الەم بىرىنشىلىگىنىڭ ءتورتىنشى كۇنىندە ا توبىنىڭ ەكى ويىنى, ۆ توبىنىڭ ەكى كەزدەسۋى ءوتتى. ا توبىندا سلوۆاكيا جانە شۆەيتساريا قۇراماسىمەن بىرگە كوش باستاپ تۇرعان رەسەي حوككەيشىلەرى جەڭىستى جولىن جالعاستىرا المادى. سلوۆاكيامەن مۇزايدىندا جولىققان سولتۇستىكتەگى كورشىلەرىمىز 1:3 ەسەبىمەن جەڭىلىپ قالدى. ەكى قۇراما اراسىنداعى ماتچتىڭ العاشقى كەزەڭىندە ەسەپ اشىلمادى. ەكىنشى كەزەڭدە ەسەپتى ءبىرىنشى بولىپ سلوۆاكيا اشتى. 30-مينۋتتا شابۋىلشى ميلوش كەلەمەن مەرگەندىگىمەن كوزگە ءتۇسىپ, قۇراماسىن العا شىعارسا, رەسەي حوككەيشىلەرى بۇل گولعا جىلدام جاۋاپ بەردى. 31-مينۋتتا الەكساندر بارابانوۆ تارازى باسىن تەڭەستىرىپ كەتتى. ءۇشىنشى كەزەڭدە سلوۆاكيا قۇراماسى بەس مينۋتتىڭ ىشىندە ەكى شايبا سوعىپ, جەڭىستى قارسىلاستارىنان ج ۇلىپ الدى. 53-مينۋتتا مارتين گەرنات سان باسىمدىعىن ءتيىمدى پايدالانسا, 58-مينۋتتا مارەك ديالوگا بوس قاقپانى ءدال كوزدەدى.
وسىلايشا, ماڭىزدى ءۇش ۇپايىنان ايىرىلعان رەسەي قۇراماسى ءۇشىنشى تۋردان كەيىن تۋرنير كەستەسىندە ەكىنشى ورىنعا سىرعىدى. ال قاتارىنان ءۇش ماتچتا جەڭىسكە جەتكەن سلوۆاكيا 9 ۇپايمەن جەكە-دارا كوش باستادى.
سونىمەن قاتار وتكەن تۋردا شۆەتسيا قۇراماسىنان باسىم تۇسكەن بەلارۋس حوككەيشىلەرى بۇل جولى چەحيادان وۆەرتايمدا ۇتىلدى. كەزدەسۋدىڭ العاشقى كەزەڭىندە تەڭ ويناعان قۇرامالار ەكىنشى كەزەڭدە ءۇش شايبا سوقتى. 25-مينۋتتا بەلارۋس ويىنشىسى ەگور شارانگوۆيچ ەسەپ اشسا, كەزەڭ سوڭىنا دەيىن چەحيا قۇراماسى ەكى گول سوعىپ, ەسەپتە العا شىقتى. گول اۆتورلارى – يان كوۆارج پەن فيليپ زادينا. ءۇشىنشى كەزەڭدە ۆلاديسلاۆ ەرەمەنكو تارازى باسىن تەڭەستىرىپ, ويىن وۆەرتايمعا ۇلاستى. قوسىمشا ۋاقىتتا الەكساندر الەكسەەۆ مەرگەندىك تانىتىپ, چەحيا قۇراماسىنا الەم چەمپيوناتىنداعى العاشقى جەڭىستى سىيلادى. ەسەپ – 3:2.
ۆ توبىنداعى ويىندارعا توقتالار بولساق, يتاليا قۇراماسىن قابىلداعان لاتۆيا قارسىلاستارىنىڭ قاقپاسىنا جاۋاپسىز ءۇش شايبا سوعىپ, كەزەكتى جەڭىسىنە قول جەتكىزدى. بۇل ويىندا لاتۆيا قۇراماسى ساپىنان مارتينش كارسۋمس ەكى مارتە مەرگەندىگىمەن كوزگە تۇسسە, لاۋريس دارزينش ءۇشىنشى گولدىڭ اۆتورى اتاندى.
چەمپيوناتتى وتە ءساتسىز باستاعان ۇيەڭكى جاپىراقتار ەلىنىڭ حوككەيشىلەرى ءۇشىنشى تۋردا دا جەڭىلىستىڭ كەرمەك ءدامىن تاتۋعا ءماجبۇر بولدى. ەكى تۋردان بەرى قارسىلاستارىن قوعاداي جاپىرىپ كەلە جاتقان گەرمانيا ءۇشىنشى تۋردا كانادادان ايلاسىن اسىرىپ كەتتى. ەسەپ – 3:1. گەرمانيا بۇل جەڭىسىنەن كەيىن ۆ توبىنىڭ تۋرنير كەستەسىندە 9 ۇپايمەن كوش باستادى.
