بۇرىنعى سارى قۇرلىق باسەكەلەرىندە كەي سالماقتاعى بوكسشىلار شيرەك فينال, جارتىلاي فينال باسەكەلەرىنە دەيىن جەتىپ سۇرىنەتىن بولسا, بيىلعى بىرىنشىلىكتە ء«ا» دەگەننەن-اق ەكى جەرلەسىمىز العاشقى جەكپە-جەكتەرىندە قارسىلاستارىنان جەڭىلىپ قالدى. ونىڭ سەبەبى دە جوق ەمەس.
ماسەلەن, جارىستىڭ العاشقى كۇنىندە قارسىلاستارىنان جەڭىلىپ قالعان ەكى جەرلەسىمىز بيىلعى ازيا چەمپيوناتىنا وزدەرىنىڭ ادەتتەگى سالماعىندا ەمەس, ءبىر ساتى جوعارى سالماقتا جۇدىرىقتاستى. اتاپ ايتار بولساق, بىلتىر ەل چەمپيوناتىندا 52 كيلودا توپ جارعان سابىرحان ماحمۇت سارى قۇرلىق باسەكەسىنە 56 كيلودا باردى. ال توكيو وليمپياداسىنا 57 كيلو سالماقتا جولداما جەڭىپ العان سەرىك تەمىرجانوۆ دۋباي شارشى الاڭىندا 60 كيلودا ونەر كورسەتتى.
سابىرحان العاشقى اينالىمدا ءۇندىستان وكىلى موحامماد حۋسسام ۋددينمەن كەزدەستى. ەكى بوكسشى رينگكە كوتەرىلگەن ساتتە-اق موحاممادتىڭ وتانداسىمىزدان اجەپتاۋىر ءىرى ەكەنى, ال ماحمۇتتىڭ دەنە ءبىتىمى 56 كيلوعا ساي كەلمەيتىنى بىردەن بايقالدى. ونىڭ ۇستىنە ءۇندى بوكسشىسىنىڭ بويى دا, قولى دا سابىرحانعا قاراعاندا ۇزىن ەدى. بۇل – بوكستا ۇلكەن ءرول اتقاراتىنىن جانكۇيەرلەر جاقسى بىلەدى. وتانداسىمىز ءوزىنىڭ وتە شاپشاڭ قيمىلدايتىنىنىڭ ارقاسىندا ۇندىستاندىق بوكسشىنىڭ ءبىراز سوققىسىن وزىنە دارىتقان جوق. دەگەنمەن جەڭىل سالماقتىڭ وكىلى بولعان سوڭ موحامماد سابىرحاننىڭ سوققىلارىن شىبىن شاققان قۇرلى كورمەدى. ءسويتىپ ءۇش راۋند بويى بەلسەندى قيمىلداپ, بىراق ءدوپ سوققىلارىنىڭ ازدىعىنا بايلانىستى جەرلەسىمىز ءوزىنىڭ العاشقى ازيا چەمپيوناتىن ءبىرىنشى اينالىمنان اياقتاۋعا ءماجبۇر بولدى. قورىتىندى ەسەپ – 5:0, جەڭىس ۇندىستاندىق سپورتشىعا بەرىلدى.
ال سەرىك تەمىرجانوۆ توكيو وليمپياداسىندا 63 كيلودا باق سىنايتىن يراندىق دانيال شاحباحشىدان تەڭ دارەجەدە وتكەن جەكپە-جەكتە 2:3 ەسەبىمەن جەڭىلىپ قالدى. تەمىرجانوۆتىڭ دا بۇل سالماقتا «بوتەن» ەكەنى بىردەن بايقالدى.
وليمپيا ويىندارىندا 63 كيلودا ەل نامىسىن قورعايتىن قۇرامانىڭ ەڭ تاجىريبەلى ءارى ەگدە جاستاعى بوكسشىسى زاكىر سافيۋللين العاشقى اينالىمدا يران وكىلى اشكان رەزايدى قاپى قالدىرىپ, جارىستى ءساتتى باستاعانىمەن, شيرەك فينالدا ازيا قۇرلىعىنىڭ ەكىنشى ءنومىرلى بوكسشىسى موڭعوليالىق چينزوريگ بااتارسۋحتەن (1:4) ۇتىلىپ قالدى. وتانداسىمىزدىڭ بۇعان دەيىنگى جارىستارداعى سۇرەڭسىز ونەرى ونسىز دا جانكۇيەرلەر كوڭىلىنەن شىقپاي ءجۇر ەدى. ازيا چەمپيوناتىنداعى جەڭىلىس بۇل جاعدايدى ودان ءارى ۋشىقتىرىپ جىبەردى. ەندى زاكىر وليمپيا ويىندارىندا جۇلدەگە ىلىگىپ, جانكۇيەرلەردىڭ رەنىشىن جۋىپ-شايۋى كەرەك.
قالعان 7 سالماقتاعى وتانداستارىمىزدان دانيال ءسابيت (49 كگ), ءابىلحان امانقۇل (75 كگ) جانە ۆاسيلي لەۆيت (91 كگ) ازيا بىرىنشىلىگىن ءساتتى باستادى. ال ساكەن بيبوسىنوۆ (52 كگ), ابىلايحان ءجۇسىپوۆ (69 كگ), بەكزات نۇرداۋلەتوۆ (81 كگ), قۇراما كاپيتانى قامشىبەك قوڭقاباەۆ (+91 كگ) العاشقى جەكپە-جەكتەرىن كەشە كەشكىسىن وتكىزدى.
ەڭ جەڭىل سالماقتا ازيا چەمپيوناتىنا العاش رەت قاتىسىپ جاتقان دانيال ءسابيت ءبىرىنشى اينالىمدا يندونەزيا وكىلى كورنەليۋس كۆانگۋ لانگۋدى وتە سەنىمدى جەڭدى – 5:0. ءبىر جەكپە-جەكپەن جارتىلاي فينالعا شىققان ءسابيت كەم دەگەندە قولا جۇلدەنى ناقتىلاپ قويدى. وتانداسىمىز فينالعا شىعۋ ءۇشىن كۋۆەيتتىك قارسىلاسىن تەحنيكالىق نوكداۋنمەن جەڭگەن فيليپپيندىك مارك لەستەر دۋرانسپەن جۇدىرىقتاسادى.
75 كيلوداعى ءابىلحان امانقۇل جەكپە-جەكسىز كەلەسى اينالىمعا جولداما الدى. ول العاشقى ىرىكتەۋ كەزەڭىندە كۋۆەيتتىك سايد سالبراحانيمەن كەزدەسۋى كەرەك بولاتىن, الايدا قارسىلاسى شارشى الاڭعا شىعۋدان باس تارتتى. جەرلەسىمىز كەشە جارىستىڭ شيرەك فينالىندا 2019 جىلى تايلاندتا وتكەن ازيا چەمپيوناتىندا وتانداسىمىز تۇرسىنباي قۇلاحمەتتەن جەڭىلىپ, كۇمىس جۇلدەگەر اتانعان ۇندىستاندىق اشيش كۋمارمەن جارتىلاي فينال جولداماسىن ساراپقا سالدى.
91 كيلو سالماقتا جارىس ءفاۆوريتى سانالعان قازاقستاندىق ۆاسيلي لەۆيت شيرەك فينالدا يراندىق ەحسان ءرۋزباحانيدى 4:1 ۇپايىمەن جەڭىپ, جارتىلاي فينالعا جولداما الدى. بۇل – لەۆيتتىڭ ەنشىسىندە دە قولا جۇلدە بار دەگەن ءسوز. ءرۋزباحانيدىڭ ەسىمى قازاق جانكۇيەرلەرىنە جاقسى تانىس. 30 جاستاعى بوكسشى ءبىر جىلدارى WSB جوباسىندا باق سىناعان قازاقستاندىق «استانا ارلانس» كلۋبىندا جۇدىرىقتاسقان ەدى. سونداي-اق ول 2012 جىلعى لوندون وليمپياداسىنىڭ شيرەك فينالىندا ادىلبەك نيازىمبەتوۆتەن 13:10 ەسەبىمەن جەڭىلىپ, قولدا تۇرعان قولا جۇلدەدەن قاعىلعان بولاتىن.
