قازاقستان • 13 مامىر، 2021

«قازاقستانىم!» دەپ، قالامى جۇيتكىپ تۇر

20 رەت كورسەتىلدى

ماماندىعى ەكولوگ-حيميك بولعانىمەن، يۋري سەرەبريانسكي – بەلگىلى جازۋشى، اقىن، «100 جاڭا ەسىمى» جوباسىنىڭ جەڭىمپازى. مادەنيەتتانۋشىلىق قىرى جانە بار. جۋىردا ا.پۋشكين اتىنداعى وبلىستىق كىتاپحانادا دۇنيەجۇزىلىك كىتاپ كۇنىنە وراي جازۋشىمەن ونلاين فورماتتا كەزدەسۋ ءوتتى.

يۋري سەرەبريانسكيدىڭ ادەبيەتكە دەگەن قىزىعۋشىلىعى كىشكەنتايىنان باستالعان. ول قولىنا العان كىتاپتى وقىپ قانا قويماي، ءار تاقىرىپ توڭىرەگىندە ورەلى وي-تۇجىرىم جاساپ وتىراتىن. قيالى دا ۇشقىر بولىپ، ەر جەتتى. جيىرما جاسىنان باستاپ ءارتۇرلى جانردا قالام سىلتەي باستاعان. الايدا، ماماندىعى جازۋشىلىقتان الشاقتاۋ ەدى. بىرنەشە جىل قورشاعان ورتانى قورعاۋ جانە تابيعي رەسۋرستار مينيسترلىگىندە، بۇۇ دامۋ باعدارلامالارىندا حالىقارالىق ەكولوگيالىق زاڭنامانىڭ ساراپشىسى رەتىندە جۇمىس ىستەدى.

كەيىن جەكە كاسىپكەرلىكپەن اينالىسۋعا بەل بۋعان. كاسىپكەرلىكپەن قاتار، قولىنا قالامىن قايتا العان. شىعارماشىلىققا شىنداپ كىرىسپەس بۇرىنولگا ماركوۆانىڭ جەتەكشىلىگىندەگى «مۋساگەت» قوعامدىق قورىنىڭ ادەبي كۋرستارىندا ءبىلىمىن جەتىلدىرگەن. ءبىلىم دەمەكشى، پولشانىڭ ولشتىن قالاسىنداعى ۆارمينسك-مازۋر ۋنيۆەرسيتەتىن مادەنيەتتانۋشى، مادەنيەتارالىق قاتىناستار ماماندىعى بويىنشا تامامداعان. ونىڭ تالانتى رەسەيدە، قازاقستاندا، پولشادا بىرنەشە رەت مويىندالىپ، كوپتەگەن ماراپاتقا يە بولعان.

ايتا كەتسەك، «كنيگا و ۆكۋسنوي ي زدوروۆوي كازاحستانسكوي ليتەراتۋرە» اتتى كىتابى بيىل ء«بىر ەل – ءبىر كىتاپ» اكتسياسىنىڭ تىزىمىنە ەندى. «Destination. دوروجنايا پاستورال» پوۆەسى اباي اتىنداعى قازۇپۋ فيلولوگيا كۋرسىنىڭ وقىتۋ باعدارلاماسىنا ەنگىزىلگەن. ال «پراجاكي» پوۆەسى وقۋشىلاردىڭ ورىس تىلىنەن اشىق حالىقارالىق وليمپياداسى باعدارلاماسىندا پايدالانىلعان.

– مەن ينجەنەر-گەولوگتاردىڭ وتباسىسىندا دۇنيەگە كەلدىم. كىتاپتى باس الماي وقىدىم دەسەم، ارتىق ايتپايمىن. وسە كەلە جازۋعا تالپىندىم. 1997 جىلى ءال-فارابي اتىنداعى قازاق ۇلتتىق ۋنيۆەرسيتەتىن حيميك-ەكولوگ ماماندىعى بويىنشا ءبىتىرىپ، ءبىراز ۋاقىت ءوز سالامدا ەڭبەك ەتتىم. شىنىن ايتقاندا، تۇككە پايداسى جوق قاعاز جۇمىستارى ۋاقىتىمدى ۇرلاپ جاتقانداي كورىندى. مەن ءۇشىن ءار مينۋت ماڭىزدى. ولشەپ بەرىلگەن التىن ۋاقىتتى پايداسىز ىسكە جۇمساعىم كەلمەدى. سوندىقتان دا جانىم سۇيەتىن جۇمىسپەن اينالىسۋعا بەل بۋدىم، – دەپ اعىنان جارىلدى يۋري سەرەبريانسكي.

 جازعان سايىن قىزمەتى دە وسى سالاعا ويىسا باستاعان. 2012 جىلدان باستاپ قازاقستانداعى پولياك دياسپوراسىنىڭ «Ałmatyński Kurier Polonijny» جۋرنالىنىڭ رەداكتورى قىزمەتىنە تۇرىپ، قازاقستان، رەسەي جانە پولشاداعى باسىلىمدارمەن ىنتىماقتاسا باستاعان. تاجىريبەسى تولىسقان سوڭ ەكى جىلداي الماتىداعى اشىق ادەبيەت مەكتەبىندە وقىتۋشى بولىپ جۇمىس ىستەدى.

پروزاشى جانە اقىن رەتىندە شىعارمالارى «پروستور»، «كنيگوليۋب»، «درۋجبا نارودوۆ»، «زناميا»، «ۆوزدۋح»، «دەن ي نوچ»، «نوۆايا يۋنوست»، «پرولوگ»، «يۋنوست»، «نوۆايا رەالنوست» سىندى ادەبي جۋرنالداردا جاريالانىپ تۇرادى.

2013 جىلى يۋري سەرەبريانسكي «Fashion TV Award» حالىقارالىق ماراپاتىنا ۇسىنىلىپ، جەڭىمپاز بولعانىن دا ايتۋعا بولادى. الايدا، كەيبىر دەرەكتەردە يۋ. سەرەبريانسكي پولياك جازۋشى دەپ تانىستىرىلىپ ءجۇر. پولشالىقتاردىڭ دا سۇيىكتى جازۋشىسى ەكەنى بەلگىلى، بىراق كىندىگى قازاقستانعا بايلانعان. ءتىپتى «پراگاكي» پوۆەسىن پولشادا جازعانىمەن، ول – قازاقستان تۋرالى شىعارما.

سوڭعى جاڭالىقتار

دوللار قايتادان قىمباتتادى

قارجى • بۇگىن، 15:00

ۇقساس جاڭالىقتار