وليمپيا ويىندارىنا جولداما بەرەتىن اۋسترياداعى حالىقارالىق مارافوندا باق سىناعان جەڭىل اتلەتيكادان قازاقستان ۇلتتىق قۇراماسىنىڭ مۇشەسى جاننا ماماجانوۆا الدىنا جان سالماي, مارە سىزىعىن وزگەلەردەن بۇرىن كەستى. جارىستى 2 ساعات 29 مينۋت 1 سەكۋند ۋاقىت كورسەتكىشىمەن اياقتاعان جەرلەسىمىز وليمپيادا جولداماسىن يەلەندى. بۇل – جەڭىلاتلەتتەردىڭ ءتورتىنشى ليتسەنزياسى.
ايتا كەتەيىك, بۇگىنگە دەيىن جەڭىل اتلەتيكا وكىلدەرى ءۇش جولداما جەڭىپ العان ەدى. اتاپ ايتار بولساق, وليمپيا ويىندارىنىڭ التىن, كۇمىس جانە قولا جۇلدەسىن ولجالاعان ولگا رىپاكوۆا بيىل ءوزىنىڭ ءتورتىنشى وليمپياداسىنا قاتىسپاق. سونداي-اق توكيودا سپورتتىق ءجۇرىس بويىنشا گەورگي شەيكو, ايمان راتوۆا ەل نامىسىن قورعايدى.
جاڭا ەسىمدەر جارق ەتتى
فۋتبولدان قازاقستان ۇلتتىق قۇراماسىنىڭ باس باپكەرى تالعات بايسۋفينوۆ ماۋسىم ايىندا وتەتىن ويىندارعا شاقىرىلعان فۋتبولشىلاردىڭ ءتىزىمىن جاريا ەتتى. باس جاتتىقتىرۋشى بۇل جيىنعا بىرقاتار جاڭا ويىنشى مەن ۇلتتىق قۇراماعا ءبىراز ۋاقىتتان بەرى ىلىگە الماي جۇرگەن فۋتبولشىلاردى شاقىرعان.
قاقپاشىلار: دميتري نەپوگودوۆ («استانا»), ستاس پوكاتيلوۆ («قايرات»), مۇحاممەدجان سەيسەن («تاراز»); قورعاۋشىلار: سەرگەي مالىي, الەكساندر ماروچكين, رۋسلان ۆاليۋللين (بارلىعى – «توبىل»), ولجاس كەرىمجانوۆ («تۇران»), ەركىن تاپالوۆ («اقجايىق»), ماقسات تايكەنوۆ («كاسپي»), الىبەك قاسىم, نۇرلان دايىروۆ (ەكەۋى دە – «قىزىلجار»), عافۋرجان سۇيىمباەۆ, نۇرالى ءالىپ (ەكەۋى دە – «قايرات»).
جارتىلاي قورعاۋشىلار: ابزال بەيسەبەكوۆ, يسلامبەك قۋات (ەكەۋى دە – «استانا»), اسحات تاعىبەرگەن, سەرىكجان مۋجيكوۆ, ازات نۇرعاليەۆ (بارلىعى – «توبىل»), ۆلاديسلاۆ ۆاسيلەۆ («ەنەرگەتيك-بگۋ», بەلارۋس), ەركەبۇلان تۇڭعىشباەۆ («ورداباسى»), باۋىرجان بايتانا («تاراز»); شابۋىلشىلار: رومان مۇرتازاەۆ («استانا»), تاڭات نوسەرباەۆ («تۇران»), ارتۋر شۋشەناچەۆ («قايرات»), الەكسەي ششەتكين («روتور», رەسەي).
قازاقستان قۇراماسى 4 ماۋسىمدا توشە پروەسكي اتىنداعى ستاديوندا سولتۇستىك ماكەدونيا قۇراماسىمەن كەزدەسەدى. ال 7 ماۋسىمدا اۋستريانىڭ ۆولفسبەرگ قالاسىندا مالتامەن كۇش ساناسادى.
تاشكەنتتە توپ جاردى
بۇل كۇندەرى وزبەكستان استاناسى تاشكەنتتە اۋىر اتلەتيكادان جاسوسپىرىمدەر اراسىنداعى الەم چەمپيوناتى ءوتىپ جاتىر. جاھاندىق دودادا باق سىناپ جاتقان قازاقستاندىق تولاعايلار جارىستىڭ العاشقى كۇنىندە التىن جۇلدە جەڭىپ الدى.
قازاقستان قۇراماسىنان 55 كيلوعا دەيىنگى سالماقتا سىنعا تۇسكەن ابىلاي اۋەلحانوۆ ەكى باعدارلاما قورىتىندىسى بويىنشا 248 كيلو زىلتەمىردى ەڭسەرىپ (108+140), الەم چەمپيونى اتاندى. كۇمىس مەدالدى وزبەكستان وكىلى وگابەك نافاسوۆ, قولانى ەكۆادورلىق زۋريتا ۆاللەدجو ەنشىلەگەن.
ەستەرىڭىزدە بولسا, ابىلاي وسىدان ءبىر اي بۇرىن تاشكەنتتە ۇيىمداستىرىلعان ەرەسەكتەر اراسىنداعى ازيا بىرىنشىلىگىندە كۇمىسكە قول جەتكىزگەن بولاتىن. ول ەكى باعدارلامادا 244 (108+136) كيلونى ەڭسەرگەن ەدى.
