The Museum on Non-Visible Art مۇراجايى كەرەمەتكە تولى. نەگە دەسەڭىز, وندا وقىرماندى ەلەڭ ەتكىزەتىن, ويىڭدى سان-ساققا جۇگىرتەتىن قۇپيا دۇنيە كوپ. ونداعى تۋىندىلاردىڭ سىرىن ءتۇسىنۋ قانشالىقتى قيىن بولعانىمەن, كورەرمەندەردىڭ قاتارى سيرەگەن ەمەس. قايتا جىل سايىن نەشە ءتۇرلى وقيعا ورىن الىپ, ۇيىمداستىرۋشىلاردىڭ ءوزى قايران قالىپ جاتادى.
ماسەلەن, سۋرەتشى دجەيمس فرانكو «تازا اۋا» اتتى ءتۇسسىز كارتيناسىنا وقىرماندار وسىنشاما قىمبات باعا ۇسىنادى دەپ ەشكىم ويلاماعان. ءتىپتى, اۆتوردىڭ ءوزى دە اڭ-تاڭ. ونىڭ بار جۇمباعى كونتسەپتسيالىق ونەردى جاڭا بەلەسكە شىعارۋعا تىرىسقانى. جانە ونى وتە جوعارى دەڭگەيدە ورىنداپ شىققان.
كارتينامەن قوسا ايەلگە اۆتور جازعان شىعارمانىڭ سيپاتتاماسى جانە شەدەۆردىڭ شىنايىلىعىنا كەپىلدىك بەرەتىن بروشيۋرالار تابىستالعان. كورەرمەندەر شەبەردىڭ شىعارماشىلىعى تۋرالى ويلانۋدان الشاقتاماس ءۇشىن, بوياۋسىز كەسكىندەمەنى باسقا ونەر تۋىندىلارىنان بولەك, وڭاشا قابىرعاعا ورنالاستىرعان ءجون. ۇيگە كەلگەن قوناقتار الدىمەن وسى كارتينانى تاماشالاعانى دۇرىس, سەبەبى سۋرەتشىنىڭ پىكىرىنشە اتالعان تۋىندى مەيمانداردىڭ كوڭىل كۇيىن كوتەرەدى.
اۆتوردىڭ تازا اۋا تۋرالى سيپاتتاماسىندا: «تەك ءبىر عانا داناسى بار ەرەكشە تۋىندى. ءسىز ساتىپ العان ء«مولدىر اۋا» تاۋسىلمايتىن وتتەگى باللونىنا ۇقسايدى. قاي جەردە بولساڭىز دا, جەر بەتىندە پايدا بولاتىن ەڭ ءدامدى, تازا ءيىستى اۋامەن تىنىس الۋ مۇمكىندىگىڭىز بار. ءار تىنىس سىزگە شەكسىز جان تىنىشتىعى مەن دەنساۋلىق سىيلايدى. ءاردايىم بۇل شىعارما سىزگە تاۋ شىڭدارىنىڭ ءھام مۇحيتتىڭ جۇپار ءيىسىن سىيلايدى», دەپ جازىلعان ەكەن.
تانىمال «Huffington Post» باسىلىمىنا بەرگەن سۇحبا-
تىندا سۋرەتتىڭ ەندىگى يەسى ەيمي دەۆيدسون كورىنبەيتىن جانە قول تيگىزە المايتىن زاتتارعا نەگە سونشا قۇمار ەكەنىن بىلايشا تارقاتادى.
«جاڭا بۋىن ءارى بۇقارالىق اقپارات قۇرالدارىنىڭ وكىلى رەتىندە مەنى جوبانىڭ يدەولوگياسى شابىتتاندىردى. اسىرەسە, كورىنبەيتىن ونەر مۇراجايىنىڭ ۇرانى قاتتى ۇنايدى. ءبىز ارماندارىمىز جانە يدەيالارىمىزبەن الماسامىز. بۇل ءبىزدىڭ جاڭا ەكونوميكاداعى ۆاليۋتامىز», دەيدى ول.
ەمي دەۆيدسوننىڭ ايتۋىنشا, 2.0 تەحنولوگياسىنىڭ نەگىزىندە قۇرىلعان الەۋمەتتىك مەديا رەسۋرستار ادامداردىڭ ساناسىندا توڭكەرىس جاساۋمەن ەستە قالماق. قوعامداعى ۆيرتۋالدى قارىم-قاتىناستاردىڭ سالدارىنان ءبىزدىڭ ءومىرىمىز بىتپەيتىن جارناماعا اينالۋدا. شىنايى ونەر وزگەردى. ءبارى وڭاي ساتىلادى جانە ساتىپ الىنادى.
