بىلتىر پاندەمياعا بايلانىستى قازان ايىندا وتكىزىلگەن ايگىلى جارىس بيىل ءداستۇر بويىنشا ادەتتەگىدەي مامىر ايىندا باستالدى. 104-مارتە ۇيىمداستىرىلىپ جاتقان وسى جىلعى جارىستا 23 كوماندانىڭ 184 ۆەلوشاباندوزى ونەر كورسەتۋدە. ولاردىڭ قاتارىندا جىل سايىن ءىرى جارىستاردا جوعارى ورىندارعا قول جەتكىزىپ جۇرگەن قازاقستاندىق-كانادالىق Astana-Premier Tech كلۋبى دا بار.
ۆەلوكوپكۇندىكتىڭ اتاۋى «دجيرو د’يتاليا» بولعانىمەن, جارىس يتاليادان بولەك, سلوۆەنيا جانە شۆەيتساريا تاس جولدارىندا دا ۇيىمداستىرىلادى. تۋريننەن باستاۋ الىپ, ميلاندا ءوز مارەسىنە جەتەتىن باسەكەدە ۆەلوشاباندوزدار جالپى ۇزىندىعى 3479,9 شاقىرىم جولدى ءجۇرىپ ءوتۋى ءتيىس. بۇگىندە جارىستىڭ 10 كەزەڭى ارتتا قالىپ, سپورتشىلار اتالعان قاشىقتىڭ تەڭ جارتىسىنا جۋىق جولىن باسىپ ءوتتى. ازىرشە, جالپى ەسەپتە 24 جاستاعى كولۋمبيالىق ۆەلوشاباندوز ەگان بەرنال كوش باستاپ كەلەدى. 9-كەزەڭدەگى تاۋلى جولدا الدىنا جان سالماعان بەرنال مارە سىزىعىن وزگەلەردەن بۇرىن كەسىپ, كەزەڭ جەڭىمپازى اتاندى. ول – 10 كەزەڭنەن كەيىنگى جالپى ەسەپتە كوش باستاعان ءتورتىنشى ۆەلوشاباندوز. العاشقى ءۇش كەزەڭدە يتاليالىق فيليپپو گاننا كۇلگىن جەيدەنى كيسە, كەيىننەن بىردە-ءبىر كەزەڭدە جەڭىمپاز اتانباعان تاعى ءبىر يتاليالىق سپورتشى الەسساندرو دە ماركي ەكى كەزەڭ بويى توپ باسىندا بولدى. سونداي-اق دە ماركي سياقتى ۇزدىكتەر قاتارىنان كورىنبەگەن ماجارستاندىق اتتيلا ۆالتەر دە ءۇش كۇن قاتارىنان جالپى كەزەڭدە كوش باستادى.
ال Astana-Premier Tech كلۋبىن اپەننين تۇبەگىنە كاپيتان رەتىندە باستاپ بارعان 24 جاستاعى رەسەيلىك ۆەلوشاباندوز الەكساندر ۆلاسوۆ 10 كەزەڭنەن كەيىن جالپى ەسەپتە ءۇشىنشى ورىندا كەلەدى. ول كۇلگىن جەيدە يەسى ەگان بەرنالدان بار-جوعى 22 سەكۋند ارتتا تۇر. ءالى الدا 11 كەزەڭ بار ەكەنىن ەسكەرسەك, جاعداي سان مارتە وزگەرۋى ابدەن مۇمكىن.
جالپى «استانا» كاپيتانى «دجيرو د’يتاليا» گراند-تۋرىنا وسىمەن ەكىنشى مارتە قاتىسىپ جاتىر. دەگەنمەن ونىڭ وسى جارىستاعى بىلتىرعى دەبيۋتى اسا ءساتتى بولا قويعان جوق. سەبەبى ۆەلوكوپكۇندىكتىڭ العاشقى ەكى كەزەڭىنەن كەيىن دەنساۋلىعىنا بايلانىستى جارىستى ەرتە اياقتاۋعا ءماجبۇر بولىپ ەدى. وسىلايشا ءوزىنىڭ العاشقى گراند-تۋر باسەكەسىن سوڭىنا دەيىن جالعاستىرا الماعان-دى. مىنە, اراعا جىل سالىپ رەسەيلىك سپورتشى يتالياداعى جارىسقا كوماندا كاپيتانى رەتىندە كەلدى.
«دجيرو» الدىندا الەكساندر ۆلاسوۆ Astana-Premier Tech كلۋبىنىڭ ءباسپاسوز قىزمەتىنە بيىلعى جارىس تۋرالى ءوز ويىن ءبىلدىرىپ, سۋپەركوپكۇندىكتە جاقسى ناتيجە كورسەتۋگە تىرىساتىنىن ايتقان ەدى.
– بىلتىرعى «دجيرو-2020»-دا ەكىنشى كەزەڭنەن كەيىن جارىستان شىعىپ قالعان سوڭ, ءوزىمدى يتاليادا باستاعان ءىسىم اياقتالماي قالعان سياقتى سەزىنىپ ءجۇرمىن. وسى جارىستاعى باستى ماقساتىم – ءبىرىنشى كەزەڭنەن باستاپ, سوڭىنا دەيىن جاراقاتسىز ءجۇرىپ ءوتىپ, ءار كەزەڭدە بارىنشا جوعارى ناتيجە كورسەتۋ. بيىلعى دوداعا قاتىسىپ جاتقان سپورتشىلاردىڭ قاتارىندا الەمنىڭ ەڭ ۇزدىك جانە تاجىريبەلى بىرنەشە شاباندوزى بار. دەسە دە ۇزدىكتەرمەن جارىسۋدا ايانىپ قالمايمىن. ميلاندا وتەتىن جارىستىڭ فينالىندا قاي ورىندا بولاتىنىمدى باسەكە سوڭىندا كورە جاتارمىز», دەگەن ەدى ا.ۆلاسوۆ.
ازىرگە الەكساندردىڭ بيىلعى «دجيرو د’يتالياداعى» جورىعى جامان ەمەس. العاشقى ەكى كەزەڭدە ءوزىن جاقسى قىرىنان كورسەتە الماعان رەسەيلىك ۆەلوشاباندوز ءۇشىنشى كەزەڭنەن باستاپ ۇزدىكتەر قاتارىنا قوسىلدى. ءبىرىنشى كەزەڭدەگى قىسقا, بىراق جوعارى جىلدامدىقپەن تۋريندە وتكەن جەكەلەي جارىستا 11-ورىنعا يە بولسا, 179 شاقىرىمعا سوزىلعان ەكىنشى كەزەڭدە مارەگە 47-ءشى بولىپ جەتتى.
بيەللە مەن كانالە قالالارىن جالعاعان ءۇشىنشى كەزەڭدە Astana-Premier Tech ساپىنان بۇل كەزەڭدە يتاليالىق فابيو فەلليني ۇزدىك بولدى. فابيو مارە سىزىعىن 17-ءشى بولىپ كەستى. ال ۆلاسوۆ بولسا, بۇل كەزەڭدى نەبارى 41-ءشى ورىنمەن تۇيىندەدى. دەگەنمەن ۋاقىت كورسەتكىشى جاعىنان ءتاۋىر ناتيجەگە يە بولعان ول وسى كەزەڭنەن باستاپ توپ-10 سپورتشىنىڭ قاتارىنا قوسىلدى. 5-كەزەڭدە التىنشى, ال 6-كەزەڭدە ءتورتىنشى ورىنعا كوتەرىلە الدى. 6-كەزەڭدەگى تولاسسىز جاۋعان جاڭبىر مەن اۋا تەمپەراتۋراسىنىڭ تومەندەۋى جانە ءۇش اسۋى بار بۇل كەزەڭ بارلىق ۆەلوشاباندوز ءۇشىن ناعىز سىناق بولدى. جارىس سوڭىنا دەيىن فاۆوريتتەر توبىندا بولعان الەكساندر ۆلاسوۆ مارەگە 10-شى بولىپ كەلدى.
كەيىنگى ەكى كەزەڭدە دە ۆلاسوۆ جارىس جولىن كوشباسشىلارمەن بىرگە ءجۇرىپ ءوتىپ, جالپى ەسەپتەگى 4-ورنىن ساقتاپ قالدى. ال العاشقى 10 كۇندىكتىڭ 9-شى كەزەڭى ۆەلوسپورتشىلار ءۇشىن ەڭ تارتىستى جارىس كۇنى بولدى. سەبەبى كامپو فەليچە اسۋىندا مارەسىنە جەتكەن تاۋلى كەزەڭ «دجيرو د’يتاليانىڭ» باس كلاسسيفيكاتسياسىنا ايتارلىقتاي وزگەرىستەر الىپ كەلدى. Astana-Premier Tech كومانداسىنىڭ كاپيتانى بۇل كۇنى مارەگە ءۇشىنشى بولىپ كەلىپ, سۋپەركوپكۇندىكتىڭ جالپى ەسەبىندە 3-ورىنعا كوتەرىلدى.
سەيسەنبى كۇنى تىنىعىپ العان ۆەلوسپورتشىلار كەشە قايتا جارىس جولىنا شىقتى. ۆەلوشاباندوزداردى الدا بەس تاۋلى, ءبىر ورتا دەڭگەيدەگى تاۋلى, ءتورت جازىق كەزەڭ جانە ءبىر قىسقا قاشىقتاعى سپرينت جارىسى كۇتىپ تۇر.
