مەملەكەت باسشىسىنا قارجى نارىعىنىڭ دامۋ قورىتىندىلارى مەن قارجى ۇيىمدارىن رەتتەۋ جونىندەگى جۇمىستار تۋرالى باياندالدى.
كەزدەسۋ بارىسىندا قارجى تۇراقتىلىعىن قامتاماسىز ەتۋگە باعىتتالعان شارالارعا ەرەكشە نازار اۋدارىلدى. اتاپ ايتقاندا بانك, ساقتاندىرۋ سەكتورى, قور نارىقتارى بويىنشا تۇراقتى تۇردە AQR جانە سترەستىك سىناقتان وتكىزۋدى كوزدەيتىن قاداعالاۋ ساياساتىنىڭ باسىمدىقتارى ازىرلەنگەن.
قاسىم-جومارت توقاەۆقا سترەستىك اكتيۆتەر دەڭگەيىن تومەندەتۋ جونىندەگى قاداعالاۋ جوسپارىن بانكتەردىڭ ورىنداۋىنا باقىلاۋ جاساۋ ماقساتىندا اگەنتتىكتىڭ قابىلداپ جاتقان شارالارى تۋرالى مالىمەت بەرىلدى. سونىڭ ناتيجەسىندە وتكەن جارتى جىلدا سترەستىك اكتيۆتەردىڭ كولەمى 15,5 پايىزعا, ياعني 2,3 تريلليون تەڭگەگە دەيىن ازايدى.
ءمادينا ابىلقاسىموۆانىڭ ايتۋىنشا, قازىرگى ەكونوميكالىق جاعدايدا بانكتەردىڭ نەسيە بەرۋ ءىسى ورنىقتى بولىپ وتىر. ەكونوميكانى نەسيەلەۋ كولەمى جىل باسىنان بەرى 3,3 پايىزعا ارتىپ, 15,1 تريلليون تەڭگەگە جەتكەن.
مەملەكەت باسشىسى قارىز الۋشىلاردىڭ قۇقىعىن قورعاۋ ماقساتىمەن 25 مامىردا بانكتەر مەن ميكروقارجى ۇيىمدارى ءۇشىن ازاماتتاردىڭ مەرزىمى وتكەن بەرەشەگىن رەتتەۋدىڭ مىندەتتى ءتارتىبىن ەنگىزۋدى كوزدەيتىن زاڭعا قول قويدى.
پرەزيدەنتتىڭ تاپسىرماسى بويىنشا جىلدىق ءتيىمدى سىياقى مولشەرلەمەسى سارالانىپ, كەپىلدىك جانە يپوتەكالىق كرەديتتەر بويىنشا شەكتى مولشەر تومەندەتىلدى. جاعىمسىز نەسيەلىك تاريحى بار بورىشكەرلەردىڭ نەسيەگە قولجەتىمدىلىگىن قالپىنا كەلتىرۋ ءۇشىن مەرزىمى وتكەن نەسيەنى وتەگەن قارىز الۋشىلاردى وڭالتۋ تەتىگى قابىلداندى. بۇگىندە 1,4 ميلليون ادام قايتادان قارىز الۋ قۇقىعىنا يە بولدى.
اگەنتتىك توراعاسى مەملەكەت باسشىسىنا ميكروقارجىلىق قىزمەتتى ليتسەنزيالاۋ اياقتالعانى تۋرالى باياندادى. جىل باسىنان بەرى 1012 نەسيە بەرۋ ۇيىمى ليتسەنزيا العان.
اگەنتتىك توراعاسى پرەزيدەنتكە شاعىن نەسيەلەردى بەرۋ كەزىندە كليەنتتەردىڭ مالىمەتتەرىن قاشىقتان سايكەستەندىرۋ تەتىگى كۇشەيتىلگەنىن جەتكىزدى. بۇل رەتتە, مىندەتتى تۇردە بيومەتريانى تەكسەرۋ نەمەسە ەكى فاكتورلى اۋتەنتيفيكاتتاۋ ارقىلى وتكىزىلەدى. بۇدان بىلاي كليەنتتەردى تەكسەرمەستەن شاعىن نەسيەلەردى بەرۋگە تىيىم سالىنادى.
كەزدەسۋ قورىتىندىسى بويىنشا مەملەكەت باسشىسى اگەنتتىككە ەكونوميكالىق ءوسىمدى قايتا قالپىنا كەلتىرۋدە قارجى تۇراقتىلىعىن ساقتاۋ, قارجى قىزمەتتەرى تۇتىنۋشىلارىنىڭ قۇقىقتارىن قورعاۋدى كۇشەيتۋ جانە قارجى نارىعىنىڭ ءرولىن ارتتىرۋ جونىندە بىرقاتار مىندەت جۇكتەدى.
