«جازعى كەزەڭدە بالالاردىڭ ساۋىقتىرۋ دەمالىسىن, بوس ۋاقىتىن جانە جۇمىسپەن قامتىلۋىن ۇيىمداستىرۋ مەملەكەتتىڭ الەۋمەتتىك ساياساتىنىڭ اجىراماس بولىگى ءارى بالالاردىڭ شىعارماشىلىق دامۋى ءۇشىن مۇمكىندىك سانالادى. دەمالىس – ول وقۋ ساباقتارىنان بوس ۋاقىت, بالاعا ەرەكشە نازار اۋداراتىن, ونى الەمەتتىك جاعىنان قورعايتىن ايماق. وزدەرىڭىز بىلەتىندەي, ەلوردادا كارانتيندىك شارالار ساقتالۋدا. وسىعان بايلانىستى ءبىز اتا-انالاردىڭ بالالار دەنساۋلىعىنا الاڭدايتىندىعىن تۇسىنەمىز. ءبىلىم جانە عىلىم مينيسترلىگى كەلەسى قالا سىرتىنداعى لاگەرلەردىڭ جۇمىسى ارقىلى بالالار ءۇشىن جازعى دەمالىستى بيىل «قازاقستان بالالارى جازدى قۋانىشپەن قارسى الادى» اتتى ۇرانمەن ۇيىمداستىرادى. 240 ورىندىق «ارمان» تۋريستىك ساۋىقتىرۋ كەشەنى جانە 160 ورىندىق «بۋروۆيچوك» ساۋىقتىرۋ لاگەرى جۇمىس جاسايدى», دەدى باسقارما باسشىسىنىڭ ورىنباسارى.
ونىڭ ايتۋىنشا, اتالعان لاگەرلەر قالادان 100 شاقىرىم جەردە, اقمولا وبلىسىندا ورنالاسقان. ولاردا بالالاردىڭ جازعى لاگەرلەرىن بارلىق سانيتارلىق نورمالاردى ساقتاي وتىرىپ, 10 كۇنگە 5 اۋىسىمدا 7 ماۋسىمنان 10 تامىزعا دەيىن ۇيىمداستىرۋ جوسپارلانعان.
«قىزىل» ايماقتا بولعان كەزدە لاگەرلەردىڭ تولىمدىلىعى 30 پايىزدى قۇرايدى. «سارى» ايماقتا – 50 پايىزعا دەيىن, «جاسىل» ايماق – شەكتەۋسىز. بۇگىندە سانيتارلىق باقىلاۋ باسقارماسى مەن اقمولا وبلىستىق توتەنشە جاعدايلار دەپارتامەنتىنەن رۇقسات قۇجاتىن الۋ جۇمىسى جۇرگىزىلىپ جاتىر. ونىڭ ىشىندە اعاش قۇرىلىمداردى وتتان قورعاۋ بوياۋىمەن وڭدەۋ, ەلەكتر, ءورت دابىلىنا كەلىسىمشارتتار جاساسۋ جانە باسقا دا جۇمىس جاسالىپ جاتىر. شتاتتىق قىزمەتكەرلەر قۇرىلدى», دەدى ريمما يمانگازينوۆا.
سونداي-اق ول ەلوردادا ءال-فارابي, ماحامبەت وتەمىس ۇلى اتىنداعى وقۋشىلار سارايلارىنىڭ بازاسىندا بالالاردىڭ جازعى دەمالىسىن ۇيىمداستىرۋ جوسپارلانىپ وتىرعانىن تىلگە تيەك ەتتى.
