كەزدەسۋدە قازاقستاننىڭ تۇڭعىش پرەزيدەنتى مەملەكەتارالىق ديالوگتى نىعايتۋدىڭ ماڭىزدىلىعىنا توقتالدى. سونداي-اق ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ بولاشاعى, ونىڭ ازيا مەن بۇكىل دۇنيە جۇزىندەگى ىنتىماقتاستىق پەن قاۋىپسىزدىكتى نىعايتۋداعى ءرولى تۋرالى پىكىرىن ايتتى.
«1992 جىلى, ەلىمىز تاۋەلسىزدىك العاننان كەيىن ءبىر جىل وتكەن سوڭ مەن بىرىككەن ۇلتتار ۇيىمىنىڭ مىنبەرىنەن وسى كەڭەس تۋرالى يدەيامدى ايتتىم. العاشقى سامميت 2002 جىلى الماتىدا ءوتتى. ازياداعى ءوزارا ءىس-قيمىل جانە سەنىم شارالارى جونىندەگى كەڭەسكە باسقا ەلدەردىڭ قىزىعۋشىلىعى قازىر دە جوعارى. بيىل مينيسترلەر دەڭگەيىندەگى كەزدەسۋ وتەدى, ال كەلەر جىلى كەڭەستىڭ 30 جىلدىعىنا وراي VI ءسامميتتى وتكىزۋ جوسپارلانىپ وتىر. وسى وقيعالارعا ساپالى دايارلىقتى قامتاماسىز ەتۋ ماڭىزدى», دەدى ەلباسى.
ق.سارىباي نۇرسۇلتان نازارباەۆقا قازاقستاننىڭ ازياداعى ءوزارا ءىس-قيمىل جانە سەنىم شارالارى جونىندەگى كەڭەس توراعالىعىنداعى باسىمدىقتارى مەن باستامالارىن جۇزەگە اسىرۋ بويىنشا حاتشىلىقتىڭ اتقارىپ جاتقان جۇمىسى تۋرالى باياندادى. نەگىزگى باسىمدىقتاردىڭ ءبىرى رەتىندە كەڭەستى ازياداعى تولىققاندى وڭىرلىك قاۋىپسىزدىك ۇيىمىنا اينالدىرۋ پروتسەسى ايتىلدى.
اتقارۋشى ديرەكتور ق.سارىبايدىڭ ايتۋىنشا, قازىرگى تاڭدا ازياداعى ءوزارا ءىس-قيمىل جانە سەنىم شارالارى جونىندەگى كەڭەستى ايتارلىقتاي قۇرىلىمدىق وزگەرىسسىز جانە بارلىق ىرگەلى پرينتسيپتەرى مەن ماقساتتارىن ساقتاي وتىرىپ ۇيىمعا اينالدىرۋعا مۇمكىندىك بار.
ۇسىنىلعان اقپاراتتارعا سايكەس, ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ قايتا قۇرىلۋى وسى قۇرلىق اۋماعىنىڭ 90 پايىزعا جۋىعىن قامتيتىن 27 مۇشە مەملەكەت اراسىنداعى ىنتىماقتاستىقتى دامىتىپ قانا قويماي, ازيانىڭ جاھاندىق قاۋىپسىزدىكتى قامتاماسىز ەتۋدەگى ءرولىن كۇشەيتەدى. سوڭىندا نۇرسۇلتان نازارباەۆ ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ ودان ءارى دامۋىنا قولداۋىن ءبىلدىردى.
