تاۋسىلا سويلەۋىمىزگە موبيلدىك توپتار قاۋىپ-قاتەرمەن كىرپىك ىلمەي كۇرەسسە دە, ءىس ناتيجەسى ءالى دە كوڭىل كونشىتپەي وتىرعانى سەبەپشى بولۋدا. ماسەلەن, وبلىستا كارانتيندىك ءتارتىپ ساقتاۋ كەرەك ەكەنىن جاعى تالعانشا ايتىپ, اياعى تالعانشا قاداعالاپ جۇرگەن 213 موبيلدىك توپ قاڭتار ايىنىڭ باسىنان ءساۋىردىڭ سوڭىنا دەيىن 15 مىڭعا جۋىق نىساندى تەكسەرىپ, كارانتين تالابىن بۇزۋدىڭ 279 وقيعاسىن انىقتاعان. ءتارتىپ بۇزۋشىلارعا 345 اكىمشىلىك ايىپپۇل سالىنعان. ايىپپۇل كولەمى 39 ملن تەڭگەدەن استام قاراجاتتى قۇرايدى.
جەر بەتىن جامان تۇماۋ جايلاعالى قالتانىڭ ءتۇبى قاعىلىپ, كۇنكورىسىمىز قيىنداپ كەتتى دەپ ەڭىرەگەندە, ەتەگىمىز جاسقا تولعانىمەن, استا-توك توي-تومالاق, ەسىك-تەرەزەنى قىمتاپ وتكىزەتىن «قۋلىق» قۇدالىق, جاماعاتتىڭ قاتارى سيرەگەنىمەن, وتكىزىلىپ جاتقان جانازا اس باياعى قوي ۇستىنە بوزتورعاي جۇمىرتقالاعان زامانداعىداي. ءسوزىمىزدى ناقتى دەرەكتەرمەن شەگەندەيتىن بولساق, ءساۋىر ايىندا عانا وبلىستا 3 289 نىسان تەكسەرىلىپ, كارانتين تالاپتارىنىڭ 47 رەت بۇزىلعاندىعىن ايتا كەتۋگە ءتيىستىمىز. ورىن العان شەتىن وقيعالارعا بايلانىستى 47 اكىمشىلىك حاتتاما تولتىرىلىپ, 5 ملن 323 مىڭ تەڭگە كولەمىندە ايىپپۇل الىنعان. ۇستالىپ ۇياتتى بولىپ, ايىپ-ايباناسىن تولەپ جاتقاندار تۋرالى كوپشىلىك قۇلاعدار بولعانىمەن, ءالى دە ايىلىن جياتىن ەمەس.
حالىق العاشقى بەتتە جامان تۇماۋدىڭ جاردى جىعارداي ەكپىنىنەن سەسكەنىپ, ءۇرپيىپ قالعان. كادىمگىدەي قاۋىپتەنىپ, توي مەن قۇدالىق ساپ تىيىلىپ, ەت جاقىن اعايىننىڭ قازاسىنا بايلانىستى تەلەفونمەن كوڭىل ايتىپ, باتانى ەسەپشوت ارقىلى اۋدارىپ, ەسىك-تەرەزەسىن تارس بەكىتىپ, تىيىلىپ ەدى. كەيىن ەت ۇيرەندى. كەيبىرەۋلەر ءتىپتى قاسىرەتتى دەرتتىڭ بوساعاسىنان سىعالاپ تۇرعانىن ەلەمەيتىن, كورمەيتىن دەڭگەيگە جەتتى. قازىر كوشەدە بەتپەردە تاقپاي, جوسىپ جۇرگەن ادام كوپ. جاي جۇرگەنى ەشتەڭە ەمەس-اۋ, ادام كوزىنەن تاسا, قاعابەرىستەگى ءدامحانالار مەن كوتتەدجدەردى جالعا الىپ, تۋعان كۇن مەن تۇساۋكەسەرىن, سۇندەت تويى مەن قۇدالىعىن تويلاپ جاتىر. ورازانىڭ ىشىندە اۋىزاشارعا شاقىرۋ نە ءسان. وبلىس ورتالىعىنداعى «گاۆان», «وازيس» ءدامحانالارى, «كوكشەتاۋ» مەيرامحاناسى, تاۋلىك بويى جۇمىس ىستەيتىن اسحانا كارانتين تالاپتارىن ورەسكەل بۇزعان. ولارعا 131 265 تەڭگە كولەمىندە ايىپپۇل سالىنعان.
ويىن-ساۋىق ورىندارى دا «دەرت ءورشىپ كەتپەسىنشى, جۇرتقا زيانىمىزدى تيگىزبەيىكشى» دەپ ويلامايتىن ءتارىزدى. ارينە, ولاردىڭ دا تابىس تابۋى كەرەك ەكەنىن تۇسىنەمىز. تىرنەكتەپ جينايتىن تيىن ءبىر باسقا دا, ادام دەنساۋلىعى, ونىڭ قاۋىپسىزدىگى ءبىر باسقا. ەرەسەكتەرمەن بىرگە بالالار باس قوساتىن ويىن-ساۋىق ورىندارى دا قاۋىپتى دەرتتىڭ قاسىرەتىن قالىڭداتۋدا. ايتالىق, «وگو-گو» بالالار ويىن-ساۋىق ورتالىعى كارانتين تالاپتارىن ەسكەرمەي, جۇمىس جۇرگىزىپ كەلگەن. «7 لۋزا» بيليارد زالى, «ايۆا» مەيرامحاناسى, «مويا سەميا» ساۋدا ءۇيى, «شالقار» ساۋدا ورتالىعى, «كەرەي» كوفەينياسى, «لامپا» بارى ءتارىزدى بىرنەشە ساۋدا ورتالىقتارى مەن مەيرامحانالارىنىڭ, ويىن-ساۋىق ورتالىقتارىنىڭ كارانتين تالاپتارىن ورەسكەل بۇزا وتىرىپ, جۇمىس ىستەگەنى انىقتالىپ وتىر. وسى ورايدا كارانتين تالاپتارىن بۇزعاندارعا 1 ملن 852 مىڭ تەڭگە كولەمىندە ايىپپۇل سالىنعانىن ايتا كەتەلىك. ارينە, ايىلىن جيىپ, تارتىپكە كوندىگۋ ءۇشىن ايىپپۇل سالىنۋ كەرەك. ال ەگەر مۇنداي مويىنسۇنباۋ, ەركىنسۋ بىرنەشە مارتە قايتالانسا شە؟
ايىپپۇل سالۋمەن ءىس بىتپەيتىندىگى انىق. ءبىر رەت ەسكەرتكەننەن كەيىن بولار-بولماس ايىپپۇل قاراجاتىن تولەپ, قايتادان ەسكى اۋەنىنە باساتىن بولسا, قولدانىلار شارانى قاتايتقان ءجون بولار. دەرتتىڭ جۇعۋى قاس قاعىم ساتتە ەكەنى قانشا ايتىلسا دا, ءوز باستارىن قاتەرگە تىگۋدىڭ مىسالى از ەمەس. ايتالىق, وبلىس ورتالىعىنداعى سىرىمبەت كوشەسىندە ورنالاسقان كوتتەدجدە تۋعان كۇن تويلانعان. دەرت كەزىندەگى دىردۋعا وتىزدان استام ادام قاتىسىپتى. اراسىندا سيمپتومسىز جالعىز سىرقات بولسا جەتىپ جاتىر. ال سول وتىز ادامنىڭ وتباسى, بالا-شاعاسى بار. ولارعا دا جۇقپاسىنا كىم كەپىل؟!
كارانتين تالاپتارىن بۇزۋ وبلىستىڭ بارلىق اۋدانىندا دەرلىك ورىن الىپ وتىرعانىن ايتا كەتۋىمىز كەرەك. حالقى تىعىز قونىستانعان تسەلينوگراد اۋدانىندا ءساۋىر ايىندا 70 نىسان تەكسەرىلسە, كارانتين تالاپتارىن بۇزۋدىڭ 6 وقيعاسى ورىن العان. قاۋىپتى ەلەمەي, قاتەردى قالىڭداتىپ وتىرعاندار – «قاجىمۇقان», «اقتالاپ», «اقمول» ءتارىزدى مەيرامحانالار. ال قاراوتكەل اۋىلىندا كوكپار وتكىزىلگەن. كوكپاردىڭ كورەرمەنسىز وتكىزىلمەگەنى بەلگىلى. مىنە, وسىنداي كوپشىلىك ءىس-شارالار وتكىزگەن ءۇشىن 1 ملن-نان استام تەڭگە ايىپپۇل سالىنعان. «زولوتوي فازان» دەمالىس ايماعى مەن قوياندى اۋىلىنداعى «ارىستان» ءدامحاناسى دا وسى قاتاردان تابىلعان. بۇلارعا دا ايىپپۇل سالىنعان.
ەل ىشىندەگى ەتەك الىپ بارا جاتقان ىندەتتى ەلەمەۋ, دەرت وشاعىن كورىنەۋ كوزگە كوبەيتۋ ەكەنى ءسوزسىز. ايىپپۇل ارقالاعانداردى تىزە بەرگەننەن ەشتەڭە ۇتپايمىز. شيىرا ايتقاندا, ءالى دە باتپانداپ كىرەتىن ىندەتتىڭ بايىبىنا بارا الماي وتىرعاندىعىمىز اقيقات. ءوزىمىزدى ءوزىمىز ويلاماساق تا, وزگەنىڭ, قاسىمىزدا جۇرگەن ادامداردىڭ اماندىعىن ويلايتىن ۋاقىت جەتكەن ءتارىزدى.
اقمولا وبلىسى
