اكىمىن ءوزى تاڭداعان اۋىل

بۇل وقيعا وسىدان ەكى جىل بۇرىن بولدى. كەڭتۇبەك اۋىلىنىڭ تۇرعىندارى اكىم ەتىپ وزدەرى ۇسىنعان ادامدى سايلاعىلارى كەلەتىنىن، ال اۋدان اكىمى تاراپىنان ۇسىنىلعان كانديداتۋراعا كوڭىلدەرى تولمايتىنىن جەتكىزىپ، بىزگە حات جازعان ەدى.

ماسەلەنىڭ مانىسىنە كەلسەك، 2019 جىلدىڭ تامىز ايىنان باستاپ جەلتوقسان ايىنا دەيىن كەڭتۇبەك اۋىلىندا اكىم بولماعان. سوندىقتان، اۋداندىق اۋماقتىق سايلاۋ كوميسسياسى قىزمەتىنەن شىعىپ قالعان اكىمنىڭ ورنىنا كەزەكتەن تىس سايلاۋ وتكىزۋدى ۇيعارادى. سايلاۋ كۇنى قاراشانىڭ 13-ىنە بەلگىلەنگەن. بىراق سايلاۋ ۋاقىتى كەيىنگە قالدىرىلعان. سەبەبى اۋداندىق اكىمدىك ۇسىنعان اكىمنىڭ كانديداتۋراسىن اۋىلدىقتار قولداماي، وزدەرى سۇراپ وتىرعان، اۋىلدان شىققان ادامدى سايلاۋعا قاتىستىرۋدى سۇراعان.

ء سويتىپ سايلاۋ قاراشانىڭ 27-ءى كۇنى ءوتتى، اۋداندىق ءماسليحاتتىڭ 11 دەپۋتاتىنىڭ 9-ى قاتىسىپ، 6-ى داۋىس بەردى، 3-ءى قالىس قالدى. اۋدان اكىمىنىڭ وكىمى 7 جەلتوقساندا شىقتى. اۋىل اكىمى بولىپ، تۇرعىندار ءبىراۋىزدان قولداعان سەرىك باقاۋوۆ سايلاندى.

– اۋىلعا اكىم بولۋ تۋرالى اۋدان اكىمدىگى تاراپىنان ماعان ۇسىنىس بولعان جوق. اۋىل تۇرعاندارى، اقساقالدار بار – ءبارى ماعان سەنىم ارتىپ، ءوز اۋىلىڭ، وسكەن جەرىڭ – اۋىلعا اكىم بول دەپ ءوتىنىش ءبىلدىردى، – دەدى سەرىك بەكەن ۇلى.

 بۇل ورايدا ايتا كەتەتىن جايت – سەرىك باقاۋوۆتىڭ وبلىستىڭ بۇرىنعى اكىمىمەن تەگى ۇقساس بولعانىمەن، تۋىستىق ەشقانداي قاتىسى جوق. ول 1969 جىلى 27 مامىردا بۇرىنعى جالتىر، قازىرگى كەڭتۇبەك اۋىلىندا دۇنيەگە كەلگەن. 1986 جىلى ەڭبەك جولىن شوپاندىقتان باستاعان. اسكەر قاتارىندا بورىشىن وتەگەن سوڭ، 1995 جىلى سەمەي زووۆەتەرينارلىق ينستيتۋتىن بىتىرگەن. ينستيتۋتتان سوڭ ءوزى وسكەن ماي اۋدانىنا ورالىپ، اۋداندىق ۆەتەرينارلىق ستانسادا، اۋداندىق ۆەتەرينارلىق كوميتەتتىڭ ءبولىم مەڭگەرۋشىسى، اۋماقتىق ينسپەكتسيانىڭ باس مامانى، مال دارىگەرى ينسپەكتورى قىزمەتتەرىن اتقارعان. 2008-2010 جىلدارى اۋدانداعى مالايسارى اۋىلىنىڭ اكىمى، 2010-2014 جىلدارى اۋداندىق كاسىپكەرلىك جانە اۋىل شارۋاشىلىعى ءبولىمىنىڭ باسشىسى، «اكجار – ءوندىرىس» اگروفيرماسىنىڭ ديرەكتورى، اۋداندىق ءماسليحات اپپاراتى ءبولىمىنىڭ مەڭگەرۋشىسى قىزمەتتەرىن اتقارعان.

جۋىردا ءبىز كەڭتۇبەك اۋىلىنا بارىپ قايتتىق.

– سەرىك بەكەن ۇلىنىڭ قىزمەتىنە كوڭىلىمىز تولادى. اۋىلعا قاراستى ەكى بولىمشەنى دە ارالاپ تۇرادى. ءار ماسەلەنى بىرلەسىپ قاراستىرىپ كەلەمىز. ءوزىمىز ءبىراۋىزدان ۇسىنىپ، سايلاپ العان اكىمگە ارقاشان قولداۋ كورسەتۋگە دايىنبىز. بىزگە اۋىلدىڭ ساقتالعانى، جوندەلىپ، دۇرىستالعانى كەرەك، – دەيدى اۋىل اقساقالى سابەت مايقىباەۆ. كاسىپكەر ەرمەك سىزدىقباەۆ، تەمىرۇزاق سابىر ۇلى دا وزدەرى سايلاعان اكىممەن بىرلەسە جۇمىس ىستەيتىندەرىن ايتىپ، وعان سەنىم ءبىلدىردى.

– اۋىل اكىمىن سايلاۋ دەموكراتيالىق وزگەرىسكە جول اشادى. ارينە، تۇرعىندار وزدەرى جاقسى بىلەتىن ادامدى سايلايدى عوي. ءبىز سولاي جاسادىق. كەرەك ساتىندە قولداپ، كەز كەلگەن ۋاقىتتا ارىز-شاعىمدارىن دا ايتا الادى. ويتكەنى، سەرىك بەكەن ۇلى ءبىزدىڭ اۋىلدىڭ ەرەكشەلىگى مەن بۇكىل احۋالىنان حاباردار، تۇرعىنداردىڭ جاعدايىن جاقسى بىلەدى، ال تۇرعىنداردان تۇسەتىن ارىزداردىڭ باسىم بولىگى الەۋمەتتىك سالاعا، كومەككە قاتىستى، –دەيدى ەرمەك سىزدىقباەۆ.

– اۋىلعا مەدپۋنكت قاجەت، اۋدان ورتالىعى كوكتوبە مەن اۋىل اراسىنداعى ءۇش شاقىرىمداي جەردە تۇرعىندار اۋرۋحاناعا جاياۋلاپ بارادى. وسىنى وبلىستىق دەنساۋلىق ساقتاۋ باسقارماسىنىڭ باسشىسىنا جەتكىزسەڭىز ەكەن، بۇل ماسەلەنى شەشۋ وسى باسشىنىڭ قۇزىرىندا ەكەن، – دەدى تەمىرۇزاق ساپار ۇلى.

جالپى، كەڭتۇبەك اۋىلىندا ەكى شاعىن بولىمشەنى قوسقاندا، بارلىعى ءبىر مىڭعا جۋىق ادام تۇرادى. بىلتىر 24 وتباسى وڭتۇستىك وڭىرلەردەن كوشىپ كەلسە، بيىل قىتايدان 4 وتباسى قونىس اۋدارىپ كەلمەكشى. اۋىل مەكتەبىندە 147 وقۋشى ءبىلىم الىپ ءجۇر.

– قازىر ەلىمىزدە قابىلدانعان مەملەكەتتىك باعدارلامالار جونىندە تۇرعىندار اراسىندا ءتۇسىندىرۋ جۇمىسىن جۇرگىزۋ اسا قاجەت. وسى ارقىلى شاعىن جانە ورتا بيزنەستى دامىتۋعا مۇمكىندىك بار. مەكتەپ ىشىنەن قىزىعۋشىلىق بىلدىرگەن تۇرعىنداردىڭ كومپيۋتەرلىك ساۋاتىن اشىپ، ارقايسىسىنا «ەلەكتروندى ۇكىمەت» باعدارلاماسى بويىنشا كابينەت دايىنداتۋ قاجەت. اۋىلشارۋاشىلىق جەرلەرىن ماقساتسىز پايدالاناتىن جانە مۇلدە پايدالانبايتىن جەر تەلىمدەرىن مەملەكەت قورىنا قايتارۋ، اۋىلدى اباتتاندىرۋ، كوشەلەردى جارىقتاندىرۋ، اۋىل ىشىندەگى كوشەلەردى جوندەۋ، اۋىزسۋمەن قامتاماسىز ەتۋ، مالدى بىردەيلەندىرۋ جانە ۆەتەرينارلىق قاۋىپسىزدىك ءىس-شارالارىن وتكىزۋ، كۇل-قوقىس پوليگونىن رەتكە كەلتىرۋ سەكىلدى الدىمىزدا كوپتەگەن جۇمىس كۇتىپ تۇر، – دەيدى سەرىك بەكەن ۇلى.

كەڭتۇبەكتە بيىل 300 ءتۇپ اعاش ەگىلىپتى. قازىر كۇندەلىكتى سۋارۋ، تازالاۋ، اعارتۋ جۇمىستارىن اۋىل بەلسەندىلەرى بىرلەسە اتقارۋ ۇستىندە.

– پرەزيدەنتىمىز قاسىم-جومارت توقاەۆتىڭ اۋىل اكىمدەرىن تىكەلەي سايلاۋ تۋرالى باستاماسى وتە دۇرىس شەشىم. بۇل تۇرعىنداردىڭ ەلىمىزدەگى ساياسي احۋالعا بەلسەنە ارالاسىپ، مەملەكەتتىڭ دامۋىنا ۇلەس قوسۋىنا سەپتىگىن تيگىزەتىنى ءسوزسىز، – دەدى سەرىك بەكەن ۇلى.

اۋىل اكىمىن تۇرعىنداردىڭ وزدەرى تىكەلەي داۋىس بەرۋ ارقىلى سايلاۋدىڭ دۇرىستىعىنا كەڭتۇبەك اۋىلىنىڭ مىسالى ارقىلى كوز جەتكىزگەندەي بولدىق.

پاۆلودار وبلىسى،

ماي اۋدانى