قازاقستان رەسپۋبليكاسىنىڭ مەملەكەتتىك رامىزدەرى – ەلتاڭبا, تۋ جانە گيمن كۇنى قارساڭىندا ەلوردادا پاتريوتيزم رۋحىن نىعايتۋعا, مەملەكەتتىك رامىزدەردى قۇرمەتتەۋدى ناسيحاتتاۋعا باعىتتالعان بىرقاتار يميدجدىك ءىس-شارالار جوسپارلانعان. ولاردىڭ بارلىعى «مەن قازاقستاننىڭ پاتريوتىمىن!» ۇرانىمەن وتەدى.
ءىس-شارالاردىڭ اراسىندا قر مەملەكەتتىك ءانۇرانىن ءبىر مەزگىلدە ورىنداۋ, اقپاراتتىق ساعاتتار, دوڭگەلەك ۇستەلدەر, كونفەرەنتسيالار, دارىستەر, سەمينارلار, كىتاپ كورمەلەرى, جاس مەملەكەتتىك قىزمەتشىلەردىڭ انت قابىلداۋى سەكىلدى جيىندار بار. 100-دەن استام ءتۇرلى ءىس-شارا سانيتارلىق-ەپيدەميولوگيالىق نورمالاردى ساقتاي وتىرىپ وتكىزىلمەك.
2021 جىلدىڭ 2 ماۋسىمىنان باستاپ «مەنىڭ رامىزدەرىم – مەنىڭ ماقتانىشىم!» پاتريوتتىق چەللەندج-اكتسياسى وتەدى. ونى قولداۋعا ەلوردا تۇرعىندارى مەن قوناقتارى شاقىرىلادى. Facebook جانە Instagram جەلىسىندە مەملەكەتتىك رامىزدەرمەن بايلانىستى فوتو نەمەسە بەينەتۇسىرىلىمدەر, ءتۇرلى پوستتار #مەنىڭرامىزدەرىممەنىڭماقتانىشىم, #مەملەكەتتىكرامىزدەركۇنى, #مەنقازاقستاننىڭپاتريوتىمىن, #ياپاتريوتكازاحستانا حەشتەگتەرىن پايدالانا وتىرىپ جاريالانۋى قاجەت.
سونىمەن قاتار قوعامدىق ورىنداردا ورنالاستىرىلعان LED-ەكرانداردا, ءبىلىم بەرۋ, مادەنيەت, سپورت, مەديتسينا, سوو ۇيىمدارىندا جانە قوعامدىق كولىك مونيتورلارىندا مەملەكەتتىك رامىزدەر تۋرالى اۋديو جانە بەينەروليكتەر كورسەتىلەتىن بولادى.
4 ماۋسىم كۇنى ساعات 11:00-دە «اتامەكەن» «قازاقستان كارتاسى» ەتنو-مەموريالدىق كەشەنىنىڭ جانىندا قالا اكىمدىگىنىڭ جاستار ساياساتى ماسەلەلەرى باسقارماسىنىڭ ۇيىمداستىرۋىمەن جىل سايىنعى اۆتوشەرۋ باستالادى. قر مەملەكەتتىك تۋى بار 50 ماشينادان تۇراتىن اۆتوكەرۋەن ەلوردانىڭ باستى داڭعىلدارى مەن كوشەلەرىنەن – تاۋەلسىزدىك, تۇران, ماڭگىلىك ەل, ۇلى دالا, قابانباي باتىر, تۇركىستان سەكىلدى تۇستاردان 29 كم ءجۇرىپ وتەدى. اۆتوشەرۋ «وتان قورعاۋشىلار» مەموريالىنىڭ جانىنا كەلىپ توقتايدى.
سول كۇنى ساعات 15:00-دە مەرەكە قۇرمەتىنە نۇر-سۇلتان قالاسىنىڭ مەملەكەتتىك اكادەميالىق فيلارمونياسىنىڭ ارتىستەرى «استانا» كونتسەرت زالىندا كونتسەرت ۇيىمداستىرادى. كورەرمەندەر مايرا ءىلياسوۆا, التىناي جوراباەۆا, رۇستەم جۇگىنىسوۆ, گۇلنۇر ورازىمبەتوۆا, سۆەتلانا ايتباەۆا سىندى انشىلەردىڭ ورىنداۋىنداعى پاتريوتتىق شىعارمالاردى تىڭدايدى. ءىس-شاراعا كىرۋ «Ashyq» ءموبيلدى قوسىمشاسى ارقىلى جۇرگىزىلەدى.
مەملەكەتتىك رامىزدەر كۇنىنىڭ قۇرمەتىنە وراي ءارى پاتريوتتىعىن كورسەتۋ ءۇشىن ەلوردالىقتار ۇيلەرىنىڭ بالكوندارى مەن تەرەزەلەرىنە قازاقستان رەسپۋبليكاسىنىڭ مەملەكەتتىك تۋىن ىلە الادى.
