Transparency International ۇيىمىنىڭ مالىمەتىنە سۇيەنسەك, بولگاريا قازىرگى تاڭدا جەمقورلىق رەيتينگى بويىنشا 69-ءشى ساتىدا تۇر. بىلتىر 74-ءشى ورىنعا جايعاسقان ەدى. ءبىر جىل ىشىندە بەس ساتىعا كوتەرىلگەنىنە قاراماستان, بولگاريا ەۋروپالىق وداقتاعى جەمقورلىق كەڭ جايىلعان مەملەكەت سانالادى.
وكىنىشكە قاراي, قارت قۇرلىق قانشا تىرىسقانىمەن, اتالعان ەلدەگى پاراقورلىقتى ازايتا الماي كەلەدى. ەۋروپالىق كوميسسيا رەسمي سوفيانى جەمقورلىققا قارسى كۇرەسە الماعانى, پارا العىش شەنەۋنىكتەردى تەمىر تورعا قاماماعانى ءۇشىن تالاي مارتە سىناعان-دى. الايدا بۇدان جاعداي جاقسارعان جوق.
بولگاريانىڭ ۋاقىتشا پرەمەر-ءمينيسترى ستەفان يانەۆ سانكتسيا تۋرالى اقش مەملەكەتتىك حاتشىسىنىڭ ساياسي ماسەلەلەر جونىندەگى ورىنباسارى ۆيكتوريا نۋلاندپەن تەلەفون ارقىلى سويلەسكەندە ەستىگەنىن مالىمدەدى. ونىڭ پايىمداۋىنشا, بۇل ەلدەگى سىبايلاس جەمقورلىقپەن كۇرەسۋ ءۇشىن ءتيىمدى بولماق.
«سەرىكتەستەرىمىزبەن جانە وداقتاستارىمىزدىڭ سىبايلاس جەمقورلىققا قارسى بۇكىل ءتاسىلدى قولدانىپ كۇرەسۋدە ءپرينتسيپتى جانە پراكتيكالىق باسىمدىقتار قاجەت دەگەن پىكىرىمەن تولىقتاي كەلىسەمىز», دەلىنگەن بولگاريانىڭ سىرتقى ىستەر مينيسترلىگى تاراتقان مالىمدەمەدە.
اقش قازىناشىلىق دەپارتامەنتى 64 جاستاعى وليگارح ۆاسيل بوجكوۆتى رەسەي بيلىگىنە بولگاريا ۇكىمەتىنە ىقپال ەتۋ ارناسىن قۇرۋدى جوسپارلاپ, مەملەكەتتىك قىزمەتكەرلەرگە پارا بەردى دەپ ايىپتاپ, سانكتسيا سالعانىن مالىمدەدى.
بوجكوۆ – بولگارياداعى ەڭ باي ادامداردىڭ ءبىرى. ول ەلدەگى قۇمار ويىن بيزنەسىن باقىلاۋىندا ۇستايدى. بىلتىر ول بوپسالاۋ, سالىقتان جالتارۋ, پارا بەرۋ سەكىلدى قىلمىستىق جاۋاپكەرشىلىكتەن قۇتىلۋ ءۇشىن ەلدەن قاشىپ كەتكەن-تۇعىن. سودان بەرى بوجكوۆ دۋبايدا بويتاسالاپ, ءالى كۇنگە دەيىن وزىنە تاعىلعان ايىپتاردىڭ ءبارىن جوققا شىعارۋدان تانار ەمەس.
سونىمەن قاتار كاسىپكەر, پارلامەنتتىڭ بۇرىنعى دەپۋتاتى دەليان پەەۆسكيگە, شەنەۋنىك يلكو جەليازكوۆقا دا سانكتسيا سالىندى. قازىناشىلىق دەپارتامەنتىنىڭ كەلتىرگەن مالىمەتتەرىنە سۇيەنسەك, كەيىنگىسى كەزىندە پەەۆسكيدىڭ پاراقورلىق ءتاسىلىن جۇرگىزۋگە كومەكتەسكەن. قازىناشىلىق دەپارتامەنتى ونى ءوزىن قوعامدىق باقىلاۋدان قورعاۋعا, ماڭىزدى مەكەمەلەر مەن سالالارعا باقىلاۋ جاساۋ ماقساتىندا پارا بەردى دەپ ايىپتايدى.
بۇدان بولەك, بوجكوۆ پەن پەەۆسكيگە تيەسىلى 64 كومپانيا «قارا تىزىمگە» ەندى. ولاردىڭ ەندى اقش-تىڭ قارجى جۇيەسىنە كىرۋلەرىنە رۇقسات جوق. سونداي-اق ەكەۋىنىڭ اقش-تاعى اكتيۆتەرى بۇعاتتالىپ, امەريكالىق كەز كەلگەن زاڭدى جانە جەكە تۇلعاعا ولارمەن جۇمىس ىستەۋگە تىيىم سالىنادى.
پەەۆسكي دە وزىنە تاعىلعان ايىپتاردى جوققا شىعارىپ وتىر. دەگەنمەن, تىقىردىڭ تايانعانىن سەزسە كەرەك, كەيىنگى ءبىر جىل كولەمىندە ول وزىنە تيەسىلى كوپتەگەن جىلجىمايتىن م ۇلىكتى ساتىپ جىبەرگەن. سونداي-اق باقىلاۋىنداعى بۇقارالىق اقپارات قۇرالدارىنان دا باس تارتتى.
بۇل از دەسەڭىز, اقش مەملەكەتتىك دەپارتامەنتى بولگاريانىڭ بۇرىنعى شەنەۋنىكتەرى الەكساندر مانولەۆتى, پەتار حارالامپەۆتى, كراسيمير توموۆتى, پەەۆسكي مەن جەليازكوۆتى سىبايلاس جەمقورلىققا قاتىسى بار دەپ ەسەپتەيدى. سوندىقتان ولارعا جانە وتباسىلارىنا اقش-قا كىرۋگە رۇقسات جوق.
ءبىر قىزىعى, كەي ساراپشىلار بولگارياداعى جەمقورلىقتىڭ تامىر جايۋىنا جول بەرگەنى ءۇشىن ەۋروپالىق كوميسسيا پرەزيدەنتى ۋرسۋلا فون دەر ليايەن مەن گەرمانيا كانتسلەرى انگەلا مەركەلدى كىنالايدى.
باستى سەبەپ مىنادا. بۇعان دەيىن ون شاقتى جىل پرەمەر-مينيستر لاۋازىمىن اتقارعان بويكو بوريسوۆ ەۋروپالىق وداقتاعى شەنەۋنىكتەرمەن ەتەنە جاقىن بولعان. ساراپشىلار بەرتىنگە دەيىن ونىڭ جۇرگىزگەن ساياساتىنا قاتىستى بريۋسسەلدەگى شەنەۋنىكتەر باتىرىپ سىن ايتا الماعان دەپ ەسەپتەيدى. سونىڭ سالدارىنان ەلدە پاراقورلىق كەڭ تارالىپ وتىر.
ايتا كەتەرلىگى, 1 شىلدەدە بولگاريادا پارلامەنتتىك سايلاۋ وتپەك. اقش-تىڭ «قارا تىزىمىنە» ىلىككەندەر الداعى سايلاۋدان مول ءۇمىت كۇتەدى. ويتكەنى قازىرگى تاڭدا بويكو بوريسوۆ باسشىلىق جاسايتىن GERB پارتياسى جەڭىستەن ءۇمىتتى. ال بوجكوۆ – «قۇقىق جانە ەركىندىك» پارتياسىنىڭ قۇرامىندا.
