پرەزيدەنت • 18 مامىر، 2021

مەملەكەت باسشىسى شۆەيتساريا پرەزيدەنتى گي پارمەلانمەن كەلىسسوز جۇرگىزدى

21 رەت كورسەتىلدى

مەملەكەت باسشىسى قاسىم-جومارت توقاەۆ شۆەيتساريا پرەزيدەنتى گي پارمەلانمەن كەلىسسوز جۇرگىزدى، دەپ حابارلايدى Egemen.kz.

قازاقستان پرەزيدەنتى قاسىم-جومارت توقاەۆ ۆيدەو كونفەرەنتسيا رەجيمىندە شۆەيتساريا پرەزيدەنتى گي پارمەلانمەن كەلىسسوز وتكىزدى. ەكى ەل باسشىلارى ساياسي، ساۋدا-ەكونوميكالىق سالالارداعى ىنتىماقتاستىقتىڭ قازىرگى احۋالى مەن پەرسپەكتيۆالارىن تالقىلادى.

تاراپتار قازاقستان مەن شۆەيتساريا اراسىنداعى قاتىناستاردىڭ دامۋ قارقىنىن جوعارى باعالاپ، كولىك، لوگيستيكا، ماشينا جاساۋ، اۋىل شارۋاشىلىعى، تۋريزم، جوعارى تەحنولوگيا مەن «جاسىل» ەكونوميكا سالالارى بويىنشا ىسكەرلىك بايلانىستاردى نىعايتۋعا جانە بىرلەسكەن ينۆەستيتسيالىق جوبالاردى جۇزەگە اسىرۋعا باسا ءمان بەردى.

قاسىم-جومارت توقاەۆ شۆەيتساريانى قازاقستاننىڭ ەۋروپاداعى نەگىزگى ساياسي، ساۋدا جانە ەكونوميكالىق سەرىكتەستەرىنىڭ ءبىرى رەتىندە اتاپ ءوتتى. بۇگىندە ەلىمىزدە شۆەيتساريا كاپيتالىنىڭ قاتىسۋىمەن 40-تان استام كاسىپورىن مەن كومپانيا تابىستى جۇمىس ىستەپ جاتىر.

«ەكى ەل اراسىنداعى ءوزارا ءتيىمدى جانە تابىستى ىنتىماقتاستىقتى جالعاستىرۋعا قاجەتتى مۇمكىندىكتىڭ ءبارى بار دەپ ويلايمىن. ءوزارا ىقپالداستىعىمىزدىڭ بارلىق سالاسىنا تىڭ سەرپىن بەرۋ ءبىزدىڭ مىندەتىمىز،»، دەدى قازاقستان پرەزيدەنتى.

ءوز كەزەگىندە گي پارمەلان قازاقستان مەن شۆەيتساريا اراسىنداعى بايلانىستاردىڭ دامۋىنا كوڭىلى تولاتىنىن جەتكىزدى.

ء«بىز قىزىعۋشىلىق تانىتقان سالالار بويىنشا ىنتىماقتاستىق دۇرىس جولعا قويىلعانىن اتاپ وتكىم كەلەدى. الداعى ۋاقىتتا بۇل ىقپالداستىقتى ودان ءارى نىعايتىپ جانە كەڭەيتە تۇسەتىنىمىزگە سەنىمدىمىن»، دەدى شۆەيتساريا پرەزيدەنتى.

مەملەكەت باسشىسى قول جەتكىزگەن ۋاعدالاستىقتاردى جۇزەگە اسىرۋدا ساۋدا-ەكونوميكالىق ىنتىماقتاستىق جونىندەگى ەكىجاقتى ۇكىمەتارالىق كوميسسيانىڭ جانە ىسكەرلىك كەڭەستىڭ ماڭىزدى رولىنە توقتالدى. سونىمەن قاتار پرەزيدەنت ەكونوميكانىڭ ءتۇرلى سەكتورىنداعى سەرىكتەستىك اياسىن كەڭەيتۋدى جانە تاراپتاردىڭ الەۋەتىن ەسكەرە وتىرىپ، تاۋار اينالىمىنىڭ تۇرلەرىن كوبەيتۋدى ۇسىندى.

وسى رەتتە قاسىم-جومارت توقاەۆ قازاقستاننىڭ تەمىرجول ينفراقۇرىلىمىن دامىتۋ جونىندەگى جوبالارعا قاتىسۋعا نيەت بىلدىرگەن شۆەيتساريالىق كومپانيالاردى قولدايتىنىن ايتتى.

مەملەكەت باسشىسى شۆەيتساريالىق ارىپتەسىنە قازاقستانداعى الەۋمەتتىك-ەكونوميكالىق وزگەرىستەر مەن ەلىمىزدىڭ ينۆەستيتسيالىق كليماتىن جاقسارتۋعا باعىتتالعان شارالار تۋرالى مالىمەت بەردى.

كەلىسسوز بارىسىندا كوروناۆيرۋس ىندەتىنىڭ تارالۋىنا قاتىستى احۋال دا قاراستىرىلدى. قازاقستان پرەزيدەنتى ەلىمىزدەگى پاندەميانىڭ سالدارىن ەڭسەرۋگە باعىتتالعان شارالار جانە حالىققا جاپپاي تەگىن ەكپە سالۋ جۇمىستارى جايىندا ايتا كەلىپ، شۆەيتساريالىق كومپانيالارعا كورسەتكەن كومەگى مەن COVID-19 ىندەتىنە قارسى كۇرەستە قولداعانى ءۇشىن ريزاشىلىعىن ءبىلدىردى.

اڭگىمەلەسۋ سوڭىندا قاسىم-جومارت توقاەۆ پەن گي پارمەلان حالىقارالىق كۇن تارتىبىندەگى بىرقاتار وزەكتى ماسەلە بويىنشا، سونىڭ ىشىندە، قازاقستان مەن شۆەيتساريانىڭ كوپجاقتى قۇرىلىمدار اياسىنداعى ىقپالداستىعى جايىندا پىكىر الماستى. تاراپتار جاھاندىق بەيبىتشىلىك پەن قاۋىپسىزدىكتى ساقتاۋ، ورنىقتى دامۋدى قامتاماسىز ەتۋ، كليماتتىڭ وزگەرۋىنە قارسى كۇرەسۋ، ورتالىق ازياداعى ترانسشەكارالىق سۋلاردى ءادىل ءارى ءتيىمدى پايدالانۋعا ىقپال ەتۋ ماسەلەلەرى بويىنشا كونسترۋكتيۆتى ديالوگتى جالعاستىرا بەرۋگە دايىن ەكەنىن ناقتىلادى

سوڭعى جاڭالىقتار

ۇقساس جاڭالىقتار