زەرتحانا ەلەكتر-ماگنيتتىك تولقىنداردىڭ پارامەترلەرىن ولشەۋگە ارنالعان بىرەگەي جاڭعىرىقسىز كامەرامەن جابدىقتالعان. ول ىشتە شۋىل بولدىرماي, قۇلاققا ۇرعان تاناداي تىنىشتىقتى قامتاماسىز ەتەدى. كامەرانىڭ قابىرعالارى مەن توبەسىنىڭ قالىڭدىعى 2 مم جالپاق بولاتتان جاسالعان جانە شاعىلىسۋ كوەففيتسيەنتى تومەن راديوسىڭىرگىش ماتەريالمەن قاپتالىپتى. اتالعان جاڭعىرىقسىز كامەرا قاراپايىم سمارتفوننان باستاپ ءىرى گاباريتتى تەحنيكاعا دەيىن ونىڭ ۇلتتىق, حالىقارالىق ستاندارتتارعا قانشالىقتى ساي كەلەتىنىن اسقان دالدىكپەن تەكسەرىپ بەرەدى.
بۇل جەردە كەز كەلگەن تۇرمىستىق تەحنيكادان باستاپ, اۆتوكولىك, ۇشاققا دەيىن تەكسەرە الادى. جوبانى دايىنداۋعا ءۇش جىل ۋاقىت جۇمسالىپتى.
– زەرتحانادا تۇرمىستىق قۇرالدار مەن كولىكتەردەن شىعاتىن ەلەكتروماگنيتتىك كەدەرگىلەر وشىرىلەدى جانە ولشەنەدى. جاڭعىرىقسىز راديوكامەرا تۇرىندەگى وسىنداي ورتالىق الەمنىڭ 15 ەلىندە عانا بار. ەندى وتاندىق وندىرۋشىلەر شەتەلگە جۇگىرمەي, ءوز ماماندارىمىزعا جۇگىنە الادى. سونىمەن قاتار ورتالىقتىڭ ىسكە قوسىلۋى بيزنەس وكىلدەرىنىڭ قاراجات ۇنەمدەۋىنە مۇمكىندىك بەرەدى, – دەيدى زەرتحانانىڭ جەتەكشى مامانى ادىلبەك قابەنوۆ.
زەرتحانانىڭ اشىلۋ راسىمىنە ساۋدا جانە ينتەگراتسيا ءمينيسترى باقىت سۇلتانوۆ تا كەلدى.
– قازىر ۇكىمەتتىڭ الدىنا ەكونوميكانى ءارتاراپتاندىرۋ مىندەتى قويىلىپ وتىر. سول ماقساتتا باسەكەگە قابىلەتتى وندىرۋشىلەرگە قولداۋ كورسەتىلۋدە. بۇل زەرتحانا ءار ءونىمنىڭ, كولىك جاساۋ ءوندىرىسىنىڭ ساپاسىن انىقتاۋعا كومەكتەسەدى. ورتالىق جۇمىسىنىڭ ءجۇرۋى ءوز كەزەگىندە ەكسپورتتى قولداۋدى دا ىنتالاندىرادى, – دەدى مينيستر.
مۇندا اۆتوكولىكتى سىناقتان وتكىزۋ قۇنى – 1 ملن تەڭگە. كىشىگىرىم تەحنيكالاردى تەكسەرۋ قۇنى 20 مىڭ تەڭگەدەن باستالادى. بۇل رەتتە سىناق ورتالىعىنىڭ جالپى سالماعى 16 تونناعا دەيىنگى, سونداي-اق گاباريتتىك ولشەمى 30 ح 21 ح 10 م بولاتىن كەز كەلگەن ساناتتاعى كولىكتى تەكسەرۋگە قابىلەتتى ەكەنىن دە ايتا كەتۋ كەرەك.
تەحنيكاسىنا وڭ ناتيجەلى سەرتيفيكات العان وندىرۋشىلەر ءوز تاۋارىن شەتەلگە ەش كەدەرگىسىز ەكسپورتتاي الادى. «قازستاندارت» مكم باس ديرەكتورىنىڭ ورىنباسارى جانات بەگايداروۆتىڭ ايتۋىنشا, زەرتحانا جابىق نىسان ىشىندە ورنالاسقاندىقتان, جىلدىڭ كەز كەلگەن ماۋسىمىندا جۇمىس ىستەي بەرەدى. كەشەندى سالۋعا انگليا, تۇركيا, رەسەي ماماندارى قاتىسقان. كەشەن قۇرىلىسىنا ەكى جىل ۋاقىت جۇمسالىپتى. ال مۇندا جۇمىس ىستەيتىن ماماندار ارنايى وقىتۋدان وتكەن.
