تاعايىنداۋ • 18 مامىر، 2021

قازاقستاننىڭ پاكىستان يسلام رەسپۋبليكاسىنداعى ەلشىسى اۋىستى

41 رەت كورسەتىلدى

بۇل تۋرالى اقوردانىڭ رەسمي سايتى حابارلادى.

«مەملەكەت باسشىسىنىڭ جارلىعىمەن ەرجان سانسىزباي ۇلى قىستافين قازاقستان رەسپۋبليكاسىنىڭ پاكىستان يسلام رەسپۋبليكاسىنداعى توتەنشە جانە وكىلەتتى ەلشىسى لاۋازىمىنا تاعايىندالدى»، دەلىنگەن حابارلامادا.

ەرجان سانسىزباي ۇلى 1978 جىلى 8 قازاندا قاراعاندى قالاسىندا دۇنيەگە كەلگەن. ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتىن حالىقارالىق زاڭگەر ماماندىعى بويىنشا بىتىرگەن. ەۋروپالىق حالىقارالىق ستراتەگيالىق زەرتتەۋلەر ينستيتۋتىنىڭ (بريۋسسەل ق.) حالىقارالىق قاتىناستار سالاسىندا ماگيستر دارەجەسىنە يە.

ەڭبەك جولىن 1999 جىلى نۇر-سۇلتان قالاسى ادىلەت باسقارماسىنىڭ سوت پريستاۆى لاۋازىمىنان باستادى، ءارى قاراي قر قارجى مينيسترلىگىنىڭ زاڭ قىزمەتى دەپارتامەنتىندە جۇمىسىن جالعاستىردى.

ءوزىنىڭ ديپلوماتيالىق مانسابىن 2001 جىلى قر ءسىم حالىقارالىق قۇقىق دەپارتامەنتىنىڭ اتتاشەسى لاۋازىمىنان باستاعان. 2002 جىلدان 2005 جىلعا دەيىن قر ءسىم اپپاراتى زاڭ ءبولىمىنىڭ ءۇشىنشى حاتشىسى لاۋازىمىنان ءبولىم باستىعىنا دەيىن كوتەرىلدى. 2005-2007 جىلدارى – مەملەكەتتىك ءتىل جانە زاڭ ساراپتاماسى باسقارماسىنىڭ باستىعى. 2007 جىلى اكىمشىلىك دەپارتامەنتى ديرەكتورىنىڭ ورىنباسارى بولىپ تاعايىندالدى، سودان كەيىن 2009 جىلى دەپارتامەنتتى باسقاردى. 2010-2015 جىلدارى قازاقستاننىڭ بەلگياداعى ەلشىلىگىنىڭ كەڭەسشى-ۋاكىلى بولىپ جۇمىس ىستەدى. 2016 جىلدان 2019 جىلعا دەيىن قر ءسىم اكىمشىلىك جانە باقىلاۋ دەپارتامەنتىن باسقاردى.

قازاقستاننىڭ پاكىستانداعى ەلشىسى لاۋازىمىنا تاعايىندالعانعا دەيىن 2019 جىلدان باستاپ قازاقستاننىڭ اقش-تاعى ەلشىلىگىنىڭ كەڭەسشى-ۋاكىلى بولدى.

II سىنىپتى توتەنشە جانە وكىلەتتى ۋاكىل ديپلوماتيالىق دارەجەسىنە يە.

سوڭعى جاڭالىقتار

ۇقساس جاڭالىقتار