پرەزيدەنت • 13 مامىر، 2021

مەملەكەت باسشىسى ERG كومپانيالار توبىنىڭ اكتسيونەرلەرىن قابىلدادى

39 رەت كورسەتىلدى

مەملەكەت باسشىسى ERG كومپانيالار توبىنىڭ اكتسيونەرلەرى الەكساندر ماشكەۆيچ پەن پاتوح شوديەۆتى قابىلدادى، دەپ حابارلايدى اقوردانىڭ ءباسپاسوز قىزمەتى.

قاسىم-جومارت توقاەۆقا تاۋ-كەن مەتاللۋرگيالىق كورپوراتسياسىنىڭ 2020 جىلعى قارجىلىق جانە وندىرىستىك قىزمەتىنىڭ ناتيجەلەرى مەن بيىلعى ءبىرىنشى توقسانداعى جۇمىسى جايىندا باياندالدى.

الەكساندر ماشكەۆيچ پەن پاتوح شوديەۆ ەۋرازيالىق توپ كاسىپورىندارىنىڭ جۇزەگە اسىرىپ جاتقان ينۆەستيتسيالىق جانە الەۋمەتتىك جوبالارى جايىندا ايتتى. ERG كومپانيالار توبى قازاقستاندا جۇمىس ىستەگەن 25 جىل ىشىندە وندىرىسكە 13 ميلليارد دوللاردان استام ينۆەستيتسيا سالعان، ال، الەۋمەتتىك باعىتقا 1 ميلليارد دوللاردان اسا قارجى جۇمساعان. بىلتىرعى جىلدىڭ قورتىندىسى بويىنشا كاسىپورىن 221 ميلليارد تەڭگە سالىق تولەگەن.

الەكساندر ماشكەۆيچ پەن پاتوح شوديەۆ قاسىم-جومارت توقاەۆقا ءوندىرىس نىساندارىندا COVID-19 ىندەتىنىڭ تارالۋىنا جول بەرمەۋگە قاتىستى قابىلدانىپ جاتقان شارالار، سونداي-اق، كورپوراتسيانىڭ پاندەميامەن كۇرەسكە قوسقان ۇلەسى جايىندا مالىمەت بەردى. ERG كومپانيالار توبى ىندەتپەن كۇرەسكە 5،6 ميلليارد تەڭگەدەن استام قارجى ءبولدى. اتالعان قارجى كومپانيا جۇمىس ىستەپ جاتقان وڭىرلەرگە ءدارى-دارمەك ساتىپ الۋعا، اۋرۋحانالاردى قاجەتتى قۇرالدارمەن جابدىقتاۋعا جۇمسالدى. بۇگىندە كاسىپورىن قىزمەتكەرلەرى ەرىكتى تۇردە كوروناۆيرۋسقا قارسى ەكپە سالدىرىپ جاتىر.

كەزدەسۋ بارىسىندا جاڭا ينۆەستيتسيالىق جوبالاردىڭ جۇزەگە اسىرىلۋى تالقىلاندى. ERG كومپانياسى جۋىق ارادا جالپى سوماسى 5،9 ميلليارد اقش دوللارى كولەمىندە ينۆەستيتسيا سالۋدى جوسپارلاپ وتىر.

مەملەكەت باسشىسى جوبالاردا قازاقستاندىق مازمۇننىڭ كولەمىن جانە بيزنەستىڭ الەۋمەتتىك جاۋاپكەرشىلىگىن ارتتىرۋعا ەرەكشە كوڭىل بولە وتىرىپ، بەلگىلەنگەن جوسپارلاردى وتە قىسقا مەرزىمدە جانە بارىنشا ءتيىمدى ورىنداۋعا شاقىردى.

سوڭعى جاڭالىقتار

ۇقساس جاڭالىقتار