ونىڭ ايتۋىنشا, ەرەسەكتەرگە قاراعاندا بالالار كوروناۆيرۋستىق ينفەكتسيامەن از اۋىرادى. ولاردىڭ كلينيكالىق بەلگىلەرى از جانە اۋرۋحاناعا جاتقىزۋ جاعدايلارى سيرەك كەزدەسەدى. جالپى, ولار كوپ جاعدايدا سيمپتومسىز جانە جەڭىل تۇردە اۋىرادى, دەگەنمەن اۋىر وتەتىن دە جاعدايلار بولادى.
«2021 جىلدىڭ قاڭتار ايىنان باستاپ قازاقستاندا COVID-19 دياگنوزى راستالعان 16 245 بالا تىركەلگەن, ونىڭ ىشىندە 34-ءى جاڭا تۋعان نارەستە. 80% جازىلىپ شىقتى. بالالاردىڭ 90%-ىندا اۋرۋ سيمپتومسىز نەمەسە جەڭىل تۇردە ءوتتى. بالالاردىڭ 10% – ورتاشا دارەجەدە جانە 0,1% - اۋىر دارەجەدە بولدى. COVID-19 جۇقتىرعانداردىڭ ىشىندە تەك 58 بالاعا ۆيرۋستىق پنەۆمونيا دياگنوزى قويىلدى. ازىرگە بالالارعا ەكپە جاسالمايدى جانە COVID-19 الدىن الۋ ءۇشىن ارنايى دارىلىك زاتتار جوق, سوندىقتان ولاردى قورعاۋدىڭ ماڭىزدى قۇرالى بىرقاتار ەپيدەمياعا قارسى شارالاردى ساقتاۋ بولىپ قالا بەرەدى. بالانى جوتەلۋ نەمەسە تۇشكىرۋ كەزىندە اۋزى مەن مۇرنىن مايلىقپەن جابۋعا, قولدى دۇرىس جانە ءجيى جۋعا, اۋىزعا, مۇرىنعا, كوزگە قول تيگىزبەۋگە ۇيرەتۋ كەرەك. ىندەتتى جۇقتىرۋ قاۋپىن ازايتۋ ءۇشىن قوعامدىق كولىكتى پايدالانۋدى جانە ادامدار كوپ جينالاتىن جەرلەرگە بارۋدى شەكتەۋ كەرەك, مۇمكىندىگىنشە, ماسكا تاعىپ ءجۇرۋ كەرەك», دەپ كەڭەس بەردى ساراپشى.
ال ۇيدە بالالار ويىنشىقتارىن ۇنەمى وڭدەپ, تەڭدەستىرىلگەن تاماقتانۋ, فيزيكالىق بەلسەندىلىك, جۇيەلى مەديتسينالىق باقىلاۋ جانە جاعىمدى ەموتسيالار ارقىلى يممۋنيتەتتى قولداۋ كەرەك.
