سقو اۋىل شارۋاشىلىعى جانە جەر قاتىناستارى باسقارماسىنىڭ مالىمەتىنشە, 3 ملن گەكتار ءداندى, 0,9 ملن گەكتار مايلى داقىل سەبىلمەك. 330 مىڭ گەكتار جەم-ءشوپ, 32 مىڭ گەكتار – كارتوپ جانە 6,1 مىڭ گەكتار كوكونىس ەگىلەدى.
«يمپورتتى الماستىرۋ ماقساتىندا اۋىل شارۋاشىلىعى مينيسترلىگىنىڭ ۇسىنىمدارىنا سايكەس جانە اۋدانداردىڭ مالىمەتتەرىنە سۇيەنسەك, بيىل قاراقۇمىق 10 مىڭ گەكتارعا ەگىلەدى. بۇل وتكەن جىلمەن سالىستىرعاندا 2,4 ەسە ارتىق. بىلتىر قاراقۇمىق القابى 4,2 مىڭ گەكتاردى قۇرادى», دەيدى سقو اكىمدىگىنىڭ اۋىل شارۋاشىلىعى جانە جەر قاتىناستارى باسقارماسىنىڭ باس مامانى نارعىز اقجىگىتوۆا.
وڭىردە شارۋاشىلىقتار كوكتەمگى ەگىس ناۋقانىن باستاپ كەتتى.
«سولتۇستىك قازاقستان اۋىل شارۋاشىلىعى تاجىريبە ستانتسياسى» جشس ۇسىنىمدارىنا سايكەس, ءداندى داقىلداردى سەبۋدىڭ وڭتايلى مەرزىمدەرى 13 مامىردان 5 ماۋسىمعا دەيىن, ءداندى-بۇرشاقتى جانە مايلى داقىلدار 12 مامىردان 28 مامىرعا دەيىن, كارتوپ 15 مامىردان 31 مامىرعا دەيىن بەلگىلەنگەن. 14 مامىرداعى جاعداي بويىنشا 50 مىڭ گەكتار القاپقا ءداندى داقىلدار مەن كوكونىس ەگىلدى», دەيدى نارعىز اقجىگىتوۆا.
بيىلعى ەگىس ناۋقانىن جۇرگىزۋگە 13 مىڭ تراكتور, 15 مىڭ استىق سەپكىش, 1200 زاماناۋي ونىمدىلىگى جوعارى ەگىس كەشەندەرى تارتىلىپ وتىر.
