قاسىم-جومارت توقاەۆقا ومىرزاق شوكەەۆ وبلىستا كوۆيد-مەنەدجمەنت بويىنشا جۇيەلى جۇمىس جاسالعانىن, سانيتارلىق-ەپيدەميالىق ءتارتىپتىڭ قاتاڭ ساقتالعانىن, حالىققا ەكپە ەگۋ ءىسىنىڭ قارقىندى ءجۇرىپ جاتقانىن ايتتى. جالپى تۇركىستان وبلىسى بويىنشا 1 ميلليون ادامعا ەكپە ەگىلۋى كەرەك بولسا, بۇگىندە 200 مىڭ ادامعا ۆاكتسينا سالىنعان. ايماقتاعى جۇقپالى اۋرۋلار اۋرۋحانالارىنداعى توسەك-ورىندار مەن ءدارى-دارمەك قورى جەتكىلىكتى, قاجەتتى قۇرالدارمەن جابدىقتالعان. ءوڭىر باسشىسىنىڭ ايتۋىنشا, قازىر وبلىس «جاسىل ايماقتا», سوعان سايكەس كەيبىر شەكتەۋلەر الىنىپ جاتىر.
بيىل تۇركىستان وبلىسىنىڭ قۇرىلعانىنا 3 جىل تولادى. مەملەكەت باسشىسىنا وسى ارالىقتا اتقارىلعان جۇمىستار مەن وڭىردەگى وزگەرىستەر تۋرالى ايتىلدى. ومىرزاق شوكەەۆ وبلىستىڭ جالپى ىشكى ءونىمى 41 پايىزعا وسكەنىن, ينۆەستيتسيا 2,4 ەسە ارتقانىن, قۇرىلىس سالاسىندا ءىرى جوبالار ىسكە اسقانىن, اۋىل شارۋاشىلىعى, شاعىن جانە ورتا بيزنەس بويىنشا وڭ كورسەتكىش بار ەكەنىن اتاپ ءوتتى.
وبلىس اكىمى تۇركىستان قالاسىندا قولعا الىنعان جۇمىستار جونىندە بولەك باياندادى. قالادا 250-دەن استام جوبا جۇزەگە اسىرىلعان. تۇركىستانعا 445 ميلليارد تەڭگە ينۆەستيتسيا تارتىلعان. سونىمەن قاتار ومىرزاق شوكەەۆ الداعى ۋاقىتتا اتقارىلاتىن جوبالار تۋرالى دا مالىمەت بەردى.
مەملەكەت باسشىسى ۇكىمەتپەن بىرلەسىپ تۇركىستان وبلىسىن دامىتۋدىڭ 2018-2024 جىلدارعا ارنالعان كەشەندى جوسپارىن قايتا جاڭارتۋدى تاپسىردى.
