«وزدەرىڭىز بىلەتىندەي, وتكەن 2020 جىل ءبىزدىڭ بۇقارالىق اقپارات قۇرالدارى ءۇشىن وتە قيىن جىل بولدى. جارنامالىق كىرىستەردىڭ شەكتەلۋىنە بايلانىستى باق ۇلكەن قارجىلىق قيىندىقتارعا تاپ بولدى. سوندىقتان ءبىرىنشى كەزەكتە ءبىز داعدارىستىڭ سالدارىن جويۋ بويىنشا جۇيەلى جۇمىسقا كىرىستىك. پرەزيدەنتتىڭ تاپسىرماسى بويىنشا جانە ۇكىمەتتىڭ قولداۋىمەن كوپتەگەن جەكە باق ءوز جۇمىسىن جالعاستىرۋعا مۇمكىندىك الدى», دەدى مينيستر.
قىسىلتاياڭ كەزەڭدە كوممەرتسيالىق باق سالىق تولەۋدەن جانە ەڭبەكاقى قورىنا سالىناتىن مىندەتتى اۋدارىمداردان بوساتىلعان.
2020 جىلعى 1 ءساۋىر مەن 1 قازان ارالىعىندا 67 كوممەرتسيالىق تەلەارنا مەن راديوارنا, 2020 جىلعى 1 شىلدە مەن 31 جەلتوقسان ارالىعىندا بالاما جانە ەفيرلىك تسيفرلىق تەلەراديو حابارلارىن تاراتۋ قىزمەتتەرىنە اقى تولەۋدەن بوساتىلعان.
«جالپى, 2020 جىلى مەملەكەتتىك اقپاراتتىق ساياساتتى ىسكە اسىرۋ 88 باق (11 تەلە جانە راديوارنا, 40 باسىلىم جانە 37 ينتەرنەت-رەسۋرس) ارقىلى تابىستى جۇزەگە اسىرىلدى. ولاردىڭ كۇشىمەن COVID-2019-عا قارسى ءىس-قيمىل جانە ينفەكتسيانى تارالماۋى جونىندەگى شارالاردى اقپاراتتىق ءتۇسىندىرۋ بويىنشا اۋقىمدى جۇمىس جۇرگىزىلدى. 250-دەن استام بەينەروليك شىعارىلدى. «ەل ارنا» جانە «بالاپان» تەلەارنالارىنىڭ ەفيرىندە «ونلاين ساباقتار» كورسەتىلىمى قامتاماسىز ەتىلدى. بۇل بالالارىمىزعا ينفەكتسيا جۇقتىرۋ قاۋىپىنسىز ۇزدىكسىز ءبىلىم الۋىنا مۇمكىندىك بەردى», دەدى ۆەدومستۆو باسشىسى.
