قازاقستان • 13 مامىر، 2021

م.تىلەۋبەردى قىتاي جانە قىرعىزستان ءسىم باسشىلارىمەن كەزدەستى

14 رەت كورسەتىلدى

«ورتالىق ازيا – قىتاي» فورماتىنداعى سىرتقى ىستەر مينيسترلەرىنىڭ 2-ءشى وتىرىسى شەڭبەرىندە قر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى قحر مەملەكەتتىك كەڭەس مۇشەسى، سىرتقى ىستەر ءمينيسترى ۆان ي جانە قىرعىز رەسپۋبليكاسىنىڭ سىرتقى ىستەر ءمينيسترى رۋسلان كازاكباەۆپەن بولەك كەلىسسوزدەر جۇرگىزدى، دەپ حابارلايدى Egemen.kz.

كەلىسسوزدەر بارىسىندا قر جانە قحر ءسىم باسشىلارى ساياسي، ساۋدا-ەكونوميكالىق جانە مادەني-گۋمانيتارلىق سالالارداعى ەكىجاقتى ىنتىماقتاستىقتىڭ كەڭ اۋقىمدى ماسەلەلەرى تالقىلاندى. مينيسترلەر حالىقارالىق وزەكتى ماسەلەلەر بويىنشا  «ساعاتتاردى تەڭەستىردى». جوعارى جانە اسا جوعارى دەڭگەيدەگى بايلانىستاردى جانداندىرۋ قاجەتتىلىگى، سونداي-اق پارلامەنتارالىق بايلانىستاردى دامىتۋدىڭ ماڭىزدىلىعى اتاپ ءوتىلدى.

ء«بىزدىڭ ەلدەرىمىز پاندەميا كەزىندە جوعارى سەنىم دەڭگەيىنە تولىق ادالدىعىن كورسەتتى. ءوزارا قولداۋ قيىن ساتتەردە ەكى ەل اراسىنداعى شىنايى دوستىق قارىم-قاتىناستىڭ ۇلگىسى بولدى»،  دەدى م.تىلەۋبەردى.

قازاقستان ءسىم باسشىسى ءوزىنىڭ ارىپتەسىن قر ۇكىمەتىنىڭ COVID-19 پاندەمياسىمەن كۇرەستەگى شارالارى جانە وتاندىق QazVac ۆاكتسيناسىن قولدانۋدىڭ باستالۋى تۋرالى حاباردار ەتتى. قازاقستان قىتايدىڭ كوروناۆيرۋستىق ىندەتكە قارسى كۇرەستەگى ماڭىزدى شارالارىن جوعارى باعالادى.

قحر سىرتقى ىستەر ءمينيسترى ۆان ي قازاقستانمەن ەكىجاقتى قارىم-قاتىناستار قىتاي ديپلوماتياسىنداعى باسىمدىقتاردىڭ ءبىرى ەكەنىن اتاپ ءوتتى. قىتاي قازاقستانمەن بارلىق سالادا ەكىجاقتى ىنتىماقتاستىقتى ىلگەرىلەتۋ ماسەلەلەرى بويىنشا جۇمىس ىستەۋگە دايىن ەكەنىن باسا ايتتى.

مينيستر ر.كازاكباەۆپەن ەكىجاقتى كەزدەسۋ بارىسىندا تاراپتار ساياسي جانە ەكونوميكالىق ىنتىماقتاستىق ماسەلەلەرىن، ونىڭ ىشىندە ەكىجاقتى تاۋار اينالىمىن ۇلعايتۋ، ءوزارا ينۆەستيتسيالاردى قورعاۋ جانە سۋ-ەنەرگەتيكا سالاسىنداعى ىنتىماقتاستىق جولدارىن تالقىلادى. ورتالىق ازياداعى احۋال، حالىقارالىق جانە ينتەگراتسيالىق بىرلەستىكتەر شەڭبەرىندەگى ءوزارا ءىس-قيمىل تۋرالى جان-جاقتى پىكىر الماستى.

م.تىلەۋبەردى ەلدەر اراسىنداعى سەنىمدى قاتىناستار الداعى ۋاقىتتا دا ءبىزدىڭ مەملەكەتتەرىمىزدىڭ ستراتەگيالىق ارىپتەستىگىن ودان ءارى تەرەڭدەتۋ، بارلىق سالالاردا سىندارلى ديالوگتى ءوسىرۋ ءۇشىن بەرىك نەگىز بولاتىنىن اتاپ ءوتتى.

سوڭعى جاڭالىقتار

دوللار قايتادان قىمباتتادى

قارجى • بۇگىن، 15:00

ۇقساس جاڭالىقتار