فيتوسانيتاريالىق كارانتيندىك باقىلاۋ ناتيجەسىندە تۇركىستان وبلىسىنىڭ ءۇش جىلىجاي شارۋاشىلىعىندا قىزاناق پەن بۇرىشتىڭ قاۋىپتى جوعارى پاتوگەندى كارانتيندىك ۆيرۋس انىقتالدى. ناقتىراق ايتقاندا, قىزاناقتىڭ قوڭىر ءاجىم ۆيرۋسى (ToBRFV).
ۆيرۋس پتر-تالداۋلار نەگىزىندە «رەسپۋبليكالىق وسىمدىكتەر كارانتينى ورتالىعى» مم الماتى ايماقتىق كارانتيندىك زەرتحاناسى راستادى.
بۇل ۆيرۋس اگرەسسيۆتىلىگىمەن جانە جىلدام تاراتىلۋىنا بايلانىستى جىلىجاي شارۋاشىلىقتارىنا وتە قاۋىپتى. وڭىردە فيتوسانيتارلىق جاعداي ناشارلاپ كەتپەۋ ءۇشىن تۇركىستان وبلىسىنىڭ وسىمدىكتەر كارانتينى جونىندەگى مەملەكەتتىك ينسپەكتورلارى قىزاناقتاردى قايتا وڭدەۋ جانە جويۋ تۋرالى نۇسقاما بەردى. وشاقتاردا ءتيىستى كارانتيندىك ءىس-شارالار جۇرگىزىلەدى.
بۇعان دەيىن حابارلانعانداي, كوميتەت فيتوسانيتاريالىق باقىلاۋ بەكەتتەرىندە وسىمدىكتەر كارانتينى بويىنشا باقىلاۋدى كۇشەيتتى. بيىل 4 ايدا ToBRFV جۇقتىرعان كوكونىس ونىمدەرىن ء(ازىربايجان – 17, تۇركىمەنستان – 19, يران – 6, قحر – 2, تۇركيا – 8, وزبەكستان – 24) اكەلۋدىڭ 76 فاكتىسى انىقتالدى. بارلىق جۇك ەكسپورتتاۋشى ەلدەرگە قايتارىلىپ, تاۋار يەلەرى اكىمشىلىك جاۋاپكەرشىلىككە تارتىلدى.
تۇركىستان وبلىسىندا قىزاناق ۆيرۋسىنىڭ انىقتالۋىنا بايلانىستى اۋىل شارۋاشىلىعى ءمينيسترى ساپارحان وماروۆتىڭ تاپسىرماسى بويىنشا وڭىرگە جاعدايدى ەگجەي-تەگجەيلى زەردەلەۋ ءۇشىن مينيسترلىكتىڭ اگروونەركاسىپ كەشەنىندەگى مەملەكەتتىك ينسپەكتسيا كوميتەتىنىڭ توراعاسى شۇعىل جەتتى. المابەك مارس شاعىمدانىپ, كومەك سۇراعان تۇركىستاندىق فەرمەرلەرمەن كەزدەسۋ وتكىزدى. جۇمىس ساپارىنىڭ ناتيجەلەرى بويىنشا, كوميتەت ءتيىستى شەشىم قابىلدايتىن بولادى.
