ايماقتار • 11 مامىر، 2021

نۇر-سۇلتاندا وڭالتۋ ورتالىقتارىنىڭ جەلىسى كەڭەيتىلدى

55 رەت كورسەتىلدى

نۇر-سۇلتاندا تاۋەلسىزدىك سارايىنىڭ بازاسىندا جاڭا شىعارماشىلىق ورتالىق جۇمىس ىستەيدى، وعان ەرەسەكتەر دە، بالالار دا قاتىسا الادى، دەپ حابارلايدى Egemen.kz.

جاڭا دەمالىس ورنىندا گيمناستيكا ورتالىعى، زاماناۋي جانە سپورتتىق بي فەدەراتسياسى، شاحمات اكادەمياسى، «التىن دومبىرا» شىعارماشىلىق ورتالىعى جانە ۆوكالدىق ستۋديا بار. ورتالىق 1 مىڭعا جۋىق تۇرعىندى قامتۋعا مۇمكىندىك بەرەدى.

بۇل شىعارماشىلىق ورتالىقتىڭ باستى ارتىقشىلىعى – ەرەكشە قاجەتتىلىگى بار بالالار زاماناۋي جانە سپورتتىق بيلەرمەن تەگىن اينالىسا الادى.

«تاۋەلسىزدىك سارايىندا جۇرگىزىلگەن جاڭا جوبانىڭ ارقاسىندا بالالار جاقسى جاعدايدا جاتتىعاتىن بولدى. ءبىز ەلوردادا ەرەكشە قاجەتتىلىكتەرى بار بالالار بي بيلەي الاتىن جاڭا ورتالىقتىڭ پايدا بولعانىنا قۋانىپ وتىرمىز. بۇل بالالاردىڭ دەنساۋلىعىنا اسەر ەتىپ قانا قويماي، ولاردىڭ الەۋمەتتەنۋىنە جاردەم ەتەدى. ەڭ قىزىقتى جوبالاردىڭ ءبىرى – «اربامەن بيلەۋ» جوباسى. بۇل – بالالارعا بي مەن شىعارماشىلىق ارقىلى وزدەرىنىڭ جاڭا قىرىن اشۋىنا مۇمكىندىك بەرەتىن ينكليۋزيۆتى جوبا. بالالار قوعامنان الشاقتاماي، ءبىر مۋزىكامەن، كەرەمەت ءبىر الاڭدا بيلەيدى. بالالاردى 4 جاستان باستاپ قابىلدايمىز»، دەدى زاماناۋي جانە سپورتتىق بي فەدەراتسياسىنىڭ پرەزيدەنتى ءاليا تۇسىپبەكوۆا.

قازىرگى زامانعى جانە سپورتتىق بي فەدەراتسياسىندا اتاپ وتكەندەي، جۇمىستار ۇزاق مەرزىمدى پەرسپەكتيۆادا جۇرگىزىلەتىن بولادى، ويتكەنى فەدەراتسيا ەرەكشە قاجەتتىلىكتەرى بار بالالاردى حالىقارالىق چەمپيوناتتارعا، اربامەن بيلەۋ بويىنشا قر كۋبوگىنا دايىندايدى.

سونىمەن قاتار، ورتالىقتا كوركەم گيمناستيكاعا قىزىعۋشىلىق تانىتقان قىزدار ءۇشىن بارلىق جاعداي جاسالعان.

«بىزدە سپورتتىق گيمناستيكامەن 400-دەن استام سپورتشى اينالىسادى. ولارمەن توپتاسىپ تا، جەكە دە جۇمىس ىستەيمىز. قازىر 54 سپورتشىمىز قر قۇراماسىنا كىرەدى. مەكتەبىمىزگە تەك ىرىكتەۋ ارقىلى كىرۋگە بولادى. ىرىكتەۋدى جىل سايىن تامىز ايىندا وتكىزەمىز. ءبىزدىڭ قىزدار 6 جاستان باستاپ اينالىسادى. قازىر مۇندا ءتيىستى جاعدايدىڭ ءبارى جاسالعان، زالدا 9 كىلەم الاڭى بار، ياعني ناتيجەلەر ەندى تىپتەن جاقسارا تۇسەدى. بالالارىمىز ەلىمىزدىڭ نامىسىن قورعاپ، تۋىمىزدى حالىقارالىق ارەنالاردا جوعارى كوتەرەدى»، دەپ اتاپ ءوتتى №1 مامانداندىرىلعان بالالار مەن جاسوسپىرىمدەر سپورت مەكتەبىنىڭ اعا جاتتىقتىرۋشىسى مەرۋەرت بالعىمباەۆا.

ەرەسەكتەر «التىن دومبىرا» شىعارماشىلىق ورتالىعىنا، شاحمات اكادەمياسىنا جانە بي فەدەراتسياسىنا بارا الادى.

ەلوردا اكىمدىگى مەملەكەت باسشىسىنىڭ تاپسىرماسى بويىنشا وڭالتۋ كلينيكالارىنىڭ جەلىلەرىن كەڭەيتۋ بويىنشا جۇيەلى جۇمىس جۇرگىزۋدە. ەلوردادا پاراليمپيادالىق جاتتىعۋ ورتالىعىمەن بىرگە ەرەكشە قاجەتتىلىكتەرى بار ادامدارعا ارنالعان سپورت كەشەنى سالىنادى، ال وسى جىلدىڭ ءبىرىنشى جارتىسىندا كورۋ قابىلەتى بۇزىلعان بالالارعا ارنالعان مامانداندىرىلعان بالاباقشا اشىلادى.

وتكەن جىلى نۇر-سۇلتاندا بىرقاتار وڭالتۋ ورتالىعى اشىلدى، ينۆاتاكسي سانى ەكى ەسەدەن استام ۇلعايدى، سونداي-اق مەكتەپتەردە ەرەكشە قاجەتتىلىكتەرى بار بالالارعا ارنالعان قوسىمشا تۇزەتۋ كابينەتتەرى اشىلدى.

سوڭعى جاڭالىقتار

ۇقساس جاڭالىقتار