ايماقتار • 14 مامىر، 2021

اتىراۋ وبلىسىندا جەمقورلىق قىلمىسى ازايعان

5 رەت كورسەتىلدى

اتىراۋ وبلىسىندا جەمقورلىق قىلمىسى 41 پايىزعا ازايعان. بۇل تۋرالى سىبايلاس جەمقورلىققا قارسى كۇرەس جونىندەگى وڭىرلىك كوميسسيا وتىرىسىندا ءمالىم بولدى، دەپ حابارلايدى Egemen.kz.

وبلىس اكىمى ماحامبەت دوسمۇحامبەتوۆ وتكىزگەن كوميسسيا وتىرىسىندا «لاۋازىمدىق وكiلەتتiكتەردى تەرىس پايدالانۋ» جانە «پارا بەرۋ» سەكىلدى سىبايلاس جەمقورلىق قىلمىستارىنىڭ ءوسۋ ماسەلەسى مەن مونيتورينگ ناتيجەلەرى قارالدى. سىبايلاس جەمقورلىققا قارسى ءىس-قيمىل اگەنتتىگى اتىراۋ وبلىسى بويىنشا دەپارتامەنتىنىڭ باسشىسى قانات سۇلەيمەنوۆ وڭىردەگى جەمقورلىق قىلمىسىنا توقتالدى.

«بىلتىر وبلىستا جەمقورلىق دەڭگەيى 12%-عا، بيىلعى ءى توقساندا 41%-عا تومەندەدى»، دەدى قانات سۇلەيمەنوۆ.

ونىڭ ايتۋىنشا، قۇقىقتىق ستاتيستيكادا پاراقورلىق جانە لاۋازىمدىق وكىلەتتىگىن تەرىس پايدالانۋ دەرەكتەرى وسكەن. اسىرەسە، ىشكى ىستەر ورگانىندا پارا الۋ دەرەگى ءجيى كەزدەسكەن.

بىلتىر وسىنداي 8 قىلمىس انىقتالعان. ماحامبەت اۋدانىندا جەمقورلىققا قاتىستى 6، جىلىوي اۋدانىنىڭ ءبىلىم سالاسىندا 3 دەرەك تىركەلگەن. سونداي-اق مەملەكەتتىك ساتىپ الۋدا تاۋارلار مەن قىزمەتتەر باعاسىن نەگىزسىز ءوسىرۋ بايقالعان.

«وتكەن جىلى مەملەكەتتىك ساتىپ الۋدا باعالاردى اسىرا ءوسىرۋ دەرەگىمەن 31 زاڭ بۇزۋشىلىق انىقتالدى. وسىعان وراي بەرىلگەن ۇسىنىستار نەگىزىندە بيۋدجەتتىڭ 364 ملن تەڭگەسى ۇنەمدەلدى. مونيتورينگ جۇرگىزۋ كەزىندە زاڭ بۇزۋشىلىقتار دەنساۋلىق ساقتاۋ، ءبىلىم بەرۋ سالالارىندا ءجيى ورىن الاتىنىن بايقالدى»، دەدى سىبايلاس جەمقورلىققا قارسى ءىس-قيمىل اگەنتتىگىنىڭ اتىراۋ وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى ايدوس مامىت.

ال «اتىراۋ – ادالدىق الاڭى» جوبالىق كەڭسەسىنىڭ جەتەكشىسى ءالفيا اديەۆانىڭ ايتۋىنشا، بيىل 32 تۇرعىننان رەسمي تۇردە، ال رەسمي ەمەس تۇرعىدا 52 ارىز شاعىم تۇسكەن. ماسەلەن، ءبىلىم بەرۋ سالاسىنا 13 شاعىم، دەنساۋلىق ساقتاۋعا – 19، ازىق-ت ۇلىك باعاسىنىڭ تۇراقسىزدىعىنا – 18، ءدارى-دارمەك باعاسىنىڭ وسىمىنە قاتىستى 20 شاعىم بەرىلگەن.

«وبلىستىق دەنساۋلىق ساقتاۋ باسقارماسىنىڭ باسشىسىمەن، اتىراۋ قالاسى مەن اۋداندارداعى ەمحانا، اۋرۋحانالاردىڭ باس دارىگەرلەرىمەن كەزدەسۋ وتكىزىلدى. قازىر وبلىستىق باسقارما باسشىسىنىڭ قولداۋىمەن تەگىن بەرىلەتىن ءدارى-دارمەكتەردىڭ اشىقتىعىن قامتاماسىز ەتۋ ماقساتىندا بىرلەسكەن جۇمىس جۇرگىزىلۋدە»، دەدى ءالفيا اديەۆا.

وبلىس اكىمى ءتيىستى سالا باسشىلارىنا سىبايلاس جەمقورلىققا نەگىز بولاتىن كەلەڭسىزدىكتەردىڭ الدىن الۋدى تاپسىردى.

«سىبايلاس جەمقورلىقپەن كۇرەس – مەملەكەت باسشىسى قاسىم-جومارت توقاەۆتىڭ جولداۋىنداعى باستى ماقساتتاردىڭ ءبىرى. وسىعان وراي، سىبايلاس جەمقورلىقپەن كۇرەسۋدى ۇزدىكسىز جۇرگىزۋ، ونىڭ جولىن كەسۋ، الدىن الۋ جولدارىن كۇشەيتۋ، ءادىس-تاسىلدەرىن ءاردايىم جەتىلدىرىپ وتىرۋ قاجەت دەپ سانايمىن. جەمقورلىققا قارسى كۇرەستە بارلىق تۇلعالار زاڭ مەن سوت الدىندا تەڭ بولۋىن ەسكەرۋ قاجەت»، دەدى وبلىس اكىمى ماحامبەت دوسمۇحامبەتوۆ.

سوڭعى جاڭالىقتار

دوللار قىمباتتادى

قارجى • كەشە

ۇقساس جاڭالىقتار