باس ءمۇفتي باستاعان دەلەگاتسيانى جىلى قابىلداعان شاhار باسشىسى كەزدەسۋ بارىسىندا قالا اۋماعىنداعى ءدىني احۋال ماسەلەلەرى, قايىرىمدىلىق باعىتىنداعى جۇمىستار, مەشىتتەر توڭىرەگىندە سۇحباتتاستى.
ايتا كەتسەك, بيىل قالا اكىمىنىڭ تىكەلەي قولداۋىمەن 75 مىڭ وتباسىعا قايىرىمدىلىق كومەك كورسەتىلدى جانە قمدب شىمكەنت قالاسى بويىنشا وكىلدىگىنىڭ قولداۋىمەن «رامازان قايىرىمدىلىق ايى» ءىس-شاراسى ءوتتى.
ءوز كەزەگىندە ەل مۇسىلماندارىنىڭ توراعاسى ناۋرىزباي قاجى تاعان ۇلى قالا اكىمىنە ريزاشىلىعىن ءبىلدىرىپ, قايىرىمدىلىق باعىتتاعى جۇمىستارىنا جوعارى باعا بەردى.
«شىمكەنت – ەلىمىزدەگى مەشىتتەردىڭ سانى جاعىنان الدىڭعى ورىندا. وسى مەشىتتەردىڭ ىسىنە جاردەم بەرىپ كەلە جاتقان ازاماتتارعا راحمەت. ءدىني باسقارما 7 جۇمىس باعىتىنان بولەك «زيرات پەن زيارات ادەبى», «اس بەرۋ مادەنيەتى» سىندى قۇجاتتاردى قابىلداعان ەدىك. وسى باعىتتا اتقارىپ جاتقان جۇمىستارىمىزعا قولداۋ بىلدىرگەنىڭىزگە العىس ايتامىن. ەل تاۋەلسىزدىگىنىڭ 30 جىلدىعى قارساڭىندا بىرنەشە جوبالارىمىز بار. ونى دا جەرگىلىكتى اكىمدىكتەرمەن بىرگە اتقارماقپىز. وزىڭىزگە رامازان ايىندا كورسەتكەن قولداۋىڭىزعا ەرەكشە ءىلتيپاتىمدى جەتكىزەمىن» - دەدى باس ءمۇفتي ەكىجاقتى كەزدەسۋدە.
سونداي-اق جۇزدەسۋ سوڭىندا باس ءمۇفتي ايماق باسشىسىنا «تاپسىرلەردىڭ تاڭداۋلىسى» كىتابىن سىيعا تارتتى.
بۇگىنگى تاڭدا شىمكەنت قالاسىندا 89 مەشىت قمدب-نا فيليال بولىپ تىركەلگەن. «شىمكەنت» مەدرەسە-كوللەدجىندە ەرلەر مەن قىزدار ءبولىمى قاتار جۇمىس ىستەيدى. سونداي-اق قمدب-عا قاراستى 1 «ىقىلاس» قاريلار دايىنداۋ ورتالىعىندا 70 شاكىرت, «Halifa Al-Nahaian Aqmeshiti» جەكە قايىرىمدىلىق مەكەمەسىندە 40 شاكىرت ونلاين ءتالىم الۋدا.
ەسكە سالايىق, بۇگىنگى كەزدەسۋگە قمدب اپپارات باسشىسى عىلىمبەك جادىگەر ۇلى, شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان جانە شىمكەنت قالاسىنىڭ باس يمامى باقداۋلەت ءابدراحمانوۆ قاتىستى.
سونداي-اق ءمۇفتي شىمكەنتتەگى رەسمي ساپارىن ورتالىق مەشىت جانىنداعى «ايەل-قىزدار» سەكتورى ۇيىمداستىرعان «رۋحاني تاربيە – كەمەل ادام» سالت-ءداستۇر شاراسىمەن جالعاستىردى.
رۋحاني باستاما بارىسىندا ناۋرىزباي قاجى تاعان ۇلى «ايەل-قىزدار» سەكتورىنىڭ جانە «اجەلەر» مەكتەبىنىڭ مۇشەلەرىنە ءوز ريزالىعىن ءبىلدىرىپ, ءتالىم-تاربيە, يحسان ءىلىمى, قىز تاربيەسى – ۇلت تاربيەسى ەكەندىگىن ايرىقشا اتاپ ءوتتى.
سونداي-اق, ۇيىمداستىرىلعان شارا بارىسىندا باس ءمۇفتي جۋىردا عانا دۇنيە ەسىگىن اشقان ءسابيدىڭ قۇلاعىنا ازان ايتىپ, دانيار دەپ ەسىمىن قويىپ بەردى. ودان بولەك اق جاۋلىقتى اجەلەرىمىز ۇمىت بولعان كونە ءداستۇر مەن باعزىدان كەلە جاتقان عۇرىپتى قايتا جاڭعىرتۋ ماقساتىندا ءجۇن ءتۇتۋ, كەلى ءتۇيۋ, ۇرشىق ءيىرۋ ونەرىن ورتاعا سالدى.
رۋحاني ءھام يگى شاراعا قمدب اپپارات باسشىسى عىلىمبەك جادىگەر ۇلى, اقپارات جانە قوعاممەن بايلانىس ءبولىمىنىڭ مەڭگەرۋشىسى مارات دالەلحان ۇلى, قمدب-نىڭ «زەكەت جانە قايىرىمدىلىق» قورىنىڭ ديرەكتورى تالعات وماروۆ, شىمكەنت قالاسىنىڭ باس يمامى باقداۋلەت ابدراحمانوۆ, ءدىن سالاسىندا ۇزاق جىلدار ەڭبەك ەتىپ كەلە جاتقان بەكايدار امىرە, مۇحامەدجان ەستەمىروۆ سىندى بىرقاتار ءدىن قىزمەتكەرلەرى قاتىستى.
بۇدان بولەك ول رەسپۋبليكالىق «ەل ۇلەسى – پاتەرگە» اكتسياسىمەن ءتورت يمامعا باسپانا كىلتىن تابىس ەتتى.
ساۋاپتى شارا بارىسىندا باس ءمۇفتي قۇتتىقتاۋ ءسوز الىپ, بۇگىندە اسىل ءدىنىمىزدىڭ وركەندەۋىنە ۇلەس قوسىپ جۇرگەن, الايدا باسپاناعا مۇقتاج مەشىت قىزمەتكەرلەرىنە پاتەر كىلتتەرىن تابىس ەتتى. ونىڭ ۇشەۋى قىزمەتتىك ءۇي بولسا, بىرەۋ جەكە ءۇي رەتىندە بەرىلدى.
باسپانا كىلتىن العاندار قاتارىندا شىمكەنت قالاسى «ايتباي اتا» مەشىتىنىڭ ازانشىسى ءىلياس بەكجان, «اتامەكەن» مەشىتىنىڭ يمامى داۋلەت تۇلەنوۆ, ء«تاجىباي اتا» مەشىتىنىڭ يمامى ەركەبۇلان سەرىكباەۆ جانە «ۇسەنبەك اتا» مەشىتىنىڭ يمامى مۇستافا باۋىرجان ۇلى بار.
ايتا كەتسەك, قونىس توي شاراسىندا شىمكەنت قالاسى ءدىن ىستەر باسقارماسىنىڭ باسشىسى ءالجان تۇياقباەۆ, قمدب اپپارات باسشىسى عىلىمبەك جادىگەر ۇلى, اقپارات جانە قوعاممەن بايلانىس ءبولىمىنىڭ مەڭگەرۋشىسى مارات دالەلحان ۇلى, قمدب-نىڭ «زەكەت جانە قايىرىمدىلىق» قورىنىڭ ديرەكتورى تالعات وماروۆ بولدى.
ەسكە سالا كەتەيىك, رەسپۋبليكالىق «ەل ۇلەسى – پاتەرگە» قايىرىمدىلىق اكتسياسىمەن 405, 406, 407 جانە 412-ءۇي بەرىلدى.
