وتاندىق جانە شەتەلدىك ماشينا جاساۋ كاسىپورىندارى باسشىلارىنىڭ كەزدەسۋى 25 مامىردا ماسكەۋدە وتكەن «مەتالل وڭدەۋ-2021» حالىقارالىق مامانداندىرىلعان كورمەسىندە ءوتتى.
قازاقستان ماشينا جاساۋشىلار وداعى ۇيىمداستىرعان «ەاەو شەڭبەرىندە ماشينا جاساۋدى دامىتۋ پەرسپەكتيۆالارى» اتتى دوڭگەلەك ۇستەل وتاندىق جانە شەتەلدىك ماشينا جاساۋ كاسىپورىندارى باسشىلارىنىڭ قاتىسۋىمەن ءوتتى. ءىس-شارا رەسەي-قازاقستان ىسكەرلىك كەڭەسى مەن رەسەي ماشينا جاساۋشىلار وداعىنىڭ قولداۋىمەن ءوتتى.
قازاقستاننىڭ رەسەيدەگى ساۋدا وكىلىنىڭ ورىنباسارى دامير ادىلبەكوۆ ءوز سوزىندە ەكى ەل ىنتىماقتاستىعىنىڭ الەۋەتى زور ەكەنىن اتاپ ءوتتى. ول ەلدەگى ينۆەستيتسيالىق كليماتقا ەرەكشە نازار اۋداردى جانە الەۋەتتى ينۆەستورلار ءۇشىن تارتىمدى جاعدايلار تۋرالى ايتتى.
ءوز كەزەگىندە, ەەك مەملەكەتتىك ساتىپ الۋ سالاسىنداعى باسەكەلەستىك ساياسات دەپارتامەنتىنىڭ مەملەكەتتىك ساتىپ الۋ ساياساتىن ىسكە اسىرۋ ءبولىمىنىڭ باستىعى ادىلبەك بەكتىباەۆ ەاەو مەملەكەتتىك ساتىپ الۋ ارقىلى ونەركاسىپتىك كووپەراتسيانى قولداۋ تۋرالى ايتىپ بەردى. سونداي-اق ول 2020 جىلى قازاقستاننىڭ ەاەس-داعى مەملەكەتتىك ساتىپ الۋ كولەمىندەگى ۇلەسى 12,5%-دى, اقشالاي ماندە 16,89 ملرد اقش دوللارىن قۇراعانىن ايتتى.
سودان كەيىن قمجو توراعاسىنىڭ ورىنباسارى ەرقانات ماقانوۆ قاتىسۋشىلارعا قازاقستاننىڭ ماشينا جاساۋ سالاسىنىڭ دامۋ كورسەتكىشتەرى تۋرالى ايتىپ بەردى. ول قازاقستانداعى ماشينا جاساۋ ءونىمىنىڭ ءوندىرىس كولەمى مەن يمپورت كولەمىنىڭ ديناميكاسىن اتاپ ءوتتى. سونداي-اق قاتىسۋشىلارعا ونەركاسىپتىك كووپەراتسيا پەرسپەكتيۆالارى جانە مۇناي-گاز, تاۋ-كەن مەتاللۋرگياسى جانە اۋىل شارۋاشىلىعى ماشيناسىن جاساۋداعى ءوزارا ءتيىمدى ىنتىماقتاستىق تۋرالى ايتىلدى.
الماتى اۋىر ماشينا جاساۋ زاۋىتىنىڭ باس ديرەكتورى جەتپىسباي ەدىگەنوۆ رەسەيلىك سەرىكتەستەردى ماشينا جاساۋ سالاسى ءۇشىن قۇيۋ, شىڭداۋ جانە قالىپتاۋ ءوندىرىسى بويىنشا بازالىق كاسىپورىنداردى دامىتۋدا ىنتىماقتاستىققا شاقىردى.
«بولات جانە سۇرىپتى پروكات ءبىزدىڭ ەلدەرىمىز اراسىنداعى ونەركاسىپتىك ىنتىماقتاستىق ءۇشىن باسىم تاۋارلار بولىپ تابىلادى. قازاقستاندىق ماشينا جاساۋشىلاردى قولايلى شارتتاردا مەتالمەن قامتاماسىز ەتۋ ءۇشىن بىرلەسكەن كۇش-جىگەر قابىلداۋ قاجەت», دەدى اامز باسشىسى.
قازاقستاندىق اۆتوبيزنەس قاۋىمداستىعىنىڭ ۆيتسە-پرەزيدەنتى انار ماقاشەۆا كولىك قۇرالدارى مەن ولاردىڭ قۇرامداس بولىكتەرىن ءوندىرۋ اياسىنداعى كووپەراتسيا مەن پەرسپەكتيۆالار تۋرالى ايتىپ بەردى.
سونداي-اق دوڭگەلەك ۇستەل بارىسىندا «ينكار-1» جشس ديرەكتورى قۋاندىق نۇرپەيىسوۆ ماشينا جاساۋ سالاسى ءۇشىن كادرلار دايارلاۋ الەۋەتى تۋرالى ايتىپ, وسى باعىتتا بىرلەسكەن كۇش-جىگەر جۇمساۋ قاجەتتىگىن اتاپ ءوتتى.
ءىس-شارا سوڭىندا قازاقستاندىق دەلەگاتسيا ارىپتەستەردى 2021 جىلعى 22-24 قىركۇيەك ارالىعىندا نۇر-سۇلتان قالاسىندا وتەتىن قازاقستان ماشينا جاساۋشىلار فورۋمى مەن ماشينا جاساۋ جانە مەتالل وڭدەۋ جونىندەگى «Kazakhstan Machinery Fair 2021» ءى حالىقارالىق مامانداندىرىلعان كورمەسىنە شاقىردى.
