كەتكەن. بۇگىن جوعالعان 7 جىگىتتىڭ ۇشەۋى تابىلدى.
