بۇقارالىق اقپارات قۇرالدارىنا سۇيەنسەك, تاتارستان پرەزيدەنتى رۋستام ميننيحانوۆ سەگىز ادامنىڭ, ال قازان قالاسىنىڭ اكىمشىلىگى 11 ادامنىڭ كوز جۇمعانىن مالىمدەدى.
ر.ميننيحانوۆتىڭ ايتۋىنشا, اتىس كەزىندە مۇعالىم جانە جەتى بالا اجال قۇشتى. قالا اكىمشىلىگىنىڭ دەرەگىنە قاراعاندا, بارلىعى ون ءبىر ادام, سونىڭ ىشىندە ەكى وقۋشى ءۇشىنشى قاباتتان سەكىرىپ, كوز جۇمعان.
تاسس اگەنتتىگىنىڭ حابارلاۋىنشا, وننان استام وقۋشى اۋرۋحاناعا تۇسكەن. بارلىعى 30 ادام زارداپ شەككەن.
سوڭعى مالىمەت بويىنشا, وق جاۋدىرعان قاسكوي شابۋىلدى جالعىز ءوزى ۇيىمداستىرعان. ول – 19 جاستاعى يلناز گالياۆيەۆ ەسىمدى ءجاسوسپىرىم. ءتارتىپ ساقشىلارى ونى قاماۋعا الدى. ول بۇرىن وسى مەكتەپتە وقىعان, بىراق قازىر تەحنيكۋمدا ءبىلىم الىپ جۇرگەن. ول پوليتسياعا ۇيىنە بومبا قويىلعانىن حابارلاعان.
وقيعا ورنىنا بارعان پرەزيدەنت رۋستام ميننيحانوۆ ۇستالعان ادامنىڭ 19 جاستا ەكەنىن راستاعان. مەكتەپكە ساباق كەزىندە شابۋىل جاسالعان. وندا مىڭنان استام بالا وقيدى.
كۋاگەرلەر مەكتەپتە اتىستان بولەك, جارىلىس تا بولعانىن ايتادى. Baza سايتى مەكتەپتەن تۇسىرىلگەن دەلىنگەن بەينەجازبا جاريالادى. وندا «جارىلىستان كەيىنگى» قيراعان مەكتەپ كورىنەدى.
وسى وقيعادان كەيىن رەسەي پرەزيدەنتى ۆلاديمير پۋتين ازاماتتىق قارۋ اينالىمى ەرەجەلەرىن شۇعىل تۇردە قاتاڭداتۋدى تاپسىردى. ۇستالعان گالياۆيەۆكە پسيحولوگيالىق-پسيحياتريالىق ساراپتاما تاعايىندالدى. مەكتەپ اكىمشىلىگىنىڭ دەرەگى بويىنشا, ول وسى مەكتەپتى ءتورت جىل بۇرىن بىتىرگەن. قازىر وقيعا ورنىندا كونترتەرروريستىك وپەراتسيا ءجۇرىپ جاتىر.
باستاپقىدا شابۋىلدى ءبىر ادام جاساعانى ايتىلعان ەدى. بىراق كەيىننەن «ريا نوۆوستي» قازاندا ارنايى وپەراتسيا كەزىندە بالالارعا وق جاۋدىرعان ەكىنشى كۇدىكتىنىڭ كوزى جويىلعانىن حابارلادى.
«360» تەلەارناسىنىڭ دەرەككوزى شابۋىل ساباق كەزىندە باستالعانىن ايتادى. بالالار سيگنال العان بويدا جەرگە جاتا قالعان. مەكتەپتە مىلتىق داۋسى ەستىلىپ تۇرعان. وقۋشىلار مەن مۇعالىمدەردى ەۆاكۋاتسيالاۋعا قۇتقارۋشىلار مەن ومون كومەكتەسكەن.
وسى قاندى وقيعادان كەيىن تاتارستاندا 12 مامىر ازا تۇتۋ كۇنى بولىپ جاريالاندى. سونداي-اق بۇل كۇنى مەكتەپتەردە ساباق بولمايدى. تاتارستان پرەزيدەنتى رۋستام ميننيحانوۆتىڭ تاپسىرماسى بويىنشا رەسپۋبليكا ۇكىمەتى №175 قازان گيمنازياسىندا بولعان قايعىلى جاعدايدان قازا تاپقاندار مەن زارداپ شەككەندەردىڭ وتباسىلارىنا وتەماقى تاعايىندايدى. بۇل تۋرالى تاتارستان رەسپۋبليكاسىنىڭ پرەزيدەنتى ءباسپاسوز قىزمەتىنىڭ جەتەكشىسى ليليا گاليموۆا حابارلادى.
