جوبا «ازاماتتىق باستامالار ورتالىعى» كەاق مەملەكەتتىك گرانتى شەڭبەرىندە اقپارات جانە قوعامدىق دامۋ مينيسترلىگىنىڭ قولداۋىمەن «تاۋەلسىزدىك ۇرپاقتارى» جانە «پروفناۆيگاتسيا» جوبالارى ىسكە اسىرىلۋدا.
مينيسترلىك وكىلىنىڭ ايتۋىنشا, «تاۋەلسىزدىك ۇرپاقتارى» جوباسىنىڭ ماقساتى – قازاقستان رەسپۋبليكاسىنىڭ تاۋەلسىزدىك جىلدارىندا جەتىستىككە جەتكەن جاس قازاقستاندىقتاردىڭ جەتىستىكتەرىن تانىمال ەتۋ.
«مينيسترلىك تاراپىنان ۇكىمەتتىك ەمەس ۇيىمدارعا گرانتتار ارقىلى قولداۋ كورسەتىلەدى. مەملەكەت باسشىسى 2020 جىلى 1 قىركۇيەكتە قازاقستان حالقىنا جولداۋىندا قازاقستان – دارىندى جاستار مەكەنى, ەرتەڭ ەلىمىزدىڭ ابىرويىن اسىراتىن دا وسى تالانتتى ۇل-قىزدار, ءبىز ولاردىڭ ءورىسىن اشىپ, قارىم-قابىلەتىن شىڭداۋ ءۇشىن مۇمكىندىكتەر جاساۋعا ءتيىسپىز دەگەن بولاتىن. «تاۋەلسىزدىك ۇرپاقتارى» جوباسىنىڭ ماقساتى – تاۋەلسىزدىك ۇرپاقتارىنىڭ ءوز سالاسى بويىنشا ءوز كۇشىمەن, ءوز بىلىمىمەن جەتكەن جەتىستىكتەرىن جاستارعا كورسەتۋ. جالپى, جوبا اياسىندا كۇتىلەتىن نەگىزگى ناتيجە – تانىمال قازاقستاندىق جاستاردى ءارتۇرلى الەۋمەتتىك جەلىدە, مەسسەندجەردە تاراتۋ, بەينەروليكتەر ءتۇسىرۋ, كورسەتۋ ارقىلى, سولاردىڭ جەتكەن جەتىستىكتەرىن, ولاردى ۇلگى ەتۋ», دەدى ش.بايمانوۆ.
جوبا اياسىندا قازاقستاننىڭ بارلىق وڭىرىنەن 500 جاستىڭ ەڭ قىزىقتى جانە شابىتتاندىراتىن وقيعاسىن جيناقتاپ, مەكتەپ, كوللەدج جانە جوو وقۋشىلارىنا ونلاين كوۋچينگ-ترەنينگتەر, مەملەكەتتىك باستامالاردى ىلگەرىلەتۋگە جانە ىسكە اسىرۋعا باعىتتالعان موتيۆاتسيالىق كوۋچينگ-كۋرستار ۇيىمداستىرۋ قاراستىرىلعان.
ال «پروفناۆيگاتسيا» جوباسى قازىرگى زامانعى سۇرانىسقا يە ماماندىقتار ءۇشىن جاستاردىڭ داعدىلارى مەن قۇزىرەتتەرىن دامىتۋعا باعىتتالعان.
«قازاقستاننىڭ جاڭا كاسىپتەرى مەن قۇزىرەتتەرىنىڭ اتلاسى» پلاتفورماسى مەن «EduNavigator» كاسىپتىك باعدار بەرۋ پلاتفورماسىنىڭ كومەگىمەن جوعارى سىنىپ وقۋشىلارىنىڭ ءوز بولاشاق ماماندىعىن تاڭداۋعا مۇمكىندىگى بار. بۇل تۋرالى جوبا جەتەكشىسى ساياسات نۇربەك ءمالىم ەتتى. «جاڭا كاسىپتەر مەن قۇزىرەتتەردىڭ اتلاسى – ەڭبەك نارىعىن سىندارلى تۇردە وزگەرتەتىن نەگىزگى ترەندتەردى تەرەڭ تالداۋمەن, الداعى 5-10 جىلعا ارنالعان ۇلتتىق ەكونوميكانىڭ پەرسپەكتيۆالى سالالارى مەن كاسىپتەرىنىڭ بولجامدى كارتاسى. ەكونوميكانىڭ نەگىزگى 9 سالاسى: تاۋ-كەن مەتاللۋرگيا كەشەنى, مۇناي-گاز سالاسى, اۋىل شارۋاشىلىعى, كولىك, تاسىمالداۋ, ماشينا جاساۋ, ءىت جانە كوممۋنيكاتسيا, اۋىلشارۋاشىلىق, تۋريزم سالالارى بويىنشا 463 ماماندىق جازىپ شىقتىق, ونىڭ ىشىندە جاڭا ماماندىقتار, وزگەرىپ جاتقان ماماندىقتار جانە ەڭبەك نارىعىندا سۇرانىسىن ازايتقان ماماندىقتار بار», دەدى ساياسات نۇربەك.
اتلاستىڭ قازاق, ورىس جانە اعىلشىن تىلدەرىندەگى بارلىق ماتەريالى www.enbek.kz/atlas سايتىندا ۇسىنىلعان. سونىمەن قاتار «EduNavigator.kz» ارنايى كاسىپتىك باعالاۋ پلاتفورماسى كەز كەلگەن وقۋشىعا جوو, كوللەدج دەڭگەيىندەگى جاستارعا ءوزىن-ءوزى باعالاپ, ءوزىنىڭ داعدىلارىن, دارىندارىن, قىزىعۋشىلىقتارىن انىقتاۋعا مۇمكىندىك بەرەدى. بۇل پلاتفورما ەڭبەك نارىعىنداعى ماماندىقتار بويىنشا ناقتى ءار بالاعا, تۇلعاعا كاسىبي اقىل-كەڭەس بەرىپ, ەڭبەك نارىعى بويىنشا تولىق اقپارات ۇسىنادى. «بۇل جوبا ءبىزدىڭ قۇرالدار ارقىلى اقپاراتتى پايدالى جانە سارالانعان تۇردە ۇسىنادى. ءار ماماندىقتىڭ بولاشاعى, ەڭبەكاقىسى, اۆتوماتتاندىرۋعا ۇشىراۋ قاۋىپ-قاتەرى, تاپشىلىعى, سۇرانىسى تۋرالى تولىق اقپارات بەرەدى. بۇل جوبانىڭ ماڭىزدىلىعى – بولاشاق ەڭبەك نارىعىنىڭ پروبلەمالارىن ورتا مەكتەپ دەڭگەيىندە شەشۋگە ۇلەس قوسۋىندا», دەدى سپيكەر.
