جوعارى دەڭگەيدەگى مەملەكەتارالىق كەلىسسوزدەر باستالماس بۇرىن قازاقستان پرەزيدەنتىن سالتاناتتى تۇردە قارسى الۋ ءراسىمى ءوتتى. قۇرمەت قاراۋىلىنىڭ باستىعى راپورت جاساپ, ەكى ەلدىڭ مەملەكەتتىك ءانۇراندارى ورىندالدى. مۇنان سوڭ قاسىم-جومارت توقاەۆ تاجىكستاننىڭ مەملەكەتتىك تۋىنا قۇرمەت كورسەتتى. مەملەكەت باسشىلارى قۇرمەت قاراۋىلى ساپىنىڭ الدىنان ءوتىپ, ءبىر-بىرىنە رەسمي دەلەگاتسيالاردىڭ مۇشەلەرىن تانىستىردى.
سالتاناتتى راسىمنەن كەيىن قازاقستان پرەزيدەنتى قاسىم-جومارت توقاەۆ «قاسري ميللات» سارايىندا تاجىكستان پرەزيدەنتى ەمومالي راحمونمەن شاعىن قۇرامدا ەكىجاقتى كەلىسسوز جۇرگىزدى.
تاراپتار قازاق-تاجىك ستراتەگيالىق ارىپتەستىگىنىڭ كەڭ اۋقىمدى ماسەلەلەرىن قاراستىردى. سونداي-اق ساياسي ديالوگتى نىعايتۋعا ەرەكشە كوڭىل بولە وتىرىپ, ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق ىنتىماقتاستىقتى ارتتىرۋ جاعدايىن تالقىلادى. سونىمەن قاتار ورتالىق ازياداعى قاۋىپسىزدىك پەن تۇراقتىلىقتى قامتاماسىز ەتۋ جانە حالىقارالىق قۇرىلىمدار اياسىنداعى ءوزارا ىقپالداستىق مالەلەلەرى قوزعالدى.
قاسىم-جومارت توقاەۆ ەمومالي راحمونعا تاجىك جەرىنە كەلگەننەن باستاپ وزىنە جانە قازاقستاندىق دەلەگاتسياعا كورسەتكەن قوناقجايلىلىعى مەن قۇرمەتى ءۇشىن شىنايى ريزاشىلىعىن ءبىلدىردى.
– ەكىجاقتى ىنتىماقتاستىقتى دامىتۋعا جانە نىعايتۋعا بايلانىستى ماڭىزدى ماسەلەلەر قاراستىرىلاتىن بولعاندىقتان, ءبىز وسى ساپارعا زور ءمان بەرەمىز. بۇل رەتتە تالقىلايتىن ماسەلە جەتكىلىكتى. بىلتىر پاندەمياعا قاراماستان, ءوزارا ساۋدا-ساتتىق كولەمى 800 ميلليون دوللارعا جەتتى. بۇل ساۋدا-ەكونوميكالىق سالاداعى الەۋەتىمىزدىڭ ءالى دە مول ەكەنىن كورسەتەدى. ارينە, ءبىز دە ءوز تاراپىمىزدان بىرقاتار ۇسىنىس جاسايمىز. سونداي-اق سىزدەردىڭ دە ۇسىنىستارىڭىزدى تىڭداۋعا دايىنبىز, – دەدى قازاقستان پرەزيدەنتى.
مەملەكەت باسشىسى حالىقارالىق كۇن تارتىبىندەگى ماسەلەلەرگە دە توقتالىپ, ەكى ەلدىڭ بۇۇ, شىۇ, ەقىۇ اياسىنداعى ءوزارا تابىستى ىنتىماقتاستىعىن اتاپ ءوتتى. سونىمەن قاتار پرەزيدەنت ق.توقاەۆ قازاقستاننىڭ ازياداعى ءوزارا ءىس-قيمىل جانە سەنىم شارالارى جونىندەگى كەڭەستەگى باستامالارىنا تۇراقتى تۇردە قولداۋ كورسەتىپ كەلە جاتقانى ءۇشىن تاجىك كوشباسشىسىنا العىس ايتىپ, تاجىكستاننىڭ وسى بەدەلدى قۇرىلىمعا 2018-2020 جىلدارى تابىستى توراعالىق ەتكەنىمەن قۇتتىقتادى.
– جالپى, بارلىق باعىت بويىنشا ىنتىماقتاستىقتى نىعايتۋ ءۇشىن مول مۇمكىندىگىمىز بار. قازاقستان مەن تاجىكستان – باۋىرلاس مەملەكەتتەر. بۇل ارتىق ايتقاندىق ەمەس, – دەدى قاسىم-جومارت توقاەۆ.
ءوز كەزەگىندە ەمومالي راحمون قاسىم-جومارت توقاەۆقا تاجىكستانعا رەسمي ساپارمەن كەلگەنى ءۇشىن شىنايى ءىلتيپاتىن ءبىلدىردى.
– تاجىك-قازاق قاتىناستارى بۇگىندە ىنتىماقتاستىقتىڭ بارلىق سالاسى
بويىنشا قارقىندى دامىپ كەلەدى. قازاقستان – تاجىكستاننىڭ جەتەكشى ساۋدا-ەكونوميكالىق سەرىكتەستەرىنىڭ ىشىندە ەكىنشى ورىندا. رۋحاني, مادەني-گۋمانيتارلىق ىنتىماقتاستىق جانە قاۋىپسىزدىكتى قامتاماسىز ەتۋ سالاسىنداعى ىقپالداستىق نىعايىپ كەلەدى. ەلدەرىمىزدىڭ تمد, شىۇ, ۇقشۇ جانە اوسشك اياسىنداعى ىنتىماقتاستىعى تابىستى دامۋدا, – دەدى تاجىكستان پرەزيدەنتى.
ەمومالي راحمون ەكى ەل اراسىنداعى كوپجاقتى قاتىناستاردىڭ بارلىق سالاسى بويىنشا ىنتىماقتاستىقتى ودان ءارى نىعايتۋعا دايىن ەكەنىن ايتتى.
قاسىم-جومارت توقاەۆ پەن ەمومالي راحمون شاعىن پىشىندەگى كەزدەسۋدەن كەيىن ەكى ەلدىڭ رەسمي دەلەگاتسيالارىنىڭ قاتىسۋىمەن كەڭەيتىلگەن قۇرامدا كەلىسسوز وتكىزدى.
كەزدەسۋ بارىسىندا قازاقستان مەن تاجىكستان اراسىنداعى ساۋدا-ەكونوميكالىق ىنتىماقتاستىقتى نىعايتۋ, ونىڭ ىشىندە ءوزارا تاۋار اينالىمىن ۇلعايتۋ, ينۆەستيتسيا تارتۋ, ونەركاسىپ كووپەراتسياسىن ارتتىرۋ, اۋىل شارۋاشىلىعى, كولىك-ترانزيت الەۋەتىن دامىتۋ ماسەلەلەرىنە باسا ءمان بەرىلدى. سونداي-اق سۋ-ەنەرگەتيكا, اسكەري-تەحنيكالىق جانە مادەني-گۋمانيتارلىق سالالارداعى ىقپالداستىق جاعدايى تالقىلاندى.
قاسىم-جومارت توقاەۆ ەمومالي راحمونعا قوناقجايلىلىق تانىتقانى ءۇشىن العىس ايتىپ, بۇل ءوزىنىڭ قازاقستان پرەزيدەنتى رەتىندە تاجىكستانعا جاساعان تۇڭعىش ءارى پاندەميا جاعدايىنداعى العاشقى رەسمي ساپارى ەكەنىن ايتتى.
– بۇل جاعداي كوپ دۇنيەدەن حابار بەرەدى دەپ ويلايمىن. شىن مانىندە, تاجىكستان ءبىزدىڭ سەنىمدى ستراتەگيالىق سەرىكتەسىمىز ءارى وداقتاسىمىز. ءبىز دە تاجىكستانمەن اراداعى ىنتىماقتاستىقتى جوعارى باعالايمىز. ءسىزدى, قۇرمەتتى ەمومالي ءشارىپ ۇلى, قازاقستاندا تاجىك حالقىنىڭ بارشا جۇرت مويىنداعان كوشباسشىسى دەپ تانيدى جانە قۇرمەتتەيدى. وسى مۇمكىندىكتى پايدالانا وتىرىپ, ءسىزدىڭ الداعى جۇمىستارىڭىزعا تابىس تىلەيمىن, – دەدى قازاقستان پرەزيدەنتى.
مەملەكەت باسشىسى ەكى ەل اراسىندا 80-نەن استام شارت پەن كەلىسىمدەردەن تۇراتىن ماڭىزدى شارتتىق-قۇقىقتىق بازا بار ەكەنىن, ونىڭ ىشىندە, 2015 جىلى قول قويىلعان ستراتەگيالىق ارىپتەستىك تۋرالى شارتتى ەرەكشە اتاپ ءوتتى.
پرەزيدەنت كوروناۆيرۋسقا قاتىستى تۋىنداعان بارلىق قيىندىقتى ەڭسەرۋ كەزىندە قازاقستان مەن تاجىكستان اراسىنداعى قاتىناستاردى, اتاپ ايتقاندا, ءوزارا ساۋدا-ساتتىقتى جاڭا دەڭگەيگە كوتەرۋگە مول مۇمكىندىك بار ەكەنىن ايتتى. وسى رەتتە مەملەكەت باسشىسى قاسىم-جومارت توقاەۆ تاجىك ەكونوميكاسىنا جان-جاقتى كومەك كورسەتۋگە دايىندىعىن ناقتىلادى.
ەمومالي راحمون ءوز ەلىنىڭ باۋىرلاس قازاقستانمەن ستراتەگيالىق سەرىكتەستىككە قۇرىلعان قاتىناستاردى جوعارى باعالايتىنىن جەتكىزدى.
– قازاقستان – تاجىكستاننىڭ سىرتقى ساۋدا اينالىمىنىڭ جالپى كولەمى بويىنشا ەكىنشى ورىندا. ءبىز بارلىق باعىت بويىنشا ەكى ەل اراسىنداعى ىنتىماقتاستىقتى ودان ءارى دامىتۋ ءۇشىن جۇمىلا جۇمىس ىستەۋگە نيەتتىمىز, – دەدى تاجىكستان كوشباسشىسى.
ەمومالي راحمون قاسىم-جومارت توقاەۆ پەن ەلباسى نۇرسۇلتان نازارباەۆتىڭ تاجىك-قازاق بايلانىستارىنىڭ ءوزارا ءتيىمدى دامۋىنا قوسقان زور ۇلەسىن جوعارى باعالادى.
تاجىكستان پرەزيدەنتى ساياسي-ديپلوماتيالىق, ساۋدا-ەكونوميكالىق, عىلىمي-تەحنيكالىق جانە مادەني-گۋمانيتارلىق, سونداي-اق قاۋىپسىزدىكتى قامتاماسىز ەتۋ سالالارىنداعى ەكىجاقتى ىقپالداستىقتىڭ دايەكتى دامۋىنا كوڭىلى تولاتىنىن ايتتى.
ەمومالي راحمون قاسىم-جومارت توقاەۆتىڭ بۇل ساپارى نۇر-سۇلتان مەن دۋشانبە اراسىنداعى ىنتىماقتاستىقتىڭ ودان ءارى تەرەڭدەي تۇسۋىنە جان-جاقتى سەپتىگىن تيگىزەتىنىنە سەنىم ءبىلدىردى.
كەلىسسوز سوڭىندا قاسىم-جومارت توقاەۆ ەمومالي راحموندى وزىنە ىڭعايلى ۋاقىتتا قازاقستانعا مەملەكەتتىك ساپارمەن كەلۋگە شاقىردى.
سونىمەن قاتار مەملەكەتتەر باسشىلارىنىڭ قاتىسۋىمەن رەسمي دەلەگاتسيا مۇشەلەرى تومەندەگى قۇجاتتارعا قول قويدى:
قازاقستان رەسپۋبليكاسى دەنساۋلىق ساقتاۋ مينيسترلىگى مەن تاجىكستان رەسپۋبليكاسى دەنساۋلىق ساقتاۋ جانە حالىقتى الەۋمەتتىك قولداۋ مينيسترلىگى اراسىنداعى تۋبەركۋلەزبەن كۇرەس جونىندەگى ىنتىماقتاستىق تۋرالى كەلىسىم;
قازاقستان رەسپۋبليكاسى سىرتقى ىستەر مينيسترلىگى مەن تاجىكستان رەسپۋبليكاسى سىرتقى ىستەر مينيسترلىگى اراسىنداعى 2021-2023 جىلدارعا ارنالعان ىنتىماقتاستىق باعدارلاماسى;
قازاقستان رەسپۋبليكاسى مادەنيەت جانە سپورت مينيسترلىگى مەن تاجىكستان رەسپۋبليكاسى مادەنيەت مينيسترلىگى اراسىنداعى مادەني ىنتىماقتاستىق جونىندەگى ءوزارا تۇسىنىستىك تۋرالى مەموراندۋم;
قازاقستان رەسپۋبليكاسى يندۋستريا جانە ينفراقۇرىلىمدىق دامۋ مينيسترلىگى مەن تاجىكستان رەسپۋبليكاسى ونەركاسىپ جانە جاڭا تەحنولوگيالار مينيسترلىگى اراسىنداعى ونەركاسىپ سالاسىنداعى ىنتىماقتاستىق تۋرالى شەكتى مەموراندۋم;
قازاقستان رەسپۋبليكاسى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى اەروعارىش كوميتەتى مەن تاجىكستان رەسپۋبليكاسى ۇكىمەتى جانىنداعى بايلانىس قىزمەتىنىڭ اراسىنداعى ءوزارا تۇسىنىستىك تۋرالى مەموراندۋم;
قازاقستان رەسپۋبليكاسى ساۋدا جانە ينتەگراتسيا مينيسترلىگى مەن تاجىكستان رەسپۋبليكاسى ونەركاسىپ جانە جاڭا تەحنولوگيالار مينيسترلىگى اراسىنداعى تاۋار وتكىزۋ جۇيەسىن قۇرۋ جونىندەگى بىرلەسكەن جوبانى جۇزەگە اسىرۋ ماسەلەلەرى جونىندەگى ىنتىماقتاستىق تۋرالى مەموراندۋم.
سونداي-اق قاسىم-جومارت توقاەۆ پەن ەمومالي راحمون شاعىن جانە كەڭەيتىلگەن قۇرامدا جۇرگىزىلگەن ەكىجاقتى كەلىسسوزدەر قورىتىندىسى بويىنشا بۇقارالىق اقپارات قۇرالدارى ءۇشىن بريفينگ وتكىزدى.
مەملەكەت باسشىسى ق.توقاەۆ جۋرناليستەر الدىندا سويلەگەن سوزىندە تاجىكستانعا رەسمي ساپارمەن كەلۋگە شاقىرىپ, قوناقجاي تاجىك جەرىندە قۇشاق جايا قارسى العانى ءۇشىن پرەزيدەنت ەمومالي ءشارىپ ۇلى راحمونعا زور ريزاشىلىعىن ءبىلدىردى.
قاسىم-جومارت توقاەۆ تاجىكستاننىڭ قازاقستان ءۇشىن وڭىردەگى ماڭىزدى سەرىكتەس مەملەكەت قانا ەمەس, تىلەكتەس ءارى باۋىرلاس ەل ەكەنىن اتاپ ءوتتى.
– ءبىزدىڭ حالىقتارىمىزدى دوستىقتىڭ بەرىك ارقاۋى, ورتاق تاريح, رۋحاني جانە مادەني قۇندىلىقتار بىرىكتىرەدى, – دەدى مەملەكەت باسشىسى.
سونداي-اق بۇگىنگى كەلىسسوزدەر قازاقستان مەن تاجىكستان اراسىنداعى قاتىناستاردىڭ جوعارى دەڭگەيدە ەكەنىن تاعى دا ءبىر مارتە كورسەتكەنىن ايتتى.
ەكىجاقتى جانە كوپجاقتى ىقپالداستىقتىڭ وزەكتى ماسەلەلەرى بويىنشا ناقتى كەلىسىمدەرگە قول جەتكىزىلگەنىنە توقتالىپ, ونىڭ ەكى ەل حالىقتارىنىڭ ءال-اۋقاتىن ارتتىرۋعا ىقپال ەتەتىنىنە سەنىم ءبىلدىردى.
قازاقستان پرەزيدەنتىنىڭ پىكىرىنشە, جۇرگىزىلگەن كەلىسسوزدەردىڭ تەرەڭ سيمۆولدىق ءمانى بار. ويتكەنى ول ەكى مەملەكەتتىڭ تاۋەلسىزدىگىنىڭ 30 جىلدىق مەرەيتويى اياسىندا ءوتىپ وتىر.
قاسىم-جومارت توقاەۆ كەزدەسۋ قورىتىندىلارىن جوعارى باعالاي كەلە, تاراپتار كەلەشەك ىقپالداستىقتىڭ نەگىزگى باعىتتارىن ايقىنداي العانىن جەتكىزدى.
– قازاقستان – تاجىكستاننىڭ نەگىزگى ساۋدا سەرىكتەستەرىنىڭ ءبىرى. بىلتىرعى جىلدىڭ قورىتىندىسى بويىنشا ءوزارا ساۋدا-ساتتىقتىڭ بۇرىنعى كولەمىن ساقتاپ قانا قويماي, سونداي-اق تاۋار اينالىمىنىڭ ءوسىمىن 800 ميلليون دوللارعا دەيىن جەتكىزدىك. پاندەميا جاعدايىندا بۇل جامان كورسەتكىش ەمەس, – دەدى پرەزيدەنت.
مەملەكەت باسشىسى ونەركاسىپ كووپەراتسياسى مەن ينۆەستيتسيالىق ىنتىماقتاستىقتى دامىتۋدىڭ ماڭىزدىلىعىنا نازار اۋداردى. ونىڭ ايتۋىنشا, قازاقستان كومپانيالارى تاجىكستاندا اۆتوموبيل جانە اۆتوبۋس شىعاراتىن, ترانسفورماتور زاۋىتىن سالاتىن بىرلەسكەن كاسىپورىن اشۋعا دايىن. سونىمەن قاتار قازاقستاندىق كاسىپكەرلەر تەمىر جول قۇرال-جابدىقتارىن, تەپلوۆوزدار مەن ۆاگونداردى, تىكۇشاقتاردى, «روگۋن» جەس-ءى قۇرىلىسى مەن باسقا دا نىسانعا مەتالل ونىمدەرىن جەتكىزۋ ءىسىن ۇلعايتۋعا مۇددەلى.
قاسىم-جومارت توقاەۆ ەكى ەل ۇكىمەتتەرىنىڭ اتالعان باعىت بويىنشا جۇيەلى كەلىسسوزدەر جۇرگىزىپ جاتقانىن, بىرلەسكەن ءىرى ءوندىرىس جوبالارىن جۇزەگە اسىرۋدى كوزدەيتىن بىرقاتار قۇجاتقا قول قويىلعانىن اتاپ ءوتتى.
ءوزارا ساۋدا-ساتتىقتىڭ ۇلعايۋى اۋىل شارۋاشىلىعى سالاسىنداعى ىنتىماقتاستىقتى نىعايتۋعا تىڭ سەرپىن بەرەتىنىنە توقتالدى.
– قازاقستان ءوزارا ءتيىمدى شارتتار بويىنشا بيداي, ۇن, ەت جانە ءسۇت ونىمدەرىن جەتكىزۋدى ارتتىرۋعا نيەتتى. ءوز كەزەگىندە, تاجىكستاننىڭ قازاقستانعا جەمىس-كوكونىس ونىمدەرىن ەكسپورتتاۋ مۇمكىندىگى زور. فەرمەرلەرىمىزدى قولداۋ, قاجەتسىز ارالىق كەدەرگىلەردى ازايتۋ ءۇشىن تاجىكستاننىڭ اۋىل شارۋاشىلىعى ونىمدەرىن قازاقستان نارىعىنا جەتكىزۋدى قامتاماسىز ەتۋ جونىندەگى بىرلەسكەن كوتەرمە باسقارۋ ورتالىقتارىن قۇرۋ يدەياسىن قولدادىق, – دەدى مەملەكەت باسشىسى.
سونىمەن قاتار قاسىم-جومارت توقاەۆ قازاقستان مەن تاجىكستان اراسىنداعى كولىك-ترانزيت الەۋەتىن ءتيىمدى پايدالانۋ قاجەت ەكەنىن اتاپ ءوتتى.
پرەزيدەنت تاسىمال كولەمىن ارتتىرۋعا تىڭ سەرپىن بەرۋ ماقساتىندا ەكى ەل ۇكىمەتتەرىنە تاريف ساياساتىن وڭتايلاندىرۋ جانە تاسىمال تالاپتارىن جاقسارتۋ جۇمىستارىنا قاتىستى شارالار قابىلداۋعا تاپسىرما بەرىلگەنىن ايتتى.
قاسىم-جومارت توقاەۆ اتالعان ۋاعدالاستىقتاردىڭ تابىستى جۇزەگە اسىرىلۋى ءوزارا ساۋدا اينالىمىنىڭ مەجەسىن 1 ميلليارد دوللاردان اسىرۋعا جانە جاقىن بولاشاقتا بۇل كورسەتكىشتى ەكى ەسە ۇلعايتۋعا مۇمكىندىك بەرەتىنىنە سەنىم ءبىلدىردى. بۇدان بولەك كەلىسسوزدەر بارىسىندا سۋ-ەنەرگەتيكالىق جانە اسكەري-تەحنيكالىق سالالارداعى ىقپالداستىق ماسەلەلەرى دە تالقىلاندى.
سونىمەن قاتار مەملەكەت باسشىسى مادەني-گۋمانيتارلىق بايلانىستاردى كەڭەيتۋ, ونىڭ ىشىندە, ەكى ەلدىڭ مادەني كۇندەرىن ءوزارا الماسىپ وتكىزۋ جايىندا ايتتى.
– قازاقستان تاجىك ستۋدەنتتەرى ءۇشىن بەرىلەتىن ءبىلىم گرانتتارىنىڭ سانىن كوبەيتەدى. بۇل ءبىزدىڭ جاستارىمىزدى ودان سايىن جاقىنداتا تۇسەدى. ول ءبىزدىڭ ەلدەرىمىز اراسىنداعى شىنايى دوستىق قاتىناستاردىڭ ساباقتاستىعىن ساقتاۋعا ىقپال ەتەدى, – دەدى قاسىم-جومارت توقاەۆ.
پرەزيدەنتتىڭ ايتۋىنشا, كەلىسسوزدەر كەزىندە ورتالىق ازياداعى تۇراقتىلىق پەن قاۋىپسىزدىكتى قامتاماسىز ەتۋگە قاتىستى وزەكتى ماسەلەلەرگە ەرەكشە كوڭىل بولىنگەن.
اۋعانستانداعى احۋال تۋرالى ايتا كەلە, قاسىم-جومارت توقاەۆ تاجىك تاراپىنا جانە ونىڭ باسشىلىعىنا الەمدىك كۇن تارتىبىندەگى وزەكتى پروبلەما بويىنشا مازمۇندى كونسۋلتاتسيا بەرگەنى ءۇشىن ريزاشىلىعىن ءبىلدىردى.
– قازاقستان وڭىردەگى بەيبىتشىلىك پەن تاتۋ كورشىلىكتى ساقتاۋ جانە ءوزارا سەنىمدى نىعايتۋ ءۇشىن باۋىرلاس مەملەكەتتەردىڭ كۇش-جىگەرىن بىرىكتىرۋدى قولدايدى. ورتالىق ازيا – ەكونوميكالىق, كولىك-ترانزيتتىك جانە ادامي الەۋەتى مول, بىرەگەي مۇمكىندىكتەرى مەن رەسۋرستارى زور اۋماق, – دەدى مەملەكەت باسشىسى.
وڭىرلىك كووپەراتسياعا تىڭ سەرپىن بەرۋ ماقساتىندا تاراپتار مەملەكەتتەر باسشىلارى مەن ۇكىمەتتەردىڭ, سونداي-اق سالالىق مينيسترلىكتەردىڭ جەتەكشىلەرى دەڭگەيىندە جۇرگىزىلەتىن ءوزارا كونسۋلتاتسيالاردى جالعاستىرۋعا ۋاعدالاس-
تى.
قازاقستان پرەزيدەنتى تاجىكستان پرەزيدەنتىن وزىنە ىڭعايلى ۋاقىتتا مەملەكەتتىك ساپارمەن كەلۋگە شاقىرعانىن ايتتى. مەملەكەت باسشىسى تاجىك تاراپىنىڭ 2025 جىلدى حالىقارالىق مۇزدىقتاردى ساقتاۋدىڭ جىلى دەپ جاريالاۋ تۋرالى باستاماسىن قولدايتىنىن جەتكىزدى.
قاسىم-جومارت توقاەۆ تاجىكستانعا رەسمي ساپارى اياسىندا تاجىك مەملەكەتىنىڭ نەگىزىن قالاعان يسمويل ءسومونيدىڭ «ۇلتتىق كەلىسىم جانە تاجىكستاننىڭ قايتا ورلەۋى» مەموريالدى كەشەنىندە ورنالاسقان ەسكەرتكىشىنە گۇل شوعىن قويۋ راسىمىنە قاتىستى. ءىس-شارادان كەيىن «ناۆرۋز» سارايىندا قازاقستان پرەزيدەنتىنىڭ قۇرمەتىنە تاجىكستان پرەزيدەنتىنىڭ اتىنان رەسمي قابىلداۋ ءوتتى.
قازاقستان پرەزيدەنتى تاجىكستاننىڭ مادجليسي نامويانداگون مادجليسي ولي توراعاسى ماحمادتوير زوكيرزودامەن كەزدەستى. كەزدەسۋ بارىسىندا قاسىم-جومارت توقاەۆ پەن ماحمادتوير زوكيرزودا قازاقستان مەن تاجىكستان اراسىنداعى پارلامەنتارالىق ىنتىماقتاستىقتىڭ پەرسپەكتيۆالارىن تالقىلادى.
مەملەكەت باسشىسىنىڭ ايتۋىنشا, تاجىكستانمەن جان-جاقتى ىنتىماقتاستىقتى دامىتۋ, ونىڭ ىشىندە, زاڭ شىعارۋ سالاسى بويىنشا بىرلەسىپ جۇمىس ىستەۋ قازاقستاننىڭ سىرتقى ساياساتتاعى باسىم باعىتتارىنىڭ ءبىرى.
قاسىم-جومارت توقاەۆ ماحمادتوير زوكيرزوداعا ءوزىنىڭ پارلامەنت سەناتىنىڭ توراعاسى قىزمەتىن اتقارعان كەزىندەگى جۇمىسى تۋرالى ايتىپ, زاڭ شىعارۋ قىزمەتى مەن پارلامەنتتىك ديپلوماتيا ينستيتۋتىنىڭ ماڭىزدى ەكەنىنە توقتالدى.
ءوز كەزەگىندە تاجىكستان پارلامەنتى تومەنگى پالاتاسىنىڭ توراعاسى مەملەكەت باسشىسىنا كەزدەسۋگە مۇمكىندىك جاساعانى ءۇشىن العىس ايتتى. سونداي-اق ەكىجاقتى پارلامەنتارالىق بايلانىستاردىڭ تيىمدىلىگى مەن دامۋ دەڭگەيىنىڭ جوعارى ەكەنىن جەتكىزدى.
قاسىم-جومارت توقاەۆ دۋشانبەگە رەسمي ساپارىنىڭ سوڭىندا تاجىكستاننىڭ پرەمەر-ءمينيسترى كوحير راسۋلزودامەن كەزدەسۋ وتكىزدى.
ەكەۋارا اڭگىمەدە كوحير راسۋلزوداعا تاجىكستان پرەزيدەنتىمەن وتكىزگەن كەلىسسوزدەردىڭ نەگىزگى ناتيجەلەرىنە توقتالعان. قازاقستان پرەزيدەنتى ەكىجاقتى ۇكىمەتارالىق كوميسسيانىڭ تەتىكتەرىن پايدالانۋعا قاتىستى ۋاعدالاستىققا قول جەتكىزگەنى جانە ەمومالي راحموننىڭ قازاقستانعا الداعى ۋاقىتتا جاسايتىن مەملەكەتتىك ساپارى اياسىندا قوسىمشا كەلىسىمدەر ازىرلەۋ جونىندەگى جوسپارى جايىندا ايتىپ ءوتتى.
مەملەكەت باسشىسى ق.توقاەۆ قازاق تاراپى ىقپالداستىقتىڭ بارلىق باعىتى بويىنشا كونسترۋكتيۆتى جانە ناقتى جۇمىستار جۇرگىزەتىنىن جەتكىزدى.
كوحير راسۋلزودا قاسىم-جومارت توقاەۆتىڭ بۇل ساپارى ەكى ەل تاۋەلسىزدىگىنىڭ 30 جىلدىعىندا ءوتىپ جاتقانىن جانە ونىڭ سيمۆولدىق ءمانى بار ەكەنىن ايتتى.
كەزدەسۋ بارىسىندا قازاقستان مەن تاجىكستان پرەزيدەنتتەرى اراسىندا جاسالعان بۇگىنگى ۋاعدالاستىقتاردىڭ ورىندالۋىنا, اتاپ ايتقاندا, ساۋدا-ەكونوميكالىق الەۋەتتى جانە ينۆەستيتسيا كولەمىن ودان ءارى ارتتىرۋعا باسا ءمان بەرىلدى.
