الەۋمەتتىك جەلىنى شارلاپ كەتكەن ماڭعىستاۋ وبلىسىنداعى بەينەۋ اۋىلى جاستارىنىڭ توبەلەسى ءدال 25 مامىر كۇنى بولعان. ومىرلەرىندەگى ايتۋلى كۇندى وسىنداي تارتىپسىزدىكپەن تامامداعان تۇلەكتەر اۋىلداعى ج.قالدىعاراەۆ پەن ى.التىنسارين اتىنداعى مەكتەپتەردىڭ وقۋشىلارى بولىپ شىقتى. بىلەتىن جۇرت بۇل بەينەۋ اۋىلىنداعى ەكى مەكتەپ جەتكىنشەكتەرىنىڭ اراسىنداعى العاشقى قاقتىعىس ەمەستىگىن ايتىپ جاتىر. جاپپاي توبەلەسكە 40-قا جۋىق وقۋشى قاتىسقان. ابىروي بولعاندا, توبەلەس كەزىندە ەشكىم زارداپ شەكپەگەن. مەرەكەنىڭ شىرقىن بۇزعان توبەلەسقۇمارلاردىڭ 7-ءۋى ۇستالىپ, ءمان-جايدى انىقتاۋ ءۇشىن پوليتسيا بولىمىنە جەتكىزىلگەن. بەينەۋ اۋداندىق پوليتسيا ءبولىمى وسى وقيعاعا قاتىستى قىلمىستىق كودەكستىڭ 293-بابى «بۇزاقىلىق» بويىنشا ءىس قوزعادى.
سوڭعى قوڭىراۋ كۇنى اپەرباقاندىعىمەن اقتاۋلىق وقۋشىلار دا ەرەكشە كوزگە ءتۇستى. مەكتەپ بىتىرگەندەرىن وزدەرىنشە اتاپ وتكەن ولار كولىكتەرىمەن دريفت جاساپ, كوڭىل كوتەرگەن. قالاداعى اۆتوتۇراقتاردىڭ بىرىندە كولىكتەرىن «ويناقشىتىپ», جوعارى جىلدامدىقتا كەلە جاتىپ كىلت بۇرىلا سىرعاناتقان جەتكىنشەكتەر دە جازاسىز قالمادى. اقتاۋ قالالىق پوليتسيا باسقارماسى پاترۋلدىك پوليتسيا باتالونىنىڭ قىزمەتكەرلەرى جەلىككەن جاس جۇرگىزۋشىنىڭ جەكە باسىن انىقتاپ, وعان اكىمشىلىك قۇقىق بۇزۋشىلىق تۋرالى كودەكستىڭ 505 جانە 593-باپتارى بويىنشا حاتتاما تولتىردى.
ماڭعىستاۋ وبلىسى پوليتسيا دەپارتامەنتىنىڭ باستىعى جاناربەك باقتىباەۆ سوڭعى قوڭىراۋ مەرەكەسىنە بايلانىستى جەكە قۇرامنىڭ سول كۇنى كۇشەيتىلگەن رەجىمدە جۇمىس ىستەگەنىن مالىمدەدى. سول كۇنى قوعامدىق ءتارتىپتى ساقتاۋعا 500-دەن استام قىزمەتكەر جۇمىلدىرىلعان. ايماقتىڭ ءتارتىپ ساقشىلارى قۇقىق بۇزعان كامەلەتكە تولماعان جەتكىنشەكتەر ءۇشىن دە جاۋاپكەرشىلىك قاراستىرىلعانىن ەسكەرتىپ, اتا-انالاردى بالالارىن قاتاڭ قاداعالاۋعا شاقىرعان ەدى.
پوليتسيا دەپارتامەنتى ءباسپاسوز قىزمەتىنىڭ حابارلاۋىنشا, ماڭعىستاۋ وبلىسى قۇقىق قورعاۋ ورگاندارىنىڭ قىزمەتكەرلەرى وقۋ جىلىنىڭ اياقتالۋىنا ارنالعان مەرەكەلىك ءىس-شارالاردىڭ قاۋىپسىزدىگىن ارتتىرۋ ءۇشىن قوسىمشا شارالاردى قولعا العان. 25 مامىردا ءوڭىردىڭ ءبىلىم بەرۋ مەكەمەلەرىنىڭ بارلىعىندا سالتاناتتى جيىندار ءوتتى. كۇشەيتىلگەن جۇمىس ناتيجەلەرى بويىنشا پوليتسيا قىزمەتكەرلەرى اكىمشىلىك كودەكستىڭ بىرنەشە بابى بويىنشا كوپتەگەن بۇزۋشىلىقتاردى انىقتاپ وتىر.
سوڭعى قوڭىراۋدىڭ «سالتاناتىن قىزدىرعان» تاعى ءبىر توپ الماتى – بىشكەك كۇرە جولىندا انىقتالدى. ءتورت كولىكپەن جۇيتكىگەن جاستار جول ەرەجەسىن بىرنەشە رەت ورەسكەل بۇزعانى ءۇشىن جاۋاپقا تارتىلىپ وتىر. كولىكتەردىڭ بارلىعى ايىپ تۇراعىنا جەتكىزىلىپ, جاستارى 17 مەن 22-لەردەگى «تويشىل» توپتىڭ ءىس-ارەكەتتەرىنە قاتىستى بىردەن 15 اكىمشىلىك حاتتاما تولتىرىلعان. حالىقارالىق ماڭىزداعى جولدا مەملەكەتتىك ءنومىرى جوق «تەمىر تۇلپارلارمەن» ويناق سالعان جاستاردىڭ قاتتى جىلدامدىقتا كەلە جاتقان كولىك تەرەزەلەرىنەن بەلۋارىنا دەيىن سىرتقا شىعىپ الىپ, الاۋلاتىپ-جالاۋلاتىپ جۇيتكىگەن بەينەجازباسى بىردەن پوليتسيا قىزمەتكەرلەرىنىڭ نازارىنا تۇسكەن. جازبانى جان-جاقتى ساراپتاعان ءتارتىپ ساقشىلارى جەلىك قۋعان جەتكىنشەكتەردىڭ بارلىعى سوڭعى قوڭىراۋدىڭ سوڭىن جىن-ويناققا اينالدىرىپ جىبەرگەن الماتى وبلىسىنا قاراستى جامبىل اۋدانىنىڭ تۋمالارى ەكەنىن انىقتاپ وتىر. ەندى وسى داراقىلىقتارى ءۇشىن داڭعوي جەتكىنشەكتەردىڭ اتا-انالارى ايىپپۇل تولەۋگە مىندەتتى.
