تمد وداعىنىڭ قالىپتاسۋى جانە ونداعى حالىق سانى مەن اۋماعىنىڭ كولەمىنە توقتالعان گۋسمان رەسەيدىڭ قازاقستانمەن اراسىندا قۇرلىقتاعى ەڭ ۇزىن شەكارا بار ەكەنىن اتاپ ءوتتى. سونىمەن قاتار ەفير بارىسىندا جۋرناليست مارينا ماكسيموۆا قازاقستاننىڭ تۇڭعىش پرەزيدەنتى نازارباەۆ وكىلەتتىكتى تاپسىرۋ تۋرالى شەشىم قابىلداۋعا ءۇش جىل جۇمساعانىن دا ەسكە سالدى.
«قاسىم-جومارت توقاەۆ ەل پرەزيدەنتى رەتىندە سايلانعانعا دەيىن حالىقارالىق سالادا, سىرتقى ساياساتتا, جالپى مەملەكەتتىك قىزمەتتە ءتۇرلى لاۋازىمدى قىزمەتتە بولدى. ونى ديپلومات دەپ اتاۋعا تولىق نەگىز بار. مەن وتكەن جىلى قازاقستان پرەزيدەنتىنەن سۇقبات الدىم. پاندەمياعا بايلانىستى اڭگىمەلەسۋ ونلاين فورماتتا ءوتتى. بۇل جەڭىس كۇنىنىڭ قارساڭى بولاتىن. سول سۇحباتتا قازاقستان رەسپۋبليكاسىنىڭ پرەزيدەنتى ۇرىس دالاسىندا وق پەن وتتىڭ اراسىندا ەلى ءۇشىن سوعىسقان ءوزىنىڭ مايدانگەر اكەسىن ەسكە الدى. ونىڭ اكەسىن قازاق ادەبيەتىندەگى دەتەكتيۆ جانرىنىڭ اكەسى دەپ اتايدى», دەگەن گۋسمان توقاەۆتار اۋلەتىنىڭ اۋىر تاعدىرىن دا اتاپ ءوتتى.
جۇرگىزۋشى مارينا ماكسيموۆا كەيبىر دەرەككوزدەر توقاەۆتى تىم تۇيىق ادام دەپ سيپاتتاعانىن ايتىپ, پرەزيدەنتتەن سۇحبات العان گۋسماننىڭ وسىعان قاتىستى پىكىرىن سۇرادى.
«بىرىنشىدەن, بۇل جاقسى ديپلوماتتىڭ ەڭ نەگىزگى قاسيەتى. سەبەبى ولار كوپشىلىك الدىندا اسا كوڭىلشەك, اسەرشىل بولماۋى كەرەك. ەكىنشىدەن, ول قالجىڭدى جاقسى كورەتىن ازامات», دەپ جاۋاپ بەردى گۋسمان.
تاسس وكىلىنىڭ پىكىرىنشە, قاسىم-جومارت توقاەۆتىڭ پرەزيدەنت قىزمەتىنە سايلانعاننان كەيىن ەڭ ءبىرىنشى ءىسساپارىن رەسەيدەن باستاۋى دا تەكتەن-تەك ەمەس. سەبەبى قازاقستان ءۇشىن رەسەي اركەز باستى سەرىكتەس بولىپ قالا بەرەدى.
جالپى گۋسمان نۇرسۇلتان نازارباەۆ پەن قاسىم-جومارت توقاەۆتى سالىستىرا قاراۋدىڭ دۇرىس ەمەس ەكەنىن ايتتى. ويتكەنى ولاردىڭ جاس شاماسى بىردەي بولعانىمەن, ءبىلىم الۋ, قىزمەتكە كەلۋ, قىزمەتتىك ءوسۋ, تەمپەرامەنتى جاعىنان جانە جالپى ءومىر جولى بويىنشا ەكى ءتۇرلى باعىتتا جەتىلگەن ازاماتتار. ول نازارباەۆتى اشىق-جارقىن, ەموتسياعا تولى ازامات بولسا, توقاەۆ ءار ءسوزىن اڭداپ سويلەيتىن, ديپلوماتيالىق شەكتەن اسپايتىن سابىرلى كوشباسشى دەپ اتادى.
مارينا ۇلى ءجۇزدىڭ جالايىر تايپاسىنىڭ كۇشىك رۋىنان شىققانىن اتاپ ءوتىپ, قازاقستاننىڭ تۇڭعىش پرەزيدەنتى دە رۋى بويىنشا ۇلى ءجۇزدىڭ ۇرپاعى ەكەنىنە نازار اۋدارعىسى كەلدى.
«مەنىڭ ويىمشا, ءسىز ەكەۋمىز قازاقتاردىڭ رۋى مەن جۇزگە ءبولىنۋى جايلى ءتيىستى دارەجەدە اڭگىمە قوزعايتىنداي بىلىكتى ەمەسپىز. مەن تالپىنىپ كورگەنمىن. ماعان وسىنىڭ بارلىعىن تۇسىندىرۋگە تىرىسقاندار دا بولدى. الايدا رۋ ماسەلەسىن ءتۇسىنۋ ءۇشىن نە قازاق بولىپ تۋ كەرەك, نە قازاقستانتانۋشى عالىم بولۋ كەرەك», دەدى گۋسمان.
«توقاەۆتىڭ ەل پرەزيدەنتى بولىپ سايلانعانىنا ەندى عانا ەكى جىلعا جۋىقتادى. وسى ەكى جىلدىڭ ءبىر جىلى الەمدى جايپاعان ىندەتپەن كۇرەسۋمەن ءوتتى. جالپى مويىنداۋىمىز كەرەك, قازاقستان الەمنىڭ كەيبىر ەلدەرىنە قاراعاندا پاندەمياعا قارسى كۇرەسە الدى. سوندىقتان قيىندىققا تولى جىلدا توقاەۆتىڭ جەتەكشىلىك ەتۋىمەن قازاق ەلىنىڭ ساعى سىنبادى دەپ ويلايمىن», دەدى گۋسمان.
ەفيردى جۇرگىزگەن رەسەيلىك جۋرناليست مارينا ماكسيموۆا قازاقستان كوروناۆيرۋسقا قارسى وتاندىق ۆاكتسينا دايىنداپ جاتقانىنا تاڭدانىسىن جاسىرا المادى. ول ءوز پرەپاراتىن دايىنداي الاتىن مەملەكەتتە عىلىم سالاسى دامىعان دەپ ايتۋعا بولاتىنىن اتاپ ءوتتى.
«كەڭەس وداعى كەزىندە-اق قازاقستان عىلىم سالاسى كۇشتى دامىعان, عىلىمي بازاسى مىعىم, الەمگە اتى تانىمال بولعان عالىمدار شىققان ەل بولاتىن. ال قازاقستاننىڭ تاۋەلسىزدىك جىلدارىندا تۇڭعىش پرەزيدەنت نۇرسۇلتان نازارباەۆتىڭ باستاماشىلىعىمەن كوپ جاس عالىم شەتەلگە وقۋعا جىبەرىلدى. ولار دامىعان مەملەكەتتەردىڭ كوشباسشى وقۋ ورىندارىندا ءبىلىم الىپ, سودان كەيىن ەلدەرىنە ورالدى دا, عىلىمدى دامىتۋ باعىتىندا ءتۇرلى جاۋاپتى قىزمەتتەرگە تاعايىندالدى. بۇل مۇرا رەتىندە توقاەۆقا وتكەن نازارباەۆتىڭ باعدارلاماسى», دەدى تاسس باس ديرەكتورىنىڭ ءبىرىنشى ورىنباسارى.
ونلاين فورماتتا وتكەن سۇحبات كەزىندە پاندەميا سالدارىنان ەكونوميكالىق داعدارىسقا تاپ بولعان الەم ەلدەرى سەكىلدى قازاقستان دا بىرقاتار قيىندىققا تاپ بولعانى ايتىلدى. وسى باعىتتا سپورت سالاسىنداعى شىعىنداردى قىسقارتۋعا تۋرا كەلگەن. وسى تۇستا قاسىم-جومارت توقاەۆتىڭ ۇستەل تەننيسىن جاقسى وينايتىنى تىلگە تيەك بولدى.
ءسوز سوڭىندا گۋسمان قازاقستاننىڭ پايدالى قازباعا وتە باي ەل ەكەنىن اتاپ ءوتىپ, ەلدىڭ قوس پرەزيدەنتى دە مەملەكەت مۇنايعا تاۋەلدى بولماۋى كەرەكتىگىن كەڭىنەن ناسيحاتتاپ جۇرگەنىن ەسكە سالدى.
ءجۋرناليستىڭ «توقاەۆ ەلدە رەفورما جاساي الاتىنداي باتىل كوشباسشى ما» دەگەن سۇراعى ەفيردىڭ قورىتىندى ساۋالى بولدى.
«مۇنى ۋاقىت كورسەتەدى. الايدا قاسىم-جومارت توقاەۆ پرەزيدەنتتىككە ۇمىتكەر رەتىندە سايلاۋعا تۇسكەن كەزدە ونىڭ وتە اۋقىمدى سايلاۋالدى باعدارلاماسى بولعانىن ۇمىتپاۋ كەرەك. بىراق بۇل باعدارلامانى جۇزەگە اسىرۋعا اياق استىنان كەلگەن پاندەميا كەدەرگى بولدى. توقاەۆ ەلدى باسقارۋعا وسى ەكى جىلعا جۋىق ۋاقىت ىشىندە بارلىق باعىت-باعدار, كۇش-جىگەر مەن رەسۋرس ينفەكتسيامەن كۇرەسۋگە, ەلدى امان الىپ شىعۋعا جۇمسالدى. سوندىقتان سايلاۋالدى باعدارلاماداعى تارماقتاردى ىسكە اسىراتىن ۋاقىت ءالى الدا دەپ ويلايمىن», دەپ تۇيىندەدى گۋسمان.
