ءبىلىم جانە عىلىم مينيسترلىگىنىڭ مالىمدەۋىنشە, قازاقستاندىق كوللەدجدەر مەن جوعارى وقۋ ورىندارىنا وقۋعا ءتۇسۋ كەزىندە ءتورت جانە ودان دا كوپ كامەلەتكە تولماعان بالا تاربيەلەنەتىن وتباسىنان شىققان تالاپكەرلەرگە كۆوتا قاراستىرىلعان. سونداي-اق مۇنداي كۆوتا تولىق ەمەس وتباسىنان (كەمىندە 3 جىل وسى مارتەبەگە يە) جانە بالا كەزىنەن مۇگەدەك بالالاردى تاربيەلەپ وتىرعان وتباسىنان شىققان بالالارعا, ءى/ ءىى توپتاعى مۇگەدەكتەرگە بەرىلەدى.
جوعارى جانە جوعارى وقۋ ورنىنان كەيىنگى ءبىلىم بەرۋ دەپارتامەنتىنىڭ ديرەكتورى ادىلەت تويباەۆ: «جوعارى وقۋ ورىندارىنا ءتۇسۋ ءۇشىن كۆوتا ارقىلى كوپبالالى جانە تولىق ەمەس وتباسىلاردى مەملەكەتتىك قولداۋ – الەۋمەتتىك ماڭىزدى ماسەلە ءارى قاجەتتى شارا. كوپبالالى جانە تولىق ەمەس وتباسىنان شىققان بالالارعا بەرىلەتىن ءبىلىم بەرۋ ۇيىمدارىنا قابىلداۋ كۆوتاسى مەملەكەتتىك گرانتتى تاعايىنداۋ كونكۋرسىنا قاتىسۋعا مۇمكىندىك بەرەدى», دەدى.
ال كۆوتالار كولەمى قانداي؟ ءتورت جانە ودان دا كوپ كامەلەتكە تولماعان بالا تاربيەلەنەتىن وتباسىنان شىققان بالالار ءۇشىن كۆوتا گرانتتاردىڭ جالپى سانىنىڭ 5%-ىن, كەمىندە ءۇش جىل وسى مارتەبەگە يە تولىق ەمەس وتباسىلار قاتارىنداعى بالالارعا بەرىلەتىن كۆوتا 1%-ىن جانە بالا كەزىنەن مۇگەدەك بالالاردى تاربيەلەپ وتىرعان وتباسىلاردان شىققان بالالار جانە ءى/ىى توپتاعى مۇگەدەكتەر ءۇشىن قاراستىرىلعان كۆوتا 1%-ىن قۇرايدى.
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ بىرنەشە سانات بويىنشا 15-50 پايىزعا دەيىنگى جەڭىلدىكتەر قاراستىرىلعانىن ايتادى.
«پرەزيدەنت ق.توقاەۆتىڭ تاپسىرماسىمەن كوپ جىلدان بەرى بىلتىر جوعارى وقۋ ورىندارىنا تۇسكەن تالاپكەرلەرگە تاعايىندالاتىن ءبىلىم بەرۋ گرانتىنىڭ قۇنى 2,5 ەسەگە ارتتى. بۇل دەگەن نە؟ ۋنيۆەرسيتەتتەردىڭ بيۋدجەتى كوبەيدى دەگەن ءسوز. جوو-نىڭ قارجىسى مولايسا, ۋنيۆەرسيتەتتىڭ ساپاسىن, وقىتۋشىلاردىڭ جالاقىسىن ارتتىرۋعا, ستۋدەنتتەرگە جاعداي جاساۋعا مۇمكىندىك تۋادى. مىنە, وسى وڭ شەشىمدى كوپتەگەن جوو ءتيىمدى پايدالانا باستادى. ەلىمىزدەگى بارلىق ۋنيۆەرسيتەتتە الەۋمەتتىك از قامتىلعان وتباسىنان شىققان نەمەسە مۇمكىندىگى شەكتەۋلى ستۋدەنتتەرگە ءداستۇرلى تۇردە ءتۇرلى دەڭگەيلى كۆوتالار بولىنەدى. ەۋرازيا ۇلتتىق ۋنيۆەرسيتەتى تۇرعىسىنان ايتسام, بىرنەشە سانات بويىنشا 15-50 پايىزعا دەيىنگى جەڭىلدىكتەر قاراستىرىلعان. جەڭىلدىكتەرگە قول جەتكىزگەن ستۋدەنتتەردىڭ اراسىندا كوپبالالى وتباسىنان شىققان ستۋدەنتتەر دە بار. بۇل كورسەتكىش پەن قولداۋ جىل سايىن ارتىپ كەلەدى», دەدى ۇلتتىق ۋنيۆەرسيتەت رەكتورى.
ە.سىدىقوۆتىڭ ايتۋىنشا, ەۋرازيا ۇلتتىق ۋنيۆەرسيتەتىندە تومەندەتىلگەن وقۋ اقىسىمەن شامامەن 200-گە جۋىق ەۇۋ ستۋدەنتى وقيدى. مۇنداعى ستۋدەنتتەردىڭ 80-90%-عا جۋىعى مەملەكەتتىك گرانت ەسەبىنەن وقيدى. ولاردىڭ قاتارىندا (وسى وقۋ جىلىنداعى كورسەتكىش بويىنشا) الەۋمەتتىك ءالسىز توپتار ساناتىنا جاتاتىن 52 ستۋدەنت تە بار. «ل.ن.گۋميلەۆ اتىنداعى ەۇۋ-دىڭ ءبىلىم الۋشىلارىنا وقۋ اقىسىن تولەۋگە جەڭىلدىكتەر بەرۋ تۋرالى» ەرەجە ازىرلەنگەن كورىنەدى. سوعان سايكەس اقىلى بولىمدە ءبىلىم الاتىن ەرەكشە ساناتتاعى ستۋدەنتتەرگە وقۋ اقىسىن تولەۋدە جەڭىلدىكتەر قاراستىرىلعان. 2020-2021 وقۋ جىلىندا وقۋ قۇنىن: ارنايى قامقورلىقتاعى جەتىم جانە اتا-اناسىنىڭ قامقورلىعىنسىز قالعاندار 20; بالا كەزىنەن مۇگەدەك, مەديتسينالىق قورىتىندىعا ساي ءتيىستى ءبىلىم بەرۋ ۇيىمدارىندا وقۋعا قارسى كورسەتىلىمى جوق مۇمكىندىگى شەكتەۋلى ستۋدەنتتەر 30; اۋعانستانداعى اسكەري ءىس-قيمىل ارداگەرلەرى مەن قاتىسۋشىلارىنىڭ بالالارى, كامەلەتكە تولماعان ءتورت نەمەسە ودان دا كوپ بالا تاربيەلەنەتىن جانە از قامتىلعان, سونداي-اق ءبىر مەزگىلدە اقىلى نەگىزدە ءبىلىم الاتىن ءبىر وتباسىدان شىققاندار 15 پايىز جەڭىلدىكپەن تولەيدى.
