ايماقتار • 18 مامىر، 2021

پەتروپاۆلدا «Fitness Park KZ» رەسپۋبليكالىق جوباسى باستالدى

17 مامىر كۇنى ۇلتتىق دەلفي كوميتەتىنىڭ ۇيىمداستىرۋىمەن پەتروپاۆل قالاسىنداعى جاتتىقتىرۋشىلاردىڭ، فيتنەس نۇسقاۋشىلاردىڭ جانە دەنە شىنىقتىرۋ وقىتۋشىلارىنىڭ جاپپاي جاتتىعۋى مەن شەبەرلىك سىنىبىنا ارنالعان «Fitness Park KZ» رەسپۋبليكالىق جوباسى باستالدى، دەپ حابارلادى Egemen.kz.

گاۋھار قاپاش

سپورت سارايىندا ۇيىمداستىرىلعان بۇقارالىق جاتتىعۋلار مەن شەبەرلىك سىنىپتارىنا 200-گە جۋىق ادام قاتىستى.

سپورتتىق ءىس-شارا اياسىندا پەتروپاۆلدا جاتتىقتىرۋشىلاردىڭ، فيتنەس-نۇسقاۋشىلاردىڭ جانە دەنە شىنىقتىرۋ وقىتۋشىلارىنىڭ شەبەرلىك ساباعىن «World Class» ەليت-باپكەرى، فۋتبولدان قازاقستان چەمپيونى جانە حالىقارالىق ويىنداردىڭ جۇلدەگەرى، قر بوديبيلدينگتەن جۇلدەگەرى، Les Mills سەرتيفيكاتتالعان باپكەرى رۋسلان باتىربەكوۆ وتكىزدى. جاتتىعۋعا اتاقتى قازاقستاندىق كاسىپقوي بوكسشى جانات جاقيانوۆ قوسىلدى.

جاتتىعۋ باعدارلاماسى ۇلتتىق سپورت تۇرلەرى مەن مادەنيەت ەلەمەنتتەرىنە نەگىزدەلگەن.

بۇگىن، 18 مامىردا سولتۇستىك قازاقستان وبلىسى قىزىلجار اۋدانىنىڭ بەسكول اۋىلىندا جاپپاي جاتتىعۋ ۇيىمداستىرىلدى، وندا رۋسلان باتىربەكوۆپەن بىرگە جەڭىل اتلەتيكادان حالىقارالىق دارەجەدەگى سپورت شەبەرى، قازاقستاننىڭ بىرنەشە دۇركىن چەمپيونى، ازيا چەمپيوناتىنىڭ جۇلدەگەرى ميحايل ليتۆين جاتتىعۋ وتكىزدى.

ۇلتتىق دەلفي كوميتەتىنىڭ ديرەكتورى قۇرالاي تۇسپەكوۆانىڭ ايتۋىنشا، سولتۇستىك قازاقستان وبلىسىنا ساپار ناتيجەلى بولدى. ءىس-شاراعا قاتىسۋشىلار جاتتىعۋلاردىڭ كۇردەلىلىگىنە قاراماستان، وعان جەتكىلىكتى فيزيكالىق دايىندىقسىز ادامدار دا قاتىسا الاتىندىعىن اتاپ ءوتتى.

«جاتتىعۋعا ەستۋ قابىلەتى شەكتەۋلى بالالار قاتىسقانىن اتاپ وتكىم كەلەدى. جوسپارلانعانداي، باعدارلاما سۋردواۋدارمامەن بەرىلدى جانە بالالارعا جالپى جاتتىعۋعا قاتىسۋ ۇنادى»، دەدى قۇرالاي تۇسپەكوۆا.

ءىس-شارانى ۇيىمداستىرۋشىلاردىڭ ايتۋىنشا، ەپيدەميولوگيالىق جاعدايدى ەسكەرە وتىرىپ، وسىنداي جاپپاي جاتتىعۋلار مەن شەبەرلىك سىنىپتارى ەلىمىزدىڭ باسقا وڭىرلەرىندە وتكىزىلەتىن بولادى.

«Fitness Park KZ» جوباسى ازاماتتىق باستامالاردى قولداۋ ورتالىعىنىڭ مەملەكەتتىك گرانتى اياسىندا جۇزەگە اسىرىلۋدا.