جالپى, ءبىزدىڭ قوعامدا قوردالانعان ماسەلە كوپ قوي. دەگەنمەن, وسىناۋ الەۋمەتتىك جەلى الىپپەمىزگە اينالعان بەتالىسى بولەك زاماندا عالامتور ارقىلى ۇلت باسىنا تونگەن قاتەردەن كوبىرەك ساقتانۋىمىز كەرەك سياقتى. ەرتەڭگى بولاشاعىمىز – جاس ۇرپاقتىڭ ءتىلى تەلەديدارمەن شىعىپ, زەردەسى زياندى زاتتاردى كوبىرەك توقىپ جاتقانىنا كوز جۇمىپ قاراپ وتىرا بەرۋگە بولمايدى.
جالپى, جەلىگە جەڭىل-جەلپى قاراماعانىمىز دۇرىس. وسىنشاما دابىل قاعىپ, دابىرايتىپ ايتاتىن دا جاعداي ەمەس شىعار, الايدا بۇل تەك جاستاردىڭ جادىن ۋلاپ جاتقان جوق, جەلىنىڭ جەلىمىنە اعا بۋىننىڭ ءوزى دە اربالىپ قالعان. ارزان تىرلىكپەن اينالىسىپ, بالاسىمەن جارىسا تيك-توك ءتۇسىرىپ جۇرگەن اتا-انالار دا بار.
بۇل تاقىرىپقا قايدان سوقتىق دەگەندە, تۇنەۋ كۇنى اتا-اناسىنا پرانك جاساپ جەلىنى شۋلاتىپ جاتقان ەسسىز جاستاردىڭ ورىنسىز ءىس-ارەكەتتەرىن كەزدەيسوق كوزىمىز شالىپ قالدى. جاسى كەلىپ قالعان كارى اجەسىن تۋعان كۇنىمەن قۇتتىقتاي كەلگەن نەمەرەلەرى ۇلكەن شەشەلەرىنە ارنايى تورت ءپىسىرىپ, سول تورتتى جۇرتتى كۇلدىرۋ ءۇشىن بەيشارا كەيۋانانىڭ بەتىنە بىلش ەتكىزىپ جاپسىرا سالادى. نە بولعانىن ۇقپاي, جۇرەگى تاس توبەسىنە شىعىپ قورقىپ قالعان اجەلەرىنە جىرق-جىرق ەتكەن جاستار «اجە, بۇل پرانك» دەپ ىشەك-سىلەلەرى قاتا ك ۇلىسەدى.
پرانك دەگەنىڭىز, سويتسەك كۇلدىرەمىن دەپ ءبۇلدىرۋدىڭ ناعىز ۇلگىسى ەكەن. تۇسىنىكتى تىلمەن ايتقاندا, بىرەۋدى الداپ, ەرسى ارەكەتكە جىعاسىز, سول ارالىقتا ونى ۇيالى تەلەفونىڭىزعا ءتۇسىرىپ الىپ, جەلىگە جۇكتەيسىز. پرانكقا ءتۇسىپ قالعان بەيشارانىڭ ەموتسياسى جۇرتتىڭ كۇلۋىنە, قارالىمنىڭ ارتۋىنا عانا پايداسى بار ەكەن.
وزگەنى كەلەكە ەتۋ ارقىلى ءوزىنىڭ كونتەنتىن كۇشەيتىپ, قارالىمىن ارتتىراتىن ادامدى كىم دەۋگە بولادى؟ ارينە, قۇر قالجىڭ رەتىندە قۇرداسىڭمەن ازداپ ويناۋعا بولاتىن شىعار, الايدا جاسى كەلىپ قالعان, جۇرەكتەرى ناشار بەيشارا اتا-اناڭدى الداپ پرانك تۇسىرگەننەن ساعان كەلەر پايدا قانە؟ ءبىز ايتىپ وتىرعان جايتتار جالپى پرانكتىڭ بەر جاعى دەۋگە بولادى.
بەت-اۋىزىن قىزىل قانعا بوياپ, ءولىم اۋزىنان قالدىم دەپ وتىرىك بەينە ءتۇسىرىپ, اتا-اناسىن شوشىتۋشىلار كوبەيگەن. جۇكتى بوپ قالدىم دەپ اكەسىنە جازبا جولدايتىن دا پرانكتار بارىن بايقادىق. مەنى الىپ قاشتى دەپ اناسىن زار قاقساتقان بەينەجازبالار دا جۇرتتى دۇرلىكتىرىپ جىبەرگەن.
ورىنسىز ءازىلدىڭ ورعا جىعاتىنىن ۇمىتپاۋىمىز كەرەك.
قويعا قاسقىر شاپتى دەپ ىلعي وتىرىك ايتىپ, اۋىلعا اتتانداپ شاۋىپ كەلەتىن قويشى بالا تۋرالى ءاپسانا بار ەدى عوي. ەل ءبىر رەت الدانادى, ەكىنشى رەت الدانادى, ءۇشىنشى رەت شىنىمەن قويعا قاسقىر شاپقاندا اۋىل ونىڭ كەزەكتى وتىرىگى ەكەن دەپ ءسوزىن قۇلاقتارىنا دا ىلمەيدى. ءسويتىپ قانشاما قويدى قاسقىر قىرىپ كەتەدى.
مۇنىمەن ءبىز نە ايتقىمىز كەلەدى, ياعني ترەندتەن تۇسپەيىن دەپ تاتىمسىز تىرلىككە بوي سۋىتپايىق. ءازىلىم جاراسسا بولدى دەپ الەۋمەتتىك جەلىنىڭ اۋمەسەر جۇلدىزى بولۋ ءتۇبى جاقسىلىققا اپارمايدى. ويىننان وت شىقپاسىنا كىم كەپىل؟ جالپى, وسىلاي ازىلدەيمىن دەپ اكىمشىلىك جاۋاپكەرشىلىككە تارتىلىپ جاتقاندار دا جوق ەمەس. جەلىنى دۇرلىكتىرگەنى ءۇشىن جەتى جىلعا باس بوستاندىعىنان ايىرىلعان ازامات تۋرالى اقپارات وقىعانىمىز بار. پرانك دەگەنىڭ, قازاقشا ايتقاندا, پارىقسىزدىق دەگەنگە كەلەدى. جاقىنىڭنىڭ توبەسىنە جاي تۇسىرگەندەي ازىلدەپ, الەۋمەتتىڭ اۋلەكى تىرلىگىنە ءۇيىر بولۋدان ەش پايدا كورىنبەيدى. ودان دا سول ۋاقىتتى ءوزىڭدى رۋحاني دامىتۋعا, ءبىلىمىڭدى ارتتىرىپ ءتىل ۇيرەنۋگە ارناپ, دەنە شىنىقتىرۋمەن اينالىسۋ الدەقايدا پايدالى.
جەلىدە جەلدەي ەسكەن وسەككە سەنبەي, وزىڭە سەنگەنىڭ دۇرىس.
پاراقشاڭداعى لايكتىڭ سانى ارتقانمەن, پاراساتىڭدى تومەندەتەتىن مۇنداي پارىقسىزدىقتان نەعۇرلىم اۋلاق جۇرگەن ءجون. بۇگىنگى جاس ۇرپاقتى ءبىز بۇل پايداسىز پرانكتاردان شامامىز كەلگەنشە شەكتەگەنىمىز دۇرىس.
ارينە, ايشىلىق الىس جەرلەردەن جىلدام حابار العىزعان جەلىنىڭ جاقسى جاقتارى دا بار شىعار. الايدا اباي ايتقانداي, ىشپەك, جەمەك, كيمەك, كۇلمەك, كوڭىل كوتەرمەك – بۇل نارسەلەردىڭ ءبارىنىڭ دە ولشەۋى بار. ولشەۋىنەن اسىرسا, زيانى تيەدى.
