قازاقستان • 13 مامىر، 2021

ەرلان قارين پرەزيدەنت شەشىمىنە قاتىستى پىكىر ءبىلدىردى

72 رەت كورسەتىلدى

اۋىل شارۋاشىلىعى جەرلەرىن شەتەلدىكتەرگە ساتۋ جانە جالعا بەرۋ تۋرالى كوپ جىلعا سوزىلعان قىزۋ تالقىعا ءبىرجولا جانە تۇبەگەيلى نۇكتە قويىلدى. بۇگىن مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى، دەپ حابارلايدى Egemen.kz.

قاسىم-جومارت توقاەۆ وسى نورمانى زاڭ جۇزىندە بەكىتۋ تۋرالى شەشىمدى بيىلعى 25 اقپاندا ۇلتتىق قوعامدىق سەنىم كەڭەسىنىڭ V وتىرىسىندا جاريالاعان بولاتىن. 

قر پرەزيدەنتىنىڭ كومەكشىسى ەرلان قارين توقاەۆ قول قويعان قۇجاتقا قاتىستى پىكىر ءبىلدىردى.

«12 ناۋرىزدا پرەزيدەنت ءتيىستى زاڭ جوباسىن پارلامەنتتىڭ قاراۋىنا ارنايى جولداعان ەدى. بۇل – پرەزيدەنتتىڭ زاڭ شىعارۋ باستاماشىلىعى بويىنشا ازىرلەنگەن العاشقى زاڭ جوباسى. سول ارقىلى قاسىم-جومارت توقاەۆ اۋىل شارۋاشىلىعى ماقساتىنداعى جەرلەردى شەتەلدىكتەرگە ساتۋعا جانە جالعا بەرۋگە تىيىم سالۋ تۋرالى ماسەلەنى ءبىرجولا شەشكىسى كەلەتىنىن ناقتى كورسەتتى»، دەپ جازدى ەرلان قارين. 

وتكەن اپتادا زاڭ جوباسى پارلامەنتتە ەگجەي-تەگجەيلى جانە جان-جاقتى تالقىلانىپ، دەپۋتاتتار ماقۇلداعان سوڭ، مەملەكەت باسشىسىنا قول قويۋعا ۇسىنىلدى.

ء«ىس جۇزىندە پرەزيدەنتتىڭ جەر تۋرالى زاڭى اۋىل شارۋاشىلىعى ماقساتىنداعى جەرلەردى شەتەلدىكتەردىڭ ساتىپ الۋىنا جانە جالعا الۋىنا توسقاۋىل قويدى. بۇل بيلىكتىڭ ءتۇرلى داقپىرت پەن قاۋەسەتكە بەرگەن ناقتى جاۋابى. سوندىقتان، وسى ماسەلە بويىنشا جۇرتتى دۇربەلەڭگە سالۋعا بۇدان بىلاي ەش نەگىز جوقتىعىنا تاعى دا باسا نازار اۋدارعىم كەلەدى»، دەپ پىكىر ءبىلدىردى پرەزيدەنت كومەكشىسى. 

 

سوڭعى جاڭالىقتار

بيىل 755 اۋىل اكىمى سايلانادى

قوعام • بۇگىن، 12:15

ۇقساس جاڭالىقتار