سپورتتىق شارانى الماتى قالاسى اكىمدىگى, ءال-فارابي اتىنداعى قازۇۋ جانە قالالىق ۆولەيبول فەدەراتسياسىنىڭ قولداۋىمەن «بۋرەۆەستنيك-الماتى» سپورت كلۋبى ۇيىمداستىرىپ وتىر.
الاڭعا وزبەكستان, قىرعىزستان جانە ەل ايماقتارىنان كەلگەن 60 جاسقا دەيىنگى جاس ساناتتارداعى اۋەسقوي ەرلەر, ايەلدەر جانە ارالاس 60-تان استام كوماندا جينالدى.
سالتاناتتى ءراسىمدى ءال-فارابي اتىنداعى قازۇۋ باسقارما باسشىسى-رەكتورى جانسەيىت تۇيمەباەۆ اشىپ, اقىندى مەرەيتويىمەن قۇتتىقتادى.
ولجاس ومار ۇلىنىڭ اسقاق رۋحتى شىعارمالارىمەن مەملەكەت جانە قوعام قايراتكەرى رەتىندە اتقارعان ەرەن ەڭبەگىنە توقتالىپ, اقىن تۇلعاسى بارشا قازاقستاندىقتار ءۇشىن جارقىن ۇلگى ەكەنىن اتاپ ءوتتى.
كەلەسى كەزەكتە ارداگەرلەر كەڭەسىنىڭ گەنەرالى امانگەلدى قۇرماناليەۆ, «بۋرەۆەستنيك» سك پرەزيدەنتى, گەنەرال-لەيتەنانت امانگەلدى شابدارباەۆ جانە كسرو مەن قازاقستاننىڭ ەڭبەك سىڭىرگەن جاتتىقتىرۋشىسى, پروفەسسور زاڭعار جاركەشەۆتىڭ جۇبايى – زۋلفيا جاركەشەۆاعا ءسوز سويلەپ, جارىسقا قاتىسۋشىلارعا ساتتىلىك تىلەدى.
ولجاس ومار ۇلىنىڭ بالا كەزىنەن ۆولەيبول, گيمناستيكا, بوكس جانە كۇرەستەن ءبىرىنشى رازريادقا يە ەكەندىگى ايتىلىپ, ۆولەيبولعا دەگەن قۇشتارلىعىن «بۋرەۆەستنيك» سپورت كلۋبىمەن بايلانىستىرىلدى.
قۇرمەتتى قوناقتار قاتارىندا ارداگەرلەر كەڭەسىنىڭ گەنەرالى بولاتبەك بۇلعاقباەۆ, گەنەرال-مايور ناعاشىباي اتشاباروۆ, قر مەملەكەتتىك قىزمەت ىستەرى اگەنتتىگىنىڭ الماتى وبلىسى بويىنشا دەپارتامەنت باسشىسى سەرىكباي نۇرعيساەۆ, قازاقستاننىڭ قىرعىزستانداعى ەلشىسى ءراپىل جوشىباەۆ, گەنەرال اليك شپەكباەۆ, «القا» حالىقارالىق مادەنيەت قورىنىڭ پرەزيدەنتى الۋا تاڭجارىقوۆا, سونىمەن قاتار سوعىس جانە ەڭبەك ارداگەرلەرى, قازۇۋ-دىڭ اقساقالدار كەڭەسىنىڭ مۇشەلەرى بولدى.
ولجاس سۇلەيمەنوۆ ءوز كەزەگىندە ادام بالاسىنىڭ عارىشقا تۇڭعىش ۇشۋىن جىرلاعان «ادامعا تابىن جەر ەندى» ولەڭىن شابىتتانا وقىپ, بارلىق ازاماتتارعا جىلى لەبىزدەرى ءۇشىن العىسىن جەتكىزدى.
سونداي-اق جيىندا ولجاس سۇلەيمەنوۆ قازاقستان ۇلتتىق ليگاسىنىڭ ۆولەيبولدان چەمپيون كۋبوگىن «بۋرەۆەستنيك» اعا كومانداسىنا سالتاناتتى تۇردە تابىستادى. ال قازاقستان جوعارى ۆولەيبول ليگاسىنداعى «بۋرەۆەستنيك» جاسوسپىرىمدەر كومانداسىنا قازۇۋ رەكتورى جانسەيىت تۇيمەباەۆ چەمپيون كۋبوگىن ۇسىندى.
قوناقتار قازۇۋ-دا اشىلعان ەلباسى ساياباعىنا كوشەتتەر وتىرىزىپ, ولجاس سۇلەيمەنوۆتىڭ جەكە اعاشى پايدا بولدى.
اقىن قۇرمەتىنە ۇيىمداستىرىلعان جوبا سالاۋاتتى ءومىر سالتىن ناسيحاتتاۋ, بۇقارا اراسىندا جاعاجاي ۆولەيبولىن دامىتۋعا باعىتتالدى.
تۋرنير ينتەرناتسيونال فەدەراتسياسى (FIVD) بەكىتكەن جاعاجاي ۆولەيبولىنىڭ رەسمي ەرەجەلەرى بويىنشا 7-10 مامىر ارالىعىنا جوسپارلانعان. جەڭىمپازدار مەدالدارمەن, ديپلومدارمەن جانە قارجىلاي سىيلىقتارمەن ماراپاتتالادى. سونىمەن قاتار العاشقى ورىن العان ەكى كومانداعا قازۇۋ رەكتورىنىڭ جەكە قارجىلاي سىيلىعى تاعايىندالىپ وتىر.
كارانتين تالاپتارىنا سايكەس, شارا كورەرمەنسىز اشىق الاڭدا ءوتىپ جاتىر.
ايتا كەتسەك, ولجاس سۇلەيمەنوۆ – قازۇۋ-دىڭ تانىمال ءارى قۇرمەتتى تۇلەگى. ۋنيۆەرسيتەتتە «ولجاس سۇلەيمەنوۆ لينگۆيستيكالىق عىلىمي-زەرتتەۋ ورتالىعى» جۇمىس ىستەيدى. وندا تىڭ عىلىمي جوبالار تابىستى جۇزەگە اسىرىلىپ وتىر.
الماتى
