بۇل تۋرالى ىشكى ىستەر مينيسترلىگىنىڭ رەسمي وكىلى ءنۇردىلدا وراز مالىمدەدى. 5 كۇن ىشىندە 877 نىسان, ونىڭ ىشىندە ءدارىحانالار مەن قويمالار, ەمدەۋ-الدىن الۋ مەكەمەلەرى جانە ونەركاسىپتىك كاسىپورىندار تەكسەرىلدى.
ۆەدومستۆو وكىلىنىڭ دەرەگىنشە, ەسەپكە الىنعان پرەپاراتتاردى رەتسەپتىسىز بوساتۋدىڭ 56 فاكتىسى انىقتالىپ, 12 توننا پرەكۋرسوردىڭ اينالىمى شەكتەلدى. وپەراتسيا بارىسىندا 21 قىلمىستىق قۇقىق بۇزۋشىلىق انىقتالدى.
«ساقتاۋ تالاپتارى بۇزىلعان نەمەسە قۇرامىندا ەسىرتكى بار ساتىلىمداعى بارلىق پرەپاراتتار اينالىمنان الىندى. اتاپ ايتقاندا, 2 مىڭنان استام ەسىرتكى قۇرالدارى امپۋلاسى, 1600-دەن استام تابلەتكا جانە 1800 پسيحوتروپتىق زاتتار امپۋلاسى تاركىلەندى. بارلىق انىقتالعان فاكتىلەر بويىنشا قىلمىستىق ءىس قوزعالدى», دەپ مالىمدەدى قر ىشكى ىستەر مينيسترلىگىنىڭ رەسمي وكىلى ءنۇردىلدا وراز.
