ۋنيۆەرسيتەت رەكتورى سالامات يدريسوۆتىڭ ايتۋىنشا, وقۋ ورنىنىڭ عالىمدارى قازبا جۇمىسىن جۇرگىزۋگە رۇقسات العان ەكەن. سوعان وراي, 24 مامىردا ارحەولوگيالىق ەكسپەديتسيا تەمىر داۋىرىنە جاتاتىن قورعانداردى زەرتتەۋگە كىرىستى. مۇنداي قورعاندار قىزىلقوعا اۋدانىنداعى مۇقىر اۋىلدىق وكرۋگىنىڭ اۋماعىندا ورنالاسقان.
ء«بىزدىڭ ۋنيۆەرسيتەتتەگى ح.تابىلديەۆ اتىنداعى كاسپي ءوڭىرىنىڭ تاريحى, ارحەولوگياسى جانە ەتنولوگياسى عىلىمي زەرتتەۋ ينستيتۋتىنىڭ 3 عىلىمي جەتەكشىسى مەن 20 ستۋدەنتى مۇقىر اۋىلدىق وكرۋگىنە قاراستى قاراقۇدىق ۋچاستوگىندەگى قورعاندارعا قازبا جۇمىسىن جۇرگىزدى. قازبا جۇمىسى كەزىندە تاريحي جادىگەردىڭ ۇستىنەن تۇستىك. مۇندا سارمات داۋىرىنە جاتاتىن جاۋىنگەرلەردىڭ سۇيەگى تابىلدى» دەيدى اتالعان عىلىمي زەرتتەۋ ينستيتۋتىنىڭ ديرەكتورى, تاريح عىلىمدارىنىڭ دوكتورى سايفوللا ساپانوۆ.
ونىڭ مالىمەتىنشە, ءبىر قورعاننان ءۇش جاۋىنگەردىڭ ءبىرىنىڭ تۇسىنا قارۋ-جاراقتارى مەن 2 مىڭ جىل بۇرىنعى قۇمىرا, 4 قوي تابىلىپ وتىر. قورعاندا نايزا, بەلدىكتە پىشاق, ءبىر قوراپ جەبە بولعان.
«ارحەولوگيالىق ەكسپەديتسيانىڭ ءبىرى كەزەڭىندە ءبىر قورعاننان وسىنداي جادىگەرلەردى تاپتىق. ءبىر قورعاندا 3 ادامنىڭ جەرلەنۋى ارحەولوگيادا سيرەك كەزدەسەدى. مۇنى ءبىز سارمات داۋىرىندەگى جاۋىنگەرلەر دەگەن تۇجىرىم جاساپ وتىرمىز. ءبىر جاۋىنگەدىڭ وڭ قولىنىڭ بىلەكتەن كەسىلگەنىنە قاراعاندا, سوعىستا قازا تابۋى مۇمكىن. قولباسشى بولعان دا شىعار. سول سەبەپتەن, ەندى جاۋىنگەرلەردىڭ سۇيەگىنە انتروپولوگيالىق زەرتتەۋ جۇرگىزىلەدى» دەيدى ارحەولوگيالىق ەكسپەديتسيا جەتەكشىسى سايفوللا ساپانوۆ.
ەكسپەديتسيا جەتەكشىسىنىڭ پىكىرىنە سۇيەنسەك, ەندى ارحەولوگيالىق ەكسپەديتسيانىڭ ەكىنشى كەزەڭىنە ارحەولوگتار تارتىلماق.
«سونداي ارحەولوگتىڭ ءبىرى – ب.گوروديۆيكوۆ اتىنداعى قالماق مەملەكەتتىك ۋنيۆەرسيتەتىنىڭ پروفەسسورى, تاريح عىلىمدارىنىڭ دوكتورى پەتر كولتسوۆ. جاقىندا بۇل عالىم ءبىزدىڭ ەكسپەديتسيا قۇرامىنا قوسىلىپ, قورعاننان تابىلعان سارمات داۋىرىندەگى جاۋىنگەرلەردىڭ سۇيەگىنە, وزگە جادىگەرلەرگە عىلىمي زەرتتەۋ, تالداۋ جۇرگىزەدى» دەگەن ويىمەن ءبولىستى س.ساپانوۆ.
