جاقىندا عانا دۋبايدا وتكەن ازيا چەمپيوناتىندا ەل نامىسىن قورعاعان دانيال ءسابيت پەن مامىر ايىندا لاس-ۆەگاستا وتكەن امەريكالىق UFC تۋرنيرىنە قاتىسىپ, جەڭىسكە جەتكەن ارالاس جەكپە-جەك شەبەرى دامير يسماعۇلوۆتى قابىلداعان باتىس قازاقستان وبلىسىنىڭ اكىمى جاس سپورتشىلاردى جەڭىستەرىمەن قۇتتىقتاپ, اق جول تىلەدى.
«مەن دانيالدىڭ جەكپە-جەكتەرىنە قىزىعا قاراپ, قاداعالاپ وتىردىم. ول حالىقارالىق دەڭگەيدەگى جارىسقا قاتىسىپ, مول تاجىريبە جينادى دەپ ويلايمىن. كۇمىس مەدال يەگەرى بولۋ وڭاي ەمەس. بۇل – ۇلكەن دارەجە, ۇلكەن جەڭىس. جەرلەسىمىز دانيار ەلەۋسىنوۆتىڭ ەرەسەكتەر اراسىنداعى جەڭىستى جولىن 15 جىلدان سوڭ دانيال جالعاپ وتىر. بوكسقا كەلگەن ەكى جىلدىڭ ىشىندە قايسارلىعى مەن جىگەرى ارقاسىندا وسىنداي دارەجەگە جەتىپ وتىر. دانيال, سەن جاي بوكسشى ەمەسسىڭ, جولىڭدى قۋىپ كەلە جاتقان جاستارعا ۇلگى بولارلىق سپورتشىسىڭ. جەڭىستى كۇندەرىڭ كوپ بولسىن», دەدى ءوڭىر باسشىسى.
18 جاسار بوكسشى وبلىس اكىمىنىڭ قولىنان 1 بولمەلى پاتەردىڭ كىلتىن الدى. بقو بوكس فەدەراتسياسىنىڭ پرەديدەنتى باۋىرجان كاريموۆ جاس سپورتشى مەن باپكەرى ساتتار سۇلتانعاليەۆكە 2 جانە 1 ملن تەڭگەنىڭ سەرتيفيكاتىن تابىس ەتتى.
