ونىڭ ايتۋىنشا, 2020 جىلى مەملەكەت باسشىسىنىڭ تاپسىرماسى بويىنشا سالا قىزمەتكەرلەرىن الەۋمەتتىك قولداۋ شارالارى قابىلداندى. بۇعان ەڭبەكاقىنى كوتەرۋ, ارنايى اي سايىنعى اقشالاي تولەمدەر, قوسىمشا جۇكتەمە ءۇشىن قوسىمشا تولەمدەر بەلگىلەۋ, تۋىندىلاردىڭ اۆتورلارىنا قالاماقى تولەۋ, قىزمەتكەرلەردىڭ تۇرعىن ءۇي جاعدايلارىن جاقسارتۋ سەكىلدى جۇمىستار كىرەدى. سونداي-اق مەملەكەتتىك الەۋمەتتىك تاپسىرىس اياسىندا العاش رەت شىعارماشىلىق وداقتاردى قولداۋعا قاراجات ءبولىندى.
«ايتا كەتەيىك, ءال-اۋقاتتى جاقسارتۋ, ەڭبەكاقى تولەۋدى جەتىلدىرۋ, سالا قىزمەتكەرلەرىن ىنتالاندىرۋ, سول ارقىلى ازاماتتارىمىزدىڭ لايىقتى ءومىر ءسۇرۋىن قامتاماسىز ەتۋ جۇمىستىڭ نەگىزگى باسىمدىعى. وسى مىندەتتەردىڭ بارلىعى مەملەكەت باسشىسىنىڭ 2020 جىلعى 1 قىركۇيەكتەگى «جاڭا جاعدايداعى قازاقستان: ءىس-قيمىل كەزەڭى» اتتى قازاقستان حالقىنا جولداۋىندا, «تاۋەلسىزدىك بارىنەن قىمبات» ماقالاسىندا, Nur Otan پارتياسىنىڭ «وزگەرىستەر جولى: ءار ازاماتقا لايىقتى ءومىر!», سونداي-اق ەلىمىزدىڭ باسقا دا ستراتەگيالىق جانە باعدارلامالىق قۇجاتتارىندا العا قويىلعان», دەپ اتاپ ءوتتى ۆەدومستۆو باسشىسى.
