16 مامىردا ءوڭىر تۇرعىندارىنىڭ اراسىندا 70 ادامنىڭ ىندەتكە شالدىعۋى جاعدايدى كۇرت وزگەرتتى. ازىرگە وبلىستىڭ باس سانيتارلىق دارىگەرىنىڭ ەپيدەميولوگيالىق جاعدايدىڭ كۇرت وزگەرۋىنە بايلانىستى جاڭا قاۋلىسى شىققان جوق. دەگەنمەن, مەكتەپ وقۋشىلارى مەن ولاردىڭ اتا-انالارى سوڭعى وقۋ اپتاسىنىڭ قالاي وتەتىنىنە ەرەكشە الاڭداۋلى. ويتكەنى 11 مامىردان بەرى اقتوبە قالاسى مەن اۋدان ورتالىقتارىنداعى بارلىق ورتا مەكتەپتەر ەسىكتەرى قايتا اشىلىپ, ءداستۇرلى وقۋعا كوشكەن ەدى.
مامىر ايىنىڭ باسىنان كوروناۆيرۋس ىندەتىنە شالدىققاندار سانى ايتارلىقتاي ازايعاندىقتان, سەنبى جانە جەكسەنبى كۇندەرى وبلىس ورتالىعىنداعى بارلىق بازارلار مەن جابىق ساۋدا ورىندارى, مونشالار مەن ساۋنالار اشىلىپ, ءدامحانالار مەن مەيرامحانالاردىڭ 50 ادامعا دەيىن قىزمەت كورسەتۋلەرىنە رۇقسات ەتىلگەن بولاتىن. مۇنىمەن ءبىر كەزدە جوعارى وقۋ ورىندارى مەن كوللەدج ستۋدەنتتەرى دە ءداستۇرلى وقۋ فورماتىنا قايتا ورالىپ, كوروناۆيرۋس ىندەتى قاۋپىنىڭ ازايعاندىعىنا تۇرعىندار سەنىمدى بولا باستاعان. كەشەلى بەرى وبلىس اۋماعىندا كۇن قاتتى ىسىپ, تۇرعىندار جازدىڭ ەرتە باستالعانىن سەزىنگەندەي بولدى. الايدا ءبىر كۇننىڭ ىشىندە ەپيدەميولوگيالىق جاعدايدىڭ كۇرت وزگەرۋى ساقتىق شارالارىن ساقتاماساق, جۇقپالى ىندەتتىڭ قايتا اسقىناتىندىعىن ءبىلدىردى.
ايتا كەتۋ كەرەك, 16 مامىرداعى جاعداي بويىنشا, «قىزىل ايماقتا» نۇر-سۇلتان, الماتى قالالارى, اقمولا, باتىس قازاقستان, قاراعاندى, پاۆلودار, اقتوبە, الماتى وبلىستارى تۇر.
اقتوبە وبلىسى
