ايماقتار • 06 مامىر، 2021

اتىراۋدا چەمپيوندى ءولتىردى دەپ ايىپتالعان ەكى پوليتسەيگە سوت ۇكىمى شىقتى

439 رەت كورسەتىلدى

اتىراۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا گرەپپلينگتەن 18 جاسار الەم چەمپيونى ەسەنبەك سيگۋاتوۆتى ءولتىردى دەپ ايىپتالعان بۇرىنعى ەكى پوليتسيا قىزمەتكەرىنە ۇكىم شىقتى، دەپ حابارلايدى Egemen.kz

23 جاستاعى ب.م. ەسىمدى ايىپتالۋشى قر قك 99-بابى 2-بولىگىنىڭ 6 جانە 9-تارماقتارى (باسقا ادامداردىڭ ومىرىنە قاۋىپتى تاسىلمەن، بۇزاقىلىق نيەتپەن جاسالعان كىسى ءولتىرۋ) بويىنشا كىنالى دەپ تانىلىپ، توتەنشە قاۋىپسىزدىك كولونياسىندا جازاسىن وتەي وتىرىپ، 15 جىلعا باس بوستاندىعىنان ايىرىلدى. ال 26 جاستاعى ب.د. ەسىمدى ازامات 432-بابى بويىنشا (قىلمىستى جاسىرىپ قالۋ) كىنالى دەپ تانىلىپ، 3 جىلعا تۇرمەگە توعىتىلدى.

«سوتتالۋشى ب.م. بۇزاقىلىق نيەتپەن، جالپى قابىلدانعان مىنەز-ق ۇلىق نورمالارىن ەلەمەي جانە اينالاسىنداعىلارعا قۇرمەتسىزدىك ءبىلدىرىپ، قوعامدىق ءتارتىپتى ورەسكەل بۇزا وتىرىپ، سيگۋاتوۆقا 12 كاليبرلى اڭشىلىق مىلتىقتان بىرنەشە رەت وق اتقان»، دەدى سۋديا تىنىشتىق نۋريموۆا.

سونىمەن قاتار، سوتتالۋشىلار جابىرلەنۋشى تاراپقا 10 ملن تەڭگە كولەمىندە مورالدىق شىعىن وتەۋى ءتيىس. دەسە دە، مارقۇمنىڭ تۋىستارى ۇكىممەن كەلىسپەيدى. ولاردىڭ پىكىرىنشە، اتالعان ۇكىم تىم جۇمساق.

– سوت پروتسەسىندە ب.د. پوليتسيا قىزمەتكەرى رەتىندە وتكەن. الايدا، ۇكىمدە اتىراۋ قالاسىنىڭ تۇرعىنى رەتىندە كورسەتىلگەن. مۇنى قالاي تۇسىنۋگە بولادى؟ ول 432-باپ بويىنشا ەڭ ۇزاق مەرزىمدى الۋى كەرەك ەدى، ياعني 6 جىل.  ەكىنشى سوتتالۋشى دا كەم دەگەندە – 20 جىل الۋى كەرەك ەدى. ايتسە دە، وسى باپ بويىنشا ەڭ از مەرزىم – 15 جىل. ونىڭ ايتۋىنشا، پوليتسەي كوشە بويىنان اڭشى مىلتىعىن تاۋىپ الىپ، ءبىر جىلعا جۋىق ۇيىندە ۇستاعان. نەلىكتەن «اتىس قارۋىن زاڭسىز ساقتاۋ» دەگەن تاعى ءبىر ۇكىم كۇشىنە ەنبەدى؟ ۇلىمىزدىڭ ءومىرىن قيعان ادامداردى تىم جەڭىل جازا الدى دەپ سانايمىز. سوندىقتان ۇكىمگە شاعىمداناتىن بولامىز»، دەدى مارقۇمنىڭ اكەسى ورازعالي توقسانباي.

ەستەرىڭىزگە سالا كەتەيىك، اتىراۋلىق سپورت جۇلدىزى ەسەنبەك سيگۋاتوۆ وتكەن جىلدىڭ 9 تامىزىنا قاراعان ءتۇنى قالا ماڭىنداعى امانگەلدى (دامبا) جانە قۇرمانعازى اۋىلدارىنىڭ جاسوسپىرىمدەرى مەن ۇلكەن جىگىتتەر اراسىنداعى قاقتىعىس كەزىندە قازا تاپقان بولاتىن. اتىراۋ وبلىستىق پوليتسيا دەپارتامەنتى ۇزاق ۋاقىت بويى ەكى كۇدىكتىنىڭ دە قۇقىق قورعاۋ ورگاندارىندا قىزمەت ەتكەنىن مويىنداماعان ەدى. وبلىستىق سوتتا اتاپ وتكەندەي، ۇكىم ءالى زاڭدى كۇشىنە ەنگەن جوق. ايىپتاۋشى تاراپ جوعارى تۇرعان سوت ينستانتسياسىنا شاعىمدانۋىنا بولادى.

سوڭعى جاڭالىقتار

دوللار قىمباتتادى

قارجى • كەشە

ۇقساس جاڭالىقتار