پرەزيدەنت • 13 مامىر، 2021

پرەزيدەنت بىرقاتار مەملەكەتتىڭ باسشىلارىمەن تەلەفون ارقىلى سويلەستى

25 رەت كورسەتىلدى

تەلەفون ارقىلى اڭگىمەلەسۋ بارىسىندا قاسىم-جومارت توقاەۆ پەن ازەربايجان، قىرعىزستان، تاجىكستان، تۇرىكمەنستان، وزبەكستان پرەزيدەنتتەرى ءبىر-ءبىرىن قاسيەتتى ورازا ايت مەرەكەسىمەن قۇتتىقتادى. مەملەكەت باسشىسى باۋىرلاس حالىقتارعا جاقسىلىق، باق-بەرەكە تىلەدى. بۇل تۋرالى اقوردانىڭ ءباسپاسوز قىزمەتى حابارلادى.

قىرعىزستان پرەزيدەنتى سادىر جاپاروۆپەن سويلەسۋ كەزىندە قازاق-قىرعىز ستراتەگيالىق سەرىكتەستىگىن دامىتۋدىڭ وزەكتى ماسەلەلەرى تالقىلاندى. سادىر جاپاروۆتىڭ بيىلعى 2-3 ناۋرىز كۇندەرى قازاقستانعا جاساعان مەملەكەتتىك ساپارىنىڭ قورىتىندىسى بويىنشا قول جەتكىزىلگەن ۋاعدالاستىقتاردىڭ ورىندالۋىنا ەرەكشە نازار اۋدارىلدى.

سونىمەن قاتار تاراپتار ورتالىق ازياداعى بەيبىتشىلىك پەن تۇراقتىلىقتى قامتاماسىز ەتۋ ىسىندەگى تىعىز ىقپالداستىقتى جالعاستىرا بەرۋگە ۋاعدالاستى. قىرعىز كوشباسشىسى گۋمانيتارلىق كومەك كورسەتكەنى ءۇشىن قاسىم-جومارت توقاەۆقا العىس ءبىلدىردى.

پرەزيدەنت ەمومالي راحمونمەن كەلىسسوز بارىسىندا قاسىم-جومارت توقاەۆتىڭ الداعى ۋاقىتتا تاجىكستانعا جاسايتىن رەسمي ساپارىنىڭ جاي-جاپسارى قاراستىرىلدى.

پرەزيدەنتتەردىڭ پىكىرىنشە، دۋشانبەدە وتەتىن كەلىسسوزدەر قازاق-تاجىك ىنتىماقتاستىعىنىڭ كوكجيەگىن كەڭەيتۋگە مۇمكىندىك بەرەدى جانە وڭىرلىك ىنتىماقتاستىقتى جانداندىرۋ جونىندەگى جاڭا قادامداردى بەلگىلەيدى.

مەملەكەتارالىق بايلانىستاردىڭ پەرسپەكتيۆالارى دا قازاقستان مەن تۇرىكمەنستان پرەزيدەنتتەرى سۇحباتىنىڭ نەگىزگى تاقىرىبى بولدى.

قاسىم-جومارت توقاەۆ پەن گۋربانگۋلى بەردىمۇحامەدوۆ قازاق-تۇرىكمەن كوپجوسپارلى سەرىكتەستىگىن جاڭا ءارى ساپالى دەڭگەيگە جەتكىزۋگە بەيىلدى ەكەنىن ناقتىلادى. مەملەكەت باسشىلارىنىڭ پىكىرىنشە، بۇعان قازاقستان پرەزيدەنتىنىڭ الداعى ۋاقىتتا اشحابادقا جاسايتىن ساپارى ايتارلىقتاي سەپتىگىن تيگىزەدى.

مەملەكەت باسشىسىنىڭ وزبەكستان پرەزيدەنتى شاۆكات ميرزيوەۆپەن اڭگىمەلەسۋى كەزىندە دوستىق، تاتۋ كورشىلىك جانە ستراتەگيالىق سەرىكتەستىككە نەگىزدەلگەن قازاق-وزبەك قاتىناستارىنىڭ جوعارى دەڭگەيدە ەكەنى ايتىلدى.

مەملەكەت باسشىلارى ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق بايلانىستاردىڭ دامۋ قارقىنىن ساقتاۋ ماقساتىنداعى ەكى ەل ۇكىمەتتەرىنىڭ ىقپالداستىعىن اتاپ ءوتتى. قازاقستان مەن وزبەكستاننىڭ كوشباسشىلارى ورتالىق ازيا وڭىرىندەگى احۋال مەن اۋعانستان پروبلەماسى بويىنشا پىكىر الماستى.

قاسىم-جومارت توقاەۆ شاۆكات ميرزيوەۆتى بيىل قازاقستانعا ساپارمەن كەلۋگە شاقىردى.

ازەربايجان پرەزيدەنتى يلحام اليەۆپەن اڭگىمەلەسۋ كەزىندە قازاق-ازەربايجان ىنتىماقتاستىعىنىڭ بارلىق باعىتىنا تىڭ سەرپىن بەرۋ ءۇشىن الەۋەتتى بارىنشا پايدالانۋدىڭ ماڭىزدىلىعى ايتىلدى.

ءوزارا ساۋدا-ساتتىقتى ۇلعايتۋعا، ەكونوميكانىڭ نەگىزگى سالالارىنداعى بىرلەسكەن جوبالاردى ىسكە اسىرۋعا باعىتتالعان شارالار قابىلداۋ تۋرالى ۋاعدالاستىققا قول جەتكىزىلدى. قاسىم-جومارت توقاەۆ تۇركى كەڭەسىندەگى قازاقستاننىڭ باستامالارىنا قولداۋ كورسەتكەنى ءۇشىن ازەربايجاندىق ارىپتەسىنە ريزاشىلىعىن ءبىلدىردى.

سوڭعى جاڭالىقتار

ۇقساس جاڭالىقتار