قوعام • 18 مامىر، 2021

«Atameken CUP» رەسپۋبليكالىق ءتۋرنيرىنىڭ جەڭىمپازدارى انىقتالدى

42 رەت كورسەتىلدى

«اتامەكەن» ۇلتتىق كاسىپكەرلەر پالاتاسى مەن م. نارىكباەۆ اتىنداعى قازاق گۋمانيتارلىق زاڭ ۋنيۆەرسيتەتى بىرلەسە ۇيىمداستىرعان «Atameken CUP» رەسپۋبليكالىق پىكىرسايىس ءتۋرنيرىنىڭ جەڭىمپازدارى انىقتالدى، دەپ حابارلايدى Egemen.kz.

ءتۋرنيردىڭ ماقساتى – جاستاردىڭ بەلسەندى ازاماتتىق كوزقاراسىن قالىپتاستىرۋ جانە جەتىلدىرۋ. سونىمەن قاتار ولاردى ءبىر ورتاعا جيناپ، يدەيا الماسۋ جانە پىكىرسايىس مادەنيەتىن دامىتۋ، جاستاردىڭ بويىندا ادامگەرشىلىك پەن تولەرانتتىلىق سياقتى ىزگى قاسيەتتەردى وياتۋ.

شاراعا ەلىمىزدىڭ 14 ايماعىنان بارلىعى 75 كوماندا قاتىسۋعا ءوتىنىش ءبىلدىردى، سونىڭ ىشىنەن 32 كوماندا ىرىكتەلىپ الىندى.

تۋرنير بريتانيالىق پارلامەنتتىك فورماتتا ءوتتى جانە 4 ىرىكتەۋ راۋندى بولدى.

سونىمەن، رەسپۋبليكالىق پىكىرسايىس تۋرنيرىندە «كەيىن» كومانداسى (ابىلاي بورانباي، ارۋجان قايروللا)، «Feel it still»  كومانداسى (داۋلەت نۇركەن، راحيم شاحزاداەۆ)، «حيكارۋ ناكامۋرا» ء(الجان ءشارىپوۆ، ەرنازار تۇرعازى) فينالعا شىقتى. ال «مىقتىلار» (ماعجان سوۆەتبەك، ەركەبۇلان ءارىپباي) كومانداسى بارىنەن وزىپ، جەڭىمپاز اتاندى. ۇزدىك سپيكەر رەتىندە ەركەبۇلان ءارىپباي تانىلسا، امانگۇل دوستانوۆا ۇزدىك تورەشى بولدى.

بۇل ءتۋرنيردى جىلدا وتەتىن ءداستۇرلى تۋرنيرگە اينالدىرۋ ويدا بار، كەلەسى «Atameken CUP» رەسپۋبليكالىق پىكىرسايىس ءتۋرنيرىن كۇزدە قازاق جانە ورىس تىلىندە وتكىزۋ جوسپارلانىپ وتىر.

سوڭعى جاڭالىقتار

ۇقساس جاڭالىقتار