– ءبىزدىڭ ۋنيۆەرسيتەتتەگى ح.تابىلديەۆ اتىنداعى كاسپي ءوڭىرىنىڭ تاريحى, ارحەولوگياسى جانە ەتنولوگياسى عىلىمي-زەرتتەۋ ينستيتۋتىنىڭ ءۇش عىلىمي جەتەكشىسى مەن 20 ستۋدەنتى مۇقىر اۋىلدىق وكرۋگىنە قاراستى قاراقۇدىق ۋچاستىگىندەگى قورعاندارعا قازبا جۇمىسىن جۇرگىزدى. قازبا جۇمىسى كەزىندە تاريحي جادىگەرلەرگە كەزىكتىك. مۇندا سارمات داۋىرىنە جاتاتىن جاۋىنگەرلەردىڭ سۇيەگى تابىلدى, – دەيدى اتالعان عىلىمي-زەرتتەۋ ينستيتۋتىنىڭ ديرەكتورى, تاريح عىلىمدارىنىڭ دوكتورى سايفوللا ساپانوۆ.
ونىڭ مالىمەتىنشە, ءبىر قورعاننان ءۇش جاۋىنگەردىڭ ءبىرىنىڭ تۇسىنان قارۋ-جاراقتارى مەن ەكى مىڭ جىل بۇرىنعى قۇمىرا, ءتورت قويدىڭ سۇيەگى تابىلىپ وتىر. قورعاندا نايزا, بەلدىكتە پىشاق, ءبىر قوراپ جەبە بولعان.
– ارحەولوگيالىق ەكسپەديتسيانىڭ ءبىرىنشى كەزەڭىندە ءبىر قورعاننان وسىنداي جادىگەرلەردى تاپتىق. ءبىر قورعاندا ءۇش ادامنىڭ جەرلەنۋى ارحەولوگيادا سيرەك كەزدەسەدى. مۇنى ءبىز سارمات داۋىرىندەگى جاۋىنگەرلەر دەگەن تۇجىرىم جاسادىق. ءبىر جاۋىنگەردىڭ وڭ قولىنىڭ بىلەكتەن كەسىلگەنىنە قاراعاندا, سوعىستا قازا تابۋى مۇمكىن. قولباسشى بولعان شىعار. سول سەبەپتەن, ەندى جاۋىنگەرلەردىڭ سۇيەگىنە انتروپولوگيالىق زەرتتەۋ جۇرگىزىلەدى, – دەيدى ارحەولوگيالىق ەكسپەديتسيا جەتەكشىسى سايفوللا ساپانوۆ.
ەكسپەديتسيا جەتەكشىسىنىڭ پىكىرىنە سۇيەنسەك, ەندى ارحەولوگيالىق ەكسپەديتسيانىڭ ەكىنشى كەزەڭىنە ارحەولوگتەر تارتىلماق. ونىڭ اراسىندا حالىقارالىق ارحەولوگتەر دە بار.
– سونداي ارحەولوگتىڭ ءبىرى – ب.گوروديۆيكوۆ اتىنداعى قالماق مەملەكەتتىك ۋنيۆەرسيتەتىنىڭ پروفەسسورى, تاريح عىلىمدارىنىڭ دوكتورى پەتر كولتسوۆ. جاقىندا بۇل عالىم ءبىزدىڭ ەكسپەديتسيا قۇرامىنا قوسىلىپ, قورعاننان تابىلعان سارمات داۋىرىندەگى جاۋىنگەرلەردىڭ سۇيەگىنە, وزگە جادىگەرلەرگە عىلىمي-زەرتتەۋ, تالداۋ جۇرگىزەدى, – دەگەن ويىمەن ءبولىستى س.ساپانوۆ.
اتىراۋ وبلىسى
