سولتۇستىك قازاقستان وبلىسى پوليتسيا دەپارتامەنتى ءباسپاسوز قىزمەتىنىڭ مالىمەتىنشە, مامىر ايىنىڭ سوڭىندا ءبىرىنشى پوليتسيا ءبولىمى كەزەكشىسىنىڭ كومەكشىسى مەيىرمان تولەباەۆ جۇمىستان بوس ۋاقىتتا ەسىل وزەنى جاقتا دەمالىپ جۇرگەن. ءبىر كەزدە ادامداردىڭ كومەككە شاقىرعان داۋسىن ەستيدى.
وقيعا ورنىنا جەتكەن اعا سەرجانت جاعادان 20 مەتردەي جەردە ادامداردىڭ سۋعا باتىپ بارا جاتقانىن بايقايدى. ول الدىمەن جاس قىزدى, ودان سوڭ ەس-ءتۇسسىز ەر ادامدى الىپ شىققان, جاعاعا جاقىنداي بەرگەندە وعان تانىس قىز كومەكتەسكەن. مەيىرمان ەر ادامعا جاساندى دەمالۋ جانە جۇرەگىنە ماسساج جاساعان.
