كورشىلەس مەملەكەتتىڭ كەمەسىن قۇرىق پورتىنىڭ باس ديرەكتورى سەرىك احمەتوۆ باستاعان پورت اكىمشىلىگى جانە ماڭعىستاۋ وبلىسى اكىمىنىڭ ورىنباسارلارى ابزال مەڭدىباەۆ, بەكبول ورىنباساروۆ جانە اقتاۋ, باۋتين پورتتارى تەڭىز اكىمشىلىگىنىڭ باسشىسى نۇربول ەرمانوۆ قارسى الدى.
«بۇل – ءبىزدىڭ پورت ءۇشىن تاريحي كۇن. اتالعان پاروم – جاڭا تيپتەس, جاڭا ستاندارتتار بويىنشا قۇراستىرىلعان وزگەشە سيپاتتاعى كەمە. بۇعان قوسا, جولاۋشىلاردىڭ قولايلىلىعى ءۇشىن ايرىقشا جاعداي جاسالعان. بۇل ازەربايجان مەن قازاقستان اراسىنداعى پارومدى حابارلامانى دامىتۋعا زور ۇلەس قوسادى دەپ ويلايمىن», دەپ اتاپ ءوتتى «قۇرىق پورتى» جشس باس ديرەكتورى سەرىك احمەتوۆ.
Ro-Pax ءتيپتى كەمەلەردىڭ ۇزىندىعى - شامامەن 154,5 مەتر, ەنى - 17,7 مەتر جانە بيىكتىگى - 7,5 مەتر. ەكيپاجى 30 ادام بولاتىن كەمەلەر 14 توراپ جىلدامدىعىمەن جۇزە الادى. «ازەربايجان» پارومىنىڭ بورتىندا 40 جۇك جانە ءارتۇرلى جۇگى بار 19 جەڭىل اۆتوكولىك بار. ەكيپاج - 28 ادام. سونداي-اق 47 جولاۋشى كەلدى.
RO-Pax تيپىندەگى جاڭا كەمەلەر جۇك كوتەرگىشتىگى كاسپيدەگى پارومدارعا قاراعاندا ۇلكەن جانە 100 جولاۋشىنى, 56 ۆاگون-تسيستەرنانى نەمەسە 50 اۋىر جۇك كولىگىن تاسىمالداۋعا شاماسى كەلەدى. قۇرىق پورتىن پايدالانۋ باستالعاننان بەرى 2 مىڭنان استام كەمە وڭدەلگەن, 6 ملن توننادان استام جۇك تيەلگەن. قازىرگى ۋاقىتتا پورت ارقىلى قازاقستاندىق استىق, كومىر, مۇناي ونىمدەرى, تىڭايتقىش, حيميكاتتار ەكسپورتتالادى. يمپورت ازىق-ت ۇلىك ونىمدەرى, ونەركاسىپتىك جابدىقتار, قۇرىلىس ماتەريالدارى جانە باسقا دا جۇكتەن تۇرادى.
