بۇگىن ورتالىق كوممۋنيكاتسيالار قىزمەتىندە وتكەن بريفينگتە ەحاق مينيسترلىگىنىڭ ەڭبەك, الەۋمەتتىك قورعاۋ جانە كوشى-قون كوميتەتى توراعاسىنىڭ ورىنباسارى – قر باس مەملەكەتتىك ەڭبەك ينسپەكتورى تولەگەن وسپانقۇلوۆ وسىنداي مالىمەتتەردى جاريا ەتتى.
«ستاتيستيكا جونىندەگى ۋاكىلەتتى ورگاننىڭ دەرەكتەرى بويىنشا, 2020 جىلى زەرتتەلگەن كاسىپورىنداردا 1,6 ملن جۇمىسكەردىڭ 367 مىڭى نەمەسە ءاربىر ءتورتىنشىسى زياندى جانە قاۋىپتى ەڭبەك جاعدايلارىندا جۇمىس ىستەگەن. 2019 جىلى بۇل كورسەتكىش 370 ادامدى قۇراعان. وڭىرلەر بويىنشا زياندى جانە قولايسىز ەڭبەك جاعدايلارىندا جۇمىس ىستەيتىن قىزمەتكەرلەردىڭ كوپ سانى قاراعاندى, پاۆلودار, شىعىس قازاقستان جانە ماڭعىستاۋ وبلىستارىندا بايقالادى. جوعارى شۋ مەن ءدىرىلدىڭ جوعارى دەڭگەيى جاعدايىندا ءاربىر ەكىنشى, جۇمىس ايماعىنىڭ جوعارى گازدانۋى مەن شاڭدانۋى اسەرى جاعدايىندا ءاربىر ءۇشىنشى مامان جۇمىس ىستەدى. اۋىر دەنە ەڭبەگىمەن 94 مىڭ ادام اينالىسقان», دەدى ت.وسپانقۇلوۆ.
جۇمىسكەرلەردىڭ قولايسىز ەڭبەك جاعدايلارى ەكونوميكالىق شىعىندارعا الىپ كەلەدى.
باس مەملەكەتتىك ەڭبەك ينسپەكتوردىڭ ايتۋىنشا, وتكەن جىلى 672 مىڭ قازاقستاندىق زياندى ەڭبەك جاعدايلارىندا جۇمىس ىستەگەنى ءۇشىن 141 ملرد تەڭگە كولەمىندە ءتۇرلى وتەماقىلار الدى, بۇل 2019 جىلمەن سالىستىرعاندا 10%-عا ارتىق.
